Ame paife ondi shii Kalunga oo handi longele

Ehokololo la-Marieta Manuel Bacudio

Omuevangeliste umwe Omupentekoste oo kwa li haku tiwa kutya oku na eenghono dokuvelula okwa li e uya oku tu talela po. Eshi a kwata nge, onda li nde lidenga po ndihe shii apa ndi li, vati “onda kwatwa komhepo.” Eshi nda penduka po, onda li ndi udite nda fa ndi na eenghono dokuvelula odo nda li nda hala. Mbela oshike sha li sha ningifa nge ndi kale ndi udite ngaho, nosha kuma ngahelipi onghalamwenyo yange? Fimbo inandi mu hokololela kombinga yoshinima osho, nandi mu lombwele kombinga yonakudiwa yange.

ONDA dalelwa muIlocos Norte, shomuFilipine, mo 10 Desemba 1968, notwa dalwa omulongo, ame omutiheyali. Ngaashi Ovafilipine vahapu, naame onda kulila mongeleka yaKatolika. Onda mana ondodo 12 mo 1986, nonda li nda hala okuninga omupangi. Ndele molwaashi onda li nda kwatwa komukifi wa kwata moiti, osho inashi ka ningwa vali. Onda li nokuli ndi shii ohandi fi. Molwaashi onda li nda kenyenekwa komukifi, onda li nda ilikana kuKalunga a kwafele nge nonde mu udanekela kutya ngeenge onda veluka ohandi ke mu longela onghalamwenyo yange aishe.

Onda ka veluka konima yefimbo lile, nonda li nda dimbuluka eudaneko olo da udanekela Kalunga. Onghee hano, muJuni 1991 onda li nda ya mofikola yOmbibeli yOvapentekoste. Omulandu wofikola owa li wa kwatela mo okupewa “oshali yomhepo iyapuki.” Onda li nda hala okukala ndi na eenghono dokuvelula. Kofikola oyo otwa li twa hongwa kutya opo u pewe eenghono odo, ou na okulidilika nokwiilikana. Molwaashi onda li nda hala okulimonikifa nda fa ndi na oshali, pomhito imwe, pefimbo lomailikano onda li handi pwilikine meholeko keilikano lomunafikola umwe oo a li ta ilikana mokule e li mohuke yongulu. Eshi a li pokumana, onda li nda shuna diva opo nda li nda twa eengolo. Konima yaasho, onda li nde mu lombwela oinima aishe oyo a popya meilikano, nokwa li a dimina kutya naame ondi na oshali.

Onda li ndi na omapulo mahapu fimbo nda li handi lihongo kofikola oyo. Pashihopaenenwa, muMateus 6:9 omwa tumbulwa “Tate” nosho yo “edina” laye. Onda li nda pula omapulo ngaashi: “Tate oo a tumbulwa kuJesus olyelye? “Nedina lalyelye li na okuyapulifwa?” Ovahongi vetu ova li va pa nge omanyamukulo inaa yela nawa, noitaa mbilipaleke. Ova popya kombinga yOukwatatu nova ti kutya oshiholekwa. Osho osha li sha ngwangwaneka nge. Ndele nande ongaho, onda li nda twikila okudeulilwa oufita.

Nghee nda shiiva kombinga yEendombwedi daJehova

Kofikola yOmbibeli otwa li twa hongwa kutya Eendombwedi daJehova odo da shiya ko mokuhonga omahongo oipupulu. Otwa hongwa yo kutya odo ooantikristus nonda hovela okukala ndi tonde elongelokalunga olo.

Momudo omutivali, onda li nda ya keumbo pefimbo lefudo lofikola opo ndi ka talele po ovadali vange. Eshi omukulu wange umwe wedina Carmen a uda kutya onda ya keumbo, naye okwa li e uya keumbo. Pefimbo opo okwa hangwa nale a ninga Ondombwedi yaJehova nomukalele wefimbo li yadi. Eshi a li ta kendabala okuhonga nge kombinga yaKalunga, onda li nde mu nyamukula nda handuka handi ti: “Ame ondi shii nale Kalunga oo handi longele.” Konima eshi nde mu ula nai handi popi mokule, onde mu undulilashi noinandi mu pitika vali a popye naame.

Eshi nda ka shuna kofikola yOmbibeli, Carmen okwa li a tumina nge okambo Should You Believe in the Trinity?a Onde ka pombaula po diva ndele handi ka xwike po molwaashi onda li nde mu handukila natango.

Onda li nda ninga omufita

Eshi nda twikila nelihongo lange mofikola yOmbibeli, onda li nda dula okulidilululifa vamwe. Onda li ndi udite etumba unene tuu eshi meme nomumwamememati va ninga vongeleka yetu yOpentekoste.

