Onhumwafo ya dja koMadagascar

Oshimalagasi ohashi linyenge sha fa omusika iwa

POMHITO imwe, otwa li tu na okuya nomushamane wange kokanhunhu kaMadagascar, molwaashi otwa li twa pewa oshinakuwanifwa shoku ka udifila kokanhunhu oko tu li ovatumwa. Otwa li twa lekelafana novapambele nosho yo nookaume ketu notwa li twa kendabala okukala twa pama, molwaashi otwa li tu shii kutya Jehova okwe tu pa oshilonga osho tashi tu wapalele note ke tu kwafela tu pondole.

Ihatu dimbwa nande efiku olo twa li twa ya kokwoongala oshikando shotete kokanhunhu oko. Pokwoongala oko, omumwatate oo a li ta kwatele komesho Ekonakono lOshungonangelo okwa li ashike a fa omunhu ta wilike ongudu yovashiki vomusika. Osha li shidjuu neenghono kufye okuuda ko elaka olo, nomolwaasho eshi ovanhu va li tava popi otwa li ashike tu udite fa tava shiki omusika iwa. Otwa li tu wete kutya otashi ke tu pula efimbo lile okulihonga elaka olo.

Efiku limwe eshi omumwatate a li a pula epulo la wedwa po pokatendo kamwe, onda li nde li nyamukula mokule meendelelo, molwaashi osho osha li oshikando shotete nda uda ko omapulo oo. Ovanhu ovo va li omutumba popepi naame ova li va uda nge nonda li nde likwatela ofandja. Nonande onda li nda fya ohoni, onda li yo nda hafa eshi nda uda ko osho omumwatate a ti.

Onda li handi kala ndi udite nda fa aame handi kwafelwa kovamwatate ngeenge tu li moukalele, ponhele ngeno aame ndi va tulile po oshihopaenenwa. Ovamwatate novamwameme ova li hava kwafele nge pahole shi na sha nokuninga omatwalemo e shii okuudiwa ko moukalele, va li hava lombwele nge osho ndi na okutya nosho yo omishangwa odo ndi na okulongifa.

Ohandi dimbuluka oshikando shimwe fimbo twa li moukalele, okaana kamwe oka li taka ingida taka ti, “Vazaha! Vazaha!” Vazaha otashi ti “omunailongo” mOshimalagasi. Otwa li twa hovela okweendelela molwaashi otwa li twa tila kutya pamwe ounona vakwao navo otave uya va ule nge ngaashi oko. Ashike okamati kamwe oka li ka hanyena okaana oko ka li taka ingida nge, ka ti: “Omunhu oo ke fi omunailongo molwaashi oha popi elaka letu!” Omumwameme oo twa li hatu longo naye okwa li ta tolokele nge molwaashi kanda li ndi udite ko kutya ounona ovo otava ti shike shaashi ova li tava popi tava endelele. Ndele nande ongaho, onda li ndi udite kutya onda xwepopala. Kanda li vali ndi udite nda fa omunailongo.

Luhapu ngeenge nda fya oudja, onda li handi tuwa omukumo kovanyasha ovo va li va ulika kutya ove hole nge eshi va li have uya kwaame tave limemesha nokukwata nge meenyala nonande katwa li hatu liudu nawa ngeenge hatu kundafana. Ovanyasha vomeongalo letu ove li shili enangeko noupuna olo la dja kuJehova. Omumwameme umwe omunyasha wedina Hasina oye a li ha tolokele nge nokwa li ha kala e udite ko osho nda hala okutya nokuli nonande vamwe kave udite ko. Luhapu ngeenge twa li hatu kundafana nookaume kange vomeongalo letu ndele kave udite ko nawa, Hasina okwa li yo he va yelifile kutya onda hala okutya shike.

Meongalo omo twa li nomushamane wange ola li pokutukulwa li ninge omaongalo avali. Onghee hano, vamwe ovo tava i keongalo lipe ova li ve na okupewa po ovakonakonimbibeli ovo hava di moshitukulwa omo tamu ka kala hamu ongalele eongalo olo lipe. Omumwameme umwe okwa li a pula nge ndi kale handi konakona nomukonakoni waye umwe. Molwaashi onda li nda tila, onda li nde mu lombwela kutya itandi dulu natango okukonakona Ombibeli nomunhu. Ashike omumwameme oo okwa li a ladipika nge ndi dimine. Okwa li a shilipaleka nge kutya ohandi ke shi pondola kekwafo laJehova. Okwa tala nge neisho longhenda ndele ta lombwele nge noitya i li paunafangwa kutya mafiku ohandi ka dula okuhonga vamwe. Eendjovo odo oda li da twa nge shili omukumo.

Omukonakonimbibeli oo okwa kala ta ningi lela exumokomesho. Fiku limwe fimbo nda li pondje yeumbo, onda li nda uda ta ifana nge. Okwa li a lombwela nge kutya otava i va ka hombole paveta nomushamane waye. Omushamane waye naye okwa li a hovela okukonakona nova li ve litulila po omalalakano mahapu opamhepo oo va li va hala okuhanga, mwa kwatelwa okuninginifwa. Osho osha li sha hafifa nge, nonande onda li ndi shii kutya Jehova oye ha nanene ovanhu kuye ndele hafye.

Otwe lihonga oinima ihapu moilonga youtumwa. Nonande ohatu kala shili twa djuulukwa ookaume novapambele vetu, natango ohatu kala ashike tu udite twa fa tu li pamwe navo. Luhapu ohatu hokololele ovamwatate kombinga yavo, nopaife ohave tu pula nokuli kutya ovapambele vetu ove li po ngahelipi. Otwa teelela nodjuulufi efimbo olo ovapambele vetu tava ka shakena novamwatate ovo.

Natango Oshimalagasi ohashi linyenge sha fa omusika ngeenge vamwe tava popi, ndele paife ohandi shi udu. Onda teelela nodjuulufi efimbo olo naame handi ka dula okukala handi popi nawa elaka olo, tali linyenge la fa omusika ngaashi naanaa ngeenge tali popiwa kuvamwe. Jesus okwa ti: “Inamu kala noshisho shefiku lomongula. Osheshi lo otali uya li na shalo vene.” (Mateus 6:34) Onghee hano, ohatu twikile natango okulihonga oitya kooshimwe nooshimwe. Ndele paife ohandi kendabala natango okulihonga nawa elaka olo mokukala handi pwilikine nawa kuvamwe eshi tava popi opo naame ndi kale handi li popi nawa ngaashi ovamwatate vomuMadagascar.

[Efano pepandja 25]

Eshi twa li hatu udifa naHasina oshikando shimwe