Ouhamba waKalunga oshike?

“Onghundana ei iwa youhamba . . . “ — MATEUS 24:14, NW.

JESUS okwa li a kwatela mEudifo laye lokOmhunda la shiivika nawa oshihopaenenwa sheilikano osho sha kwatela mo eindilo eli tali ti: “Ouhamba woye nau uye.” Ovanhu omamiliyona mahapu ove shii eilikano olo momutwe nohave li endulula lwoikando. Oensiklopedia imwe oya ti kutya “eilikano olo olo unene hali longifwa kOvakriste aveshe pefimbo lelongelokalunga.” Ndele nande ongaho, vahapu ovo have li endulula kave shii kutya Ouhamba oshike ile kutya otau ka ninga shike eshi tau ke uya. — Mateus 6:9, 10.

Osho itashi kumwifa molwaashi omafatululo ovawiliki vOukwakriste e na sha nokutya Ouhamba waKalunga oshike otaa kondjifafana, taa ngwangwaneke nokwa kitakana. Omunhu umwe okwa shanga shi na sha nOuhamba waKalunga a ti kutya oo “oshinima shopashikumwifilonga, . . . ekwatafano lomeni lomunhu naKalunga omunamwenyo . . . olo tali ningifa ovalumenhu novakainhu va ka xupifwe.” Umwe okwa ti kutya evangeli lOuhamba olo “ehongo longeleka.” O-Catechism of the Catholic Church oya ti: “Ouhamba waKalunga oo ouyuki, ombili nosho yo ehafo lOmhepo Iyapuki.”

Oto ka mona enyamukulo la yela pepandja 2 loshifo eshi, olo tali ti: “Ouhamba waKalunga, oo u li epangelo lolela olo li li meulu, otau ka xulifa po oukolokoshi aushe nokuninga edu oparadisa.” Natu ka taleni nghee Ombibeli tai yambidida eyelifo olo.

Ovapangeli vomonakwiiwa ovo tava ka pangela edu alishe

Ouhamba oo epangelo olo hali pangelwa kohamba. Ohamba yOuhamba waKalunga oyo Jesus Kristus omunyumunwa. Okunangekwa po kwaye e li Ohamba yomeulu okwa popiwa memoniko olo la li la pewa omuprofeti Daniel oo a shanga a ti: “Onda mona momamoniko oufiku, ndele tala, Umwe a fOmona womunhu [Jesus] e uya moilemo yokeulu, ndele ye okwe uya kOmuxungu ndele ve mu ehenifa koshipala shaye. Ndele ye okwa pewa eenghono nefimano noshilongo. Noiwana aishe omaludi nomalaka tae mu longele. Eenghonopangelo daye odo eenghonopangelo daalushe, kadi na apa tadi xulu po. Ndele oshilongo shaye osho oshilongo itashi ka teywa po.” — Daniel 7:13, 14.

Embo lOmbibeli laDaniel ola popya yo kutya Ouhamba oo tau ka dikwa po kuKalunga owa pamenena notau ka hanauna po omapangelo aeshe opanhu nonokutya kau na efiku u ka xulifwe po nandenande. Metukulwa 2 omwa popiwa shi na sha nondjodi ya nwefwa mo oyo ya li ya tuwa kohamba yaBabilon, omo ya li ya mona oshihongwafano shinene osho tashi faneke okushikulafana kwomapangelo omounyuni. Omuprofeti Daniel okwa li a fatulula ondjodi oyo a ti: “Pomafiku axuuninwa . . . Kalunga ou komeulu ota ka dika ouhamba itau ka teka po fiyo alushe, nepangelo lawo itali ka yandjwa koshiwana shimwe. Ndele owo otau ka nyanyaula notau ka teyaula omauhamba aeshe noku a xulifa po, ndelenee owo vene tau ka kala fiyo alushe.” — Daniel 2:28, 44.

Ohamba yOuhamba waKalunga hayo aike tai ka pangela. Eshi Jesus a li ta longo oukalele waye wokombada yedu okwa li a shilipaleka ovayapostoli vaye ovadiinini kutya vo navakwao vamwe vali otava ka nyumuninwa meulu ndele tava ka kala omutumba komalukalwapangelo. (Lukas 22:28-30) Jesus ka li ta popi shi na sha nomalukalwapangelo ovenevene, molwaashi ngaashi e shi popya, Ouhamba oo otau ka kala meulu. Ombibeli oya yelifa kutya ovapangeli pamwe naJesus ovo ova dja “mukeshe oludi nelaka novanhu noiwana” nonokutya otava ka ninga ‘eehamba novapristeri, ndele tava ka kala nokupangela kombada yedu.’ — Ehololo 5:9, 10.

Omolwashike onghundana yOuhamba iwa?

Didilika kutya Kristus Jesus okwa pewa eenghono a pangele ‘oiwana aishe omaludi nomalaka’ nosho yo kutya ovo tava ka pangela pamwe naye otava ka pangela ve li ‘eehamba novapristeri kombada yedu.’ Ndele mbela oolyelye tava ka kala ovapangelwa vOuhamba oo? Ovanhu ovo hava tambula ko onghundana iwa oyo tai udifwa kunena. Ovapangelwa ovo otava ka kwatela mo yo ovanhu ovo tava ka nyumunwa va kale nomwenyo kombada yedu, ovo tava ka kala ve na eteelelo lokukala nomwenyo fiyo alushe.

Ombibeli oya popya sha yela kombinga yomanangeko noupuna oo taa ka hafelwa kovanhu koshi yOuhamba waKalunga. Apa otapa shikula amwe omomanangeko noupuna oo:

“[Ota ka] xulifa po oita fiyo okeengaba dedu, ndee ta teyaula omauta nomaonga, nomatemba oita te a xwike po nomundilo.” — Epsalme 46:10.

“Ndele vo otava ka dika omaumbo ndee tava kala mo, ndele tava twike oikokola yomiviinyu, ndee tava li oiimati yayo; itava ka tunga mu kale vamwe, ihava ka twika, vamwe ngeno va lye oiimati yavo.” — Jesaja 65:21, 22.

“[Kalunga] ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.” — Ehololo 21:3, 4.

“Omesho ovapofi otaa ka pashuka nomatwi ovafitamatwi otaa ka fituluka. Mefiku olo oshingudu otashi ka nuka ngaashi omenye nelaka laau ha kokoma, otali imbi nokukuwilila.” — Jesaja 35:5, 6.

“Efimbo tali uya, opo aveshe ava va kala meembila otava udu ondaka [yaJesus]. Ndee tava holoka mo, ava va longa ouwa okunyumukila omwenyo.” — Johannes 5:28, 29.

“Ovananheni vo otava ka fyuulula edu, ndee tava ka hafela ombili inene.” — Epsalme 37:11.

Osho kashi fi tuu onghundana iwa! Natango, omaxunganeko Ombibeli oo a wanifwa otaa ulike kutya efimbo oli li popepi opo Ouhamba u hovele okupangela ombada yedu aishe pauyuki.