Okushiiva edina laKalunga okwa kwatela mo shike?

MBELA edina loye oli na osho tali ti? Moitukulwa imwe mounyuni, oshi li onghedindjikilile okuluka okaana edina tali ti sha. Edina lokaana otashi dulika li ulike kutya ovadali ova itavela shike, ove na eenghedi da tya ngahelipi ile kutya ove na etimaumbwile lilipi li na sha nonakwiiwa yako.

Okuluka omunhu edina li na eityo oshinima sha dja nale. Pefimbo lOmbibeli, luhapu ovanhu ova li hava lukwa omadina e na eityo lonhumba. Edina olo omunhu a lukwa otali dulu okuulika kutya okwa teelelwa a ka dane onghandangala ya tya ngahelipi monghalamwenyo. Pashihopaenenwa, eshi Jehova a li a lombwela David kombinga yonghandangala oyo omonamati Salomo a li ta ka dana monakwiiwa, okwa ti: “Edina laye tali ka ninga Salomo, [tali ti “Ombili”], ndele Ame ohandi etele Israel ombili netulumuko.” — 1 Omafimbo 22:9.

Omafimbo amwe, Jehova okwa li ha lukulula oohandimwe omolwonghandangala oyo tava ka dana. Pashihopaenenwa, omukulukadi waAbraham oo a li ongadji okwa li a lukululwa kuJehova a ninge Sara, olo tali ti, “Omona wohamba.” Omolwashike mbela? Jehova okwa ti: “Ame ohandi ke mu nangeka noupuna, ndee handi ku pe muye okaana okamati. Heeno, Ame ohandi ke mu nangeka noupuna, opo ye ota ka ninga oiwana. Neehamba doiwana tadi ka dja muye.” (Genesis 17:16) Nopehe na omalimbililo, okuuda ko kutya omolwashike Sara a li a lukululwa otashi ke ku kwafela u ude ko onghandangala ipe oyo a li ta ka dana.

Mbela ongahelipi kombinga yedina Jehova olo la fimana neenghono li dule omadina aeshe? Edina olo otali ti shike? Eshi Moses a li a pula Kalunga kombinga yedina laYe, Jehova okwa li e mu nyamukula a ti: “Ame ohandi ka kala osho handi ka kala.” (Exodus 3:14, NW) Etoloko laRotherham ola toloka ovelishe oyo la ti: “Ame ohandi ka kala keshe osho sha wapalela nge.” Edina Jehova otali ulike kutya Jehova oKalunga oo ha dana eenghandangala di lili noku lili. Natu longife efaneko li li paunafangwa: Omudalakadi otashi dulika a dane eenghandangala di lili noku lili efiku keshe eshi ta file oshisho ounona vaye. Pashihopaenenwa, ota dulu okudana onghandangala e li omufilishisho, omuteleki, omuhongi, she likolelela keemhumbwe odo tadi holoka po. Jehova naye osho e li ngaho nonande okwa tumbala neenghono. Opo Jehova a wanife po elalakano laye lopahole li na sha novanhu, oha ningi keshe osho tashi mu wapalele opo a dane onghandangala keshe oyo ya pumbiwa. Okushiiva edina laJehova okwa kwatela mo oku mu fimaneka noku mu pandula omolweenghandangala di lili noku lili odo ta dana.

Shinyikifa oluhodi, ovanhu ovo vehe shii eityo ledina laKalunga kave shii omaukwatya aye mawa. Ndele ngeenge owa konakona Ombibeli, oto ka dula okuuda ko eenghandangala odo Jehova ta dana e li Omupukululi omunaendunge, Omuxupifi omunaenghono nOmuyandji nehalo liwa, okutumbula po ashike imwe. Edina Jehova otali ti sha neenghono.

Ndele nande ongaho, ihashi kala alushe shipu okulihonga kombinga yedina laKalunga. Oshitukulwa tashi landula otashi ka yelifa kutya omolwashike.