Omayele Ombiibeli otaa dulu ngoo oku tu kwafela kunena?

VAMWE OHAVA TI AHOWE. Ondokotola imwe oya ti kutya okulongifa omayele Ombiibeli okwa faafana nokulongifa embo lofikola lomo 1920 loudindoli. Omunhu oo ina fimaneka Ombiibeli otashi dulika nokuli a pule ngeenge ope na ngoo oo ta hale okulongifa okambo kokombiyuta ke na ouyelele wa kulupa ke mu wilike ngeenge ta longifa okombiyuta yoshinanena. Noitya imwe, vamwe ove wete Ombiibeli ya kulupa.

Mbela ope na ngoo ou ta hale okulongifa embo lomayele likulu mounyuni ou wa xuma komesho mouteknologi? Keenhele dihapu dokointaneta ohaku tulwa nokuli omayele newiliko li li pefimbo efimbo keshe. Keeprograma doko-TV ohaku kala ovaxungimwenyo, ovashiivinawa ve na sha nonghalamwenyo nosho yo ovashangi tava yandje omayele. Eefitola domambo ohadi landifa omambo mahapu oo a nuninwa okukwafela ovanhu nohadi mono oimaliwa ihapu.

Ngeenge kunena oku na omauyelele aeshe oo e li pefimbo, omolwashike u na okukonga omayele mOmbiibeli oyo ya shangwa omido 2 000 lwaapo da pita? Mbela osho itashi ka ningifa ovo inava fimaneka Ombiibeli va kale va fa ve li mondjila eshi tava ti okulongifa embo lonale li ku wilike osha fa ashike to longifa embo loudindoli la kulupa ile okambo ka kulupa ke na ouyelele u na sha nokombiyuta uhe li pefimbo? Paulelalela, okutomhafana kwa tya ngaho okwa puka. Ounongononi nouteknologi ohau lunduluka meendelelo, ndele mbela eemhumbwe dovanhu oda lunduluka? Ovanhu natango ova hala okumona eityo longhalamwenyo nokukala ve na ehafo lashili, eameno, ekwatafano liwa momaukwaneumbo nosho yo ookaume vawa.

Nonande Ombiibeli oya dja nale, oya yandja omayele e na sha neemhumbwe odo nosho tuu. Natango oya nwefwa mo kOmushiti wetu. Oya yandja omayele mukeshe shimwe monghalamwenyo notai tu kwafele ngeenge pa holoka oupyakadi u nasha noshinima shonhumba. (2 Timoteus 3:16, 17) Kakele kaasho, oi na omayele e li pefimbo, oo ehe na fiku a kwishe. Ombiibeli oya ti: “Ondjovo yaKalunga oi nomwenyo.” — Ovaheberi 4:12.

Mbela otaku dulu ngoo okutiwa kutya Ombiibeli oi li paushili? Mbela oya kwisha ile otai dulu oku ku kwafela? Elalakano lOshungonangelo ei yomEeshungonangelo de likalekelwa da landulafana, olo oku ku kwafela u mone omanyamukulo komapulo oo.