MuMarsa 1994, onda li nda pita kofikola yOmbibeli yOvapentekoste. Ngaashi nda tumbula metetekelo, pefimbo opo omuevangeliste umwe okwa li e uya oku tu talela po. Atushe ovo twa pita mofikola oyo otwa li twa hala okukala naye molwaashi otwa li twa itavela kutya oku na oshali yokuvelula. Otwa ya naye koaltari, hatu nuka nokupandula omake twa landula omusika. Keshe oo a kumwa kuye ohe lidenge po, taku tiwa vati okwa kwatwa komhepo.b Eshi a ka kwata nge, naame onde lidenga po ndele handi kala ndihe shii a pa ndi li. Eshi nda xwepopala, onda li nda tila, ndele onda li nda hafa molwaashi onda li ndi udite kutya ondi na eenghono dokuvelula.

Diva konima yaasho, onda li nda longifa eenghono odo opo ndi velule okaana kamwe oko kali taka ehama olwiidi neenghono. Eshi nda ilikana, okaana oka hovela okuhonoka meendelelo ndele taka veluka. Okudja opo, onda li ndi udite kutya ohandi dulu okuwanifa po osho nda li nda udanekela Kalunga. Ashike onda li ndi udite nda fa nda pumbwa sha natango. Onda li nda itavela filufilu kutya oku na ashike Kalunga umwe, ndele nghi mu shii. Onda li yo nda limbililwa omahongo mahapu ongeleka.

Oinima oyo ya li ya lundulula okudiladila kwange

Konima yoiningwanima oyo, onda li ndi tonde neenghono Eendombwedi daJehova shi dulife nale. Ngeenge onda mono oishangomwa yEendombwedi, onda li handi i xwike po. Opo nee, opa ka ningwa oshinima osho nda li inandi teelela. Onda li nda haluka neenghono eshi nda uda kutya meme ina hala vali okukala mongeleka yetu. Carmen okwa kala ta konakona Ombibeli naye, nonda li nde mu handukila neenghono.

Lwanima onda ka hanga oshifo sho-Awake! meumbo lameme. Ngeno onale ngeno onde shi xwika po. Ndele molwaashi onda li nda halelela okutala kutya ota lesha kombinga yashike, onda talaatala mo. Onda mona mo oshitukulwa shimwe tashi popi kombinga yaumwe oo a li a itavela filufilu omahongo ongeleka. Ndele eshi a hovela okulesha oishangomwa yEendombwedi pamwe nOmbibeli, okwa li a tomhwa kutya ehongo lOukwatatu, loheli nosho yo okutya omwenyo ihau fi, kae li pamishangwa. Oinima oyo oya li ya kuma omutima wange molwaashi oyo naanaa nda kala nda hala okuuda ko nawa. Okudja opo, onda kala nda halelela okuuda ko oshili yOmbibeli.

Konima eshi nda lesha vali ehokololo limwe longhalamwenyo moshifo sho-Awake! li na sha naumwe oo a li ombuvi yomalodu nokwa pikwa koingangamifi, ndele ta ningi omalunduluko manene monghalamwenyo yaye eshi a konakona Ombibeli, onda hovela okukala handi lesha oishangomwa ihapu yEendombwedi. Onda li nda mona okambo kedina The Divine Name That Will Endure Forever.c Eshi nde ka lesha, onde lihonga kutya edina laKalunga oJehova. Onda li nda hafa neenghono eshi nde lihonga oshili kombinga yaKalunga aeke kashili.— Deuteronomion 4:39, NW; Jeremia 10:10, NW.

Onda kala handi lesha meholeko nonde lihonga omahongo mahapu Ombibeli. Pashihopaenenwa, kOfikola yOvapentekoste onda li nda hongwa kutya Jesus oye Kalunga, ndele paife onde lihonga mOmbibeli kutya oye “Omona waKalunga omunamwenyo.”— Mateus 16:15, 16.

Osho sha lundulula oikala yomutima wange

Eshi twa ka shakena vali naCarmen, okwa li a kumwa eshi nde mu pula a pe nge okambo The Divine Name That Will Endure Forever nosho yo oishangomwa imwe vali. Onda kala oule womido dihapu mofikola yOmbibeli, ndele inandi hongwa oshili, onda pofipalekwa ashike. Paife omutima wange otau xunga kehafo eshi nde lihonga oshili yOmbibeli. Ondi udite filufilu kutya onda wanifilwa eendjovo daJesus odo tadi ti: “Tamu ka shiiva oshili, noshili otai mu mangulula.” (Johannes 8:32) Oshili oya li ya hovela okulundulula onghalamwenyo yange.

Potete onda li handi diladila kutya ohandi dulu okulongela Jehova Kalunga meholeko, ame handi twikile ngoo ndi li omufita. Ndele onda ka mona diva kutya itandi dulu vali okuhonga omahongo mahapu ongeleka, ashike onda li nda tila. Onda li handi lipula kutya, Mbela ohandi ka xupa ngahelipi ngeenge onda efa po oufita? Onda li yo handi diladila kutya otashi ka fifa ohoni ongeleka ngeenge omufita wavo umwe okwa ningi Ondombwedi yaJehova. Onghee okwa li nda twikila okuudifa ndi li omufita, ndele onda li handi henuka omahongo a puka ongeleka.

