Ehena popepi naKalunga

Ovanamido otava ka shuna kounyasha

MBELA olyelye womufye a hokwa oinima oyo hai etifwa koukulupe, ngaashi eengadji, oupofi, okufita omatwi nosho yo okweenda omwoodimba? Otashi dulika u lipule to ti, ‘Omolwashike Kalunga e tu shita hatu dulu okuhafela eenghono dounyasha ndele xuuninwa ohatu ka hangwa vali koilanduliko youkulupe?’ Onghundana iwa oyoyo kutya osho kasha li elalakano laKalunga li na sha novanhu. Ndele ponhele yaasho, okwa udaneka kutya ota ka xulifa po oilanduliko youkulupe. Dimbuluka eendjovo odo a li a lombwela tatekulululwa Job, odo tadi hangwa muJob 33:24, 25.

Natu ka konakoneni shi na sha nonghalo omo mwa li omulumenhu omudiinini Job, oo a li e holike kuJehova. Satana okwa li a tula oudiinini waJob momalimbililo eshi a ti kutya oha longele ashike Kalunga omolwohole yokuliholamwene, ndele hamolwaashi e mu hole shili. Ashike Job ka li e shii kutya Satana oye a li ta yeleke oudiinini waye. Jehova okwa li a efa Satana a yeleke Job molwaashi okwa li e lineekela Job nokwa li e shii kutya oku na eenghono, ta dulu okwaalulila oinima monghalo omo ya li nale. Okudja opo, ‘Satana okwa li a umbila Job oidinda ii koshi yeemhadi fiyo okombada yomutwe.’ (Job 2:7) Olutu laye ola li la ninga omainyo, oshipa shaye osha li sha kukuta, osha li sha laula nosha li yo tashi natuka ko kolutu. (Job 7:5; 30:17, 30) Job ka li tuu mouyahame munene! Ndele nande ongaho, okwa li a kanyatela oudiinini waye. Okwa ti: “Fiyo handi ka fuda mo omufudo wange, itandi ekelashi po ouyuki wange.” — Job 27:5.

Ndele Job okwa li a ninga epuko la kwata moiti. Pomhito imwe eshi a li ta diladila kutya oku li pokufya, okwa li a hovela okukala te liyukipalifa unene, a li ‘e litala ko omuyuki [e dule Kalunga, NW].’ (Job 32:2) Kalunga okwa li a longifa Elihu e li omupopikalelipo waye a pukulule Job. Kakele kaasho, Elihu okwa li yo a lombwela Job etumwalaka liwa la dja kuKalunga, a ti: “[Job] mu xupifa a ha ye mombila, ame nda pewa oikulila. Opo nee olutu laye tali ka fuluka vali eenghono dounyasha, ye ota shuna vali momafiku ounyasha waye.” (Job 33:24, 25) Eendjovo odo oda li shili da ningifa Job a kale e na eteelelo. Job okwa li a shiiva kutya ka li ta ka twikila okukala ta mono oixuna fiyo omefyo. Okwa li e shii kutya ngeenge okwe livele ombedi, Kalunga ota ka kala a hafa okutambula ko oikulila opo e mu mangulule momaupyakadi aye aeshe.a

Job okwa li a tambula ko epukululo olo nelininipiko nokulivela ombedi. (Job 42:6) Jehova okwa li a tambula ko oikulila, a li a efa eyambo laJob li fufile omatimba aye nokungaho okwa li a dula oku mu alulila monghalo omo a li nale noku mu pa ondjabi. Jehova okwa li a “nangeka noupuna okukalamwenyo kwaxuuninwa kwaJob noupuna uhapu u dule winya wopehovelo.” (Job 42:12-17) Diladila ashike nghee Job a li e udite a pepelelwa! Kakele komanangeko noupuna amwe oo a li a mona, omukifi waye owa li yo wa velulwa nolutu laye ola li la shuna “momafiku ounyasha waye.”

Ndele oikulila oyo Kalunga a li a tambula ko opo a dimine po Job oya li i na ongushu ya ngabekwa, molwaashi kaya li ye mu ningifa a kale a wanenena nohauxuuninwa okwa ka fya. Kunena, fye otwa yandjelwa oikulila i na ongushu i dule ei yaJob. Jehova okwa yandja pahole Omona waye, Jesus, a ninge oikulila yetu. (Mateus 20:28; Johannes 3:16) Ovanhu aveshe ovo ve na eitavelo tali longo mekuliloyambo laJesus ove na etimaumbwile loku ka kala nomwenyo fiyo alushe moparadisa kombada yedu. Kalunga ota ka mangulula ovanhu aveshe ovadiinini koilanduliko aishe youkulupe mounyuni mupe oo twa teelela. Omolwashike ito twikile okulihonga osho u na okuninga opo u dule oku ka mona nghee ovanamido tava ka shuna vali ‘momafiku ounyasha wavo’?

[Eshangelo lopedu]