Oto dimbuluka?
Mbela owa lesha ngoo nawanawa Eeshungonangelo odo opo da piti? Ngeenge owe di lesha, kendabala okunyamukula omapulo aa taa landula apa:
• Omolwashike Job a li a tomhwa kutya ota ka mangululwa?
Job okwa li e shii nghee Omushiti wetu omunahole e uditile ovalongeli vaYe ovadiinini ovo va fya. Okwa li a dimina kutya oku li oshilonga shomake aKalunga. Okwa li yo e shii kutya Omuyandjimwenyo ota dulu shili oku mu alulila momwenyo. — 4/1, epandja 12.
• Otu shi shii ngahelipi kutya okulongela Kalunga twa mana mo inashi hala okutya otu na okukala alushe twa lulika oipala ile ihatu lihafifa nandenande?
Otu na okuhopaenena oshihopaenenwa shaJesus. Jesus okwa li ha hafele okulya eendja pamwe navamwe. Otu shii yo kutya ka li ha kala a lulika oshipala ile a tala ko keshe shimwe sha kwata moiti. Ovanhu vahapu, nokuli nounona, ova li hava mono shipu okweehena popi naye nova li hava kala ve udite va tulumukwa ngeenge ve li naye. — 4/1, epandja 14.
• Omalalakano elipi to dulu okulitulila po opo u hafele okulesha nokukonakona Ombibeli?
Kala ho ilikana fimbo ino hovela okulesha Ombibeli nokukendabala uha twalwaatwalwe. Kala ho longifa efimbo lihapu mokukonakona omishangwa odo didjuu okuudiwa ko nosho yo nghee da yelifwa opo u di ude ko nawa. — 5/15, epandja 3, 4.
• Omuti wolumono oo wa tumbulwa mOvaroma etukulwa 11 otau faneke shike?
Omuti wolumono oo otau faneke oshitukulwa oshitivali sholudalo laAbraham, Israel shopamhepo. Omidi dolumono olo lopafaneko otadi faneke Jehova nefina lao otali faneke Jesus. Eshi Ovajuda vahapu vopambelela va li va ekelashi Jesus, ovanhu vomoiwana imwe ovo va ninga ovaitaveli ova pewa oufembanghenda wokutwikwa komuti oo wolumono, nokungaho otava ka wanifa po omuvalu woshitukulwa oshitivali sholudalo laAbraham. — 5/15, epandja 22-25.
• Omolwashike ovanhu vahapu inava itavela kutya ovanhu aveshe ovalunde?
Omolwaashi efimbo limwe ohava tale ko ehokololo lOmbibeli li na sha naAdam naEva li li ashike eengano ile omahepu nokuli nonande ohava i keengeleka. Vamwe ova putukila moitukulwa omo ovanhu inava itavela muKalunga. — 6/15, epandja 9.
• Ovanyasha otava dulu ngoo okuninginifwa?
Eendjovo daKalunga oda popya kutya omunhu oku na okukala e na oupamhepo wa tya ngahelipi opo a kale a wana okuninginifwa, ashike inadi tya kutya oku na okukala e na omido ngapi. Jesus okwa li a lombwela ovashikuli vaye a ti: “Ka ningeni ovanhu aveshe ovalongwa vange, noku va [ninginifa, NW].” (Mat. 28:19) Onghee hano, ovanhu ovo ve li nale ovahongwa vaKristus ovo ashike va wana okuninginifwa. — 6/15, epandja 3.
• Ngeno omulumenhu a wanenena Jesus okwa dalele oludalo la wanenena, mbela ngeno ola ka ninga oshitukulwa shekuliloyambo?
Hasho nandenande! Nokuli nonande Jesus okwa li ta dulu okuninga xe yovanhu omabiliyona va wanenena, ngeno oludalo laye olo inali ka ninga oshitukulwa shekuliloyambo. Omwenyo waJesus wa wanenena owa li tau dulu okufutila po omwenyo wa wanenena oo wa kanifwa kuAdam. (1 Tim. 2:6, NW) — 6/15, epandja 13.
• Ongahelipi Ovakriste tava dulu okuulika kutya ova tala ko elondwelo olo li li mOilonga 20:29, 30 li na sha novahongi ovanaipupulu li li oshinima sha kwata moiti?
Otu na okuhenuka okukala hatu popi novahongi ovanaipupulu ile oku va shiva momaumbo etu. (Rom. 16:17; 2 Joh. 9-11) Ovakriste ohava henuka yo okulesha omambo ovashunimonima, okutala eeprograma davo ko-TV nokulesha omauyelele oo hava tula kointaneta. — 7/15, epandja 15-16.
• Mbela Gehenna onhele omo hamu kala ovanhu tava hepekwa momundilo?
Oshitya osho shOshigreka Gehenna oshi na eityo la faafana naalo loshitya shOshiheberi geh Hinnom, osho tashi ti ‘efilu laHinnom’ ile geh veneh-Hinnom, osho tashi ti ‘efilu lovana vaHinnom.’ (Jos. 15:8; 2 Eeh. 23:10) Jesus okwa li a longifa oshitya ‘Gehenna’ ta ulike kehanauno laalushe olo Kalunga a tokolela ovakolokoshi. Onghee hano, oshitya ‘Gehenna’ oshi na eityo la faafana ‘nefuta lomundilo’ olo la popiwa membo lEhololo. Oitya aishe oyo otai ulike kehanauno laalushe lovanhu ovo vehe na eteelelo loku ka nyumunwa. — Juli-Septemba 2011, epandja 15.