Eshi twa ka shakena vali naCarmen, okwa li a ninga eetepo ndi ye kokwoongala kwEendombwedi daJehova. Molwaashi onda li handi ke lilopota kongeleka yetu ei ya kula moshilando shedina Laoag, onda li handi kongo meholeko Olupale lOuhamba opo hapa ongalele Eendombwedi moshilando osho. Otwa li twa shiivafana naAlma Preciosa Villarin, oo a li ha ifanwa oshilukadina “Precious,” nokwa li omukalele wefimbo li yadi meongalo olo. Nonande kanda li natango ndi hole lela Eendombwedi, onda li nda dimina tu konakone Ombibeli naye.

Omukulu wange okwa kala ha hongo nge oshili yOmbibeli nelidiiniko. Onda ka mona kutya Precious naye okwa li omulididimiki. Okwa li a kwafela nge neenghono ndi ude ko Ombibeli, nokuli nonande onda li handi kala nda kenyanana, handi kendabala oku mu tangunifa, nomafimbo amwe onda li handi popi unene pombada, handi komangele oinima imwe oyo nda hongelwe nale. Okunakonasha, elininipiko nosho yo omwenyo muwa oo wa li u niwe kuPrecious nosho yo kEendombwedi dikwao owa li wa kuma omutima wange neenghono. Osho osha li sha ningifa nge ndi kale nda hala okulongela Jehova.

MuJuli 1995, onda li nda didilika kutya ondi na okweefa po oilonga youfita ngeenge onda hala okulongela Kalunga. Omolwashike mbela? Ehololo 18:4 ola popya pafaneko kombinga yomalongelokalunga oipupulu la ti: “Djeni mo musho, nye ovanhu vange, mu ha kwatafane noulunde washo, mu ha hangike komahepeko asho.” Onda li handi lipula kutya, Mbela openi handi ka hanga oyuuyemo? Onde lihonga mOvaheberi 13:5 kutya Kalunga okwa udanekela ou ta longo ehalo laye a ti: “Ame ihandi ku efa noitandi ku fii po nande.”

Nonande tate nomumwamememati paife ohava pataneke nge neenghono, fimbo ku na oivike ivali ndi ninginifwe ndi li Ondombwedi, onda li nda pondola okuya keumbo ndele handi xwike po oinima aishe oyo nda li handi longifa eshi nda li omufita. Eshi nda xwika po oinima oyo, eenghono de likalekelwa odo nda li nda pewa oda dja mo mwaame. Nale ngeenge nda kofa, opa li hapa kala oshinima sha fa tashi findile nge alushe poshi. Eliudo la tya ngaho ola dja mo mwaame. Omididimbe odo nda li handi mono pekende londuda yange ihandi di mono vali. Okukonakona Ombibeli okwa kwafela nge ndi mone kutya oinima oyo ovanhu va tala ko i li eeshali kunena, ngaashi eenghono dokuvelula, inai dja kuKalunga ndele okeemhepo dowii. Onda hafa neenghono eshi nda manguluka ko kenwefemo lado, ngaashi ashike okakadona okapiya oko ka li ke “nomhepo youpule” ndele Paulus naBarnabas tave i te mo.— Oilonga 16:16-18.

Kasha li tuu shihafifa eshi twa ninginifwa oshita nameme tu li Eendombwedi daJehova muSeptemba 1996! Konima eshi nda ninginifwa, onda ninga omukalele wefimbo li yadi wEendombwedi daJehova, nonda kala handi longo nehafo moilonga oyo oule womido dihapu.

Paife onda hombolwa komushamane wange wedina Silver. Ohatu longo noudiinini opo tu honge okamonakadona ketu oshili yOmbibeli. Ovamwameme vamwe navo ova ninga ovalongeli vaJehova. Nonande ohandi livele ombedi eshi nda kala ndihe shii Kalunga oule womido dihapu, paife onda hafa neenghono eshi ndi shii Kalunga oo handi longele.

[Omashangelo opedu]

[Ouyelele u li pepandja 27]

Onda li nda longifa eenghono odo opo ndi velule okaana kamwe oko kali taka ehama olwiidi neenghono

[Ouyelele u li pepandja 28]

Oshili oya li ya hovela okulundulula onghalamwenyo yange

[Ouyelele u li pepandja 29]

Onda li nda hafa neenghono eshi nde lihonga oshili kombinga yaKalunga aeke kashili

[Efano pepandja 27]

Eshi nda pita mofikola youfita

[Efano pepandja 28]

Precious ta konakona Ombibeli naame

[Efano pepandja 29]

Eshi hatu ninginifwa fye nameme

[Efano pepandja 29]

Eshi nda ninga omukalele wefimbo li yadi wEendombwedi daJehova

[Efano pepandja 29]

Ame nomushamane wange, okamonakadona ketu novapambele vange vahapu ovo navo ve uya melongelokalunga lashili