Ovaleshi tava pula . . . 

Ovakriste aveshe ovadiinini ohava i ngoo shili meulu?

▪ Ovanhu vahapu ova lesha eendjovo daJesus tadi hekeleke, edi tadi ti: ‘Osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele aha kane, ndelenee a kale e nomwenyo waalushe.’ (Johannes 3:16) Ndele mbela Jesus okwa li a hala kutya ovalongeli vaJehova Kalunga aveshe ovadiinini otava ka ya meulu opo va dule oku ka kala nomwenyo waalushe va hafa shili?

Didilika eendjovo daJesus odo tadi ningifa omunhu a diladile moule, tadi ti: “Kape na umwe ou a londa a ya keulu, oye tuu aeke a londoloka keulu, Omona wOmunhu, ou ha kala meulu.” (Johannes 3:13) Eendjovo odo otadi ulike kutya ovalongelikalunga vonale ovadiinini ngaashi Noa, Abraham, Moses nosho yo David inava ya meulu. (Oilonga 2:34) Ndele ngeenge osho ngaho, mbela ove li peni? Oku shi popya paunafangwa, ovapiya vaKalunga ovo ovadiinini vonale ove li meembila, va kofa mefyo nokave na eshiivo lasha. Oohandimwe va tya ngaho ova teelela ashike enyumuko. — Omuudifi 9:5, 6; Oilonga 24:15.

Jesus oye a popya oshikando shotete mOmbibeli kutya ope na yo ovanhu vamwe ovo tava ka nyumuninwa omwenyo womeulu. Okwa li a lombwela ovayapostoli vaye kutya ote ke va longekidila onhele meulu. (Johannes 14:2, 3) Osho osha li oshinima shipe koshiwana shaKalunga. Omuyapostoli Paulus okwa ka yelifa konima yefimbo eshi Jesus a nyumuninwa omwenyo womeulu a ti kutya okwa ‘yapulila ovahongwa vaye ondjila ipe noi na omwenyo,’ sha hala okutya, ondjila oyo shidalelwe i endwe komunhu. — Ovaheberi 10:19, 20.

Mbela osho osha hala kutya okudja opo ovapiya vaKalunga aveshe ovadiinini ova li tava ka ya meulu? Ahowe, ovo tava nyumuninwa omwenyo womeulu otava i mo ashike molwaashi ve na oshinakuwanifwa she likalekelwa osho tava ka wanifa po. Jesus okwa li a lombwela ovayapostoli vaye moufiku waxuuninwa oo a li pamwe navo kutya otava ka kala “omutumba komalukalwa” mOuhamba waye womeulu ve li ‘ovatokoli.’ Onghee hano, ovo tava i meulu ove na oshinakuwanifwa shoku ka pangela pamwe naye. — Lukas 22:28-30.

Kakele kovayapostoli vaJesus, opa li yo pe na ovanhu vamwe vali ovo tava ka pewa oufembanghenda oo mukumwifi. Omuyapostoli Johannes okwa li a mona Jesus memoniko e li pamwe nongudu yovanyumunwa meulu nokwa ti kutya ‘otava ka pangela kombada yedu ve li eehamba novapristeri.’ (Ehololo 3:21; 5:10) Mbela ovanhu ovo a mona ove li vangapi? Ngaashi ashike omapangelo aeshe opanhu haa kala e na omuvalu wovapangeli wa ngabekwa, omuvalu wovapangeli vOuhamba womeulu nao owa ngabekwa. Odjona yaKalunga, Jesus, otai ka pangela pamwe novanhu 144 000 “ovo va kulilwa movanhu.” — Ehololo 14:1, 4, 5.

Oshoshili kutya omuvalu oo wovanhu 144 000 omunini neenghono okuyelekanifa novapiya vaKalunga aveshe ovadiinini vokunena nosho yo vopefimbo lonale. Ashike osho oshi shii okuudiwa ko molwaashi ovanhu 144 000 ovo tava nyumuninwa omwenyo womeulu ove na oshinakuwanifwa shiyapuki shokondadalunde osho ve na oku ka wanifa po. Natu tye nee ngeno owa hala okutunga eumbo, mbela oto ka kuta ovatungi aveshe ovanawino vomoshitukulwa sheni? Hasho nandenande! Oto ka kuta ashike ovatungi ovo wa pumbwa opo va tunge eumbo olo. Sha faafana, havanhu aveshe ovadiinini va hoololwa kuKalunga va ka wanife po oshinakuwanifwa osho she likalekelwa shoku ka pangela pamwe naKristus meulu.

Epangelo olo lomeulu otali ka wanifa po elalakano laKalunga lopehovelo li na sha novanhu. Jesus novapangeli pamwe naye otava ka pashukila oilonga yokuwapekulula edu alishe li ninge oparadisa. Ashike omuvalu wovanhu ovadiinini ovo tava ka kala nomwenyo fiyo alushe meduparadisa va hafa shili, owa nyengana okuvalula. (Jesaja 45:18; Ehololo 21:3, 4) Omuvalu oo owa kwatela mo yo ovanhu ovo ve li medimbuluko laKalunga ovo tava ka nyumunwa. — Johannes 5:28, 29, yelekanifa no-NW.

Ovalongeli vaJehova aveshe ovadiinini vokunena nosho yo vopefimbo lonale otava ka pewa oshali ya denga mbada yoku ka kala nomwenyo waalushe. (Ovaroma 6:23) Ovanhu ashike vanini ve na eteelelo loku ka kala nomwenyo meulu opo va ka wanife po oshinakuwanifwa she likalekelwa, ndele ongudu inene otai ka kala nomwenyo moparadisa kombada yedu.