Nghee to dulu okuhafela nokuninga ekonakono lOmbiibeli tali ti sha

Josua ta lesha Omhango; omakuma aJeriko a wa po neumbo laRahab inali ninga sha; Josua tai ilikana a yelula omake aye pombada

JOSUA okwa li a taalela eshongo la kwata moiti. Okwa li a taalela omashongo madjuu eshi a li ta twala oshiwana shaIsrael mEdu lEudaneko. Jehova okwa li e mu shilipaleka kutya ota ka pondola, noku mu ladipika a ti: “Kala ashike wa pama nokunyatipala ndele wanifa naanaa omhango aishe, . . . . ndelenee i konakona omutenya noufiku, opo u shiive okuwanifa naanaa ashishe eshi sha shangelwa mo. Osheshi osho ove to ka kala u nelao meendjila doye ndele oto kala nouwa.” — Jos. 1:7, 8.

Nafye ohatu shakeneke omashongo a kwata moiti ‘momafimbo aa madjuu okukaliwa muo.’ (2 Tim. 3:1) Ngaashi Josua, nafye ohatu dulu okupondola mokutambula ko omayele oo Jehova a li e mu pa. Ohatu dulu okukala hatu lesha Ombiibeli pandjikilile, nokutula moilonga omafinamhango ayo opo tu dule okufinda omashongo oo twa taalela.

Ashike vahapu vomufye katu fi naanaa ovahongwa vawa, nokukonakona Ombiibeli kaku fi kupu kufye. Molwaashi okukonakona Ombiibeli okwa fimanenena, tala oshimhungu shi na oshipalanyole “Kendabala omaetepo aa,” osho tashi dulu oku ku kwafela u hafele nokuninga ekonakono lOmbiibeli tali ti sha.

Omupsalme okwa imba a ti: “Endife nge melila loipango yoye, osheshi onda hokwa mo.” (Eps. 119:35) Oto dulu okumona ouwa muhapu mokukonakona Eendjovo daKalunga. Oto dulu yo okumona mo omamona taa ti sha eshi to kongo omamona opamhepo.

Nonande ku na okuwilika oshiwana ngaashi Josua a li a ninga, ou na omashongo oo ho shakeneke. Ngaashi Josua, konakona nokutula moilonga osho sha shangwa omolwouwa woye. Ngeenge owa ningi ngaho, naave yo oto ka pondola noto ka katuka pandunge.

KENDABALA OMAETEPO AA

Ilikana ofimbo ino hovela okulesha. Ombiibeli oi na omadiladilo omunaenghono Kalunga oo e a shangifa omolwouwa woye. Onghee ngeenge to lesha Ombiibeli, pula ekwafo kuye opo u i ude ko, u dimbuluke osho wa lesha noku i tula moilonga monghalamwenyo yoye. — Esra 7:10.
Lipula omapulo eshi to lesha Ombiibeli ile oishangomwa oyo ya kanghamena kOmbiibeli ngaashi: ‘Oshitukulwa eshi otashi lombwele nge shike kombinga yaJehova? Otashi yambidida ngahelipi etumwalaka olo li li mEendjovo daye? Ongahelipi handi dulu okulongifa omayele aa ndi kwafele vamwe?’
Dilonga kwaasho to lesha. Mwena po okulesha ndele to diladila manga kutya: ‘Oshitukulwa eshi otashi pendula omaliudo a tya ngahelipi mwaame? Omolwashike tashi ningifa nge ndi kale ndi udite ngaho? Osha pambafana ngahelipi noimoniwa yange yomonakudiwa, yopaife nosho yo tashi dulika noiningwanima yomonakwiiwa? Ongahelipi handi dulu okutula moilonga omafinamhango nosho yo omayele aa monghalamwenyo yange?’ (Job 23:5; Eps. 49:3) Tala ngeenge oto dulu okuyelifa kutya omolwashike Jehova ha ladipike oshiwana shaye shi henuke oilonga imwe ile kutya oilanduliko yeenghatu da yoolokafana otai ka kala ya tya ngahelipi. — Deut. 32:28, 29.
Kala to faneke momadiladilo oye eshi to lesha oinima oyo ya yelifwa moshitukulwa. Pashihopaenenwa, mbela oto dulu okufaneka momadiladilo oye ovamwaxe vaJosef eshi va li tave mu landifa po kOvaismaeli? (Gen. 37:18-28) Kala nee ngeno wa fa u wete omudingonoko, udite edimba nomalinyengo? Kala nee wa fa oove u li monghalo yovanhu ovo. Mbela ova li tava diladila shike nova li ve udite ngahelipi? Okudiladila kwa tya ngaho otaku ka ningifa elesho loye li kale litunhula noli na eityo.
Kala ho longifa oilongifo oyo tu na opo i ku kwafele eshi to ningi omapekapeko. Shiiva oishangomwa aishe oyo i li melaka leni, mwa kwatelwa oyo i li kointaneta naayo ya pilindwa. Ino ongaonga okupula vamwe ve ku kwafele nghee u na oku i longifa nawanawa. Pashihopaenenwa, o-Watch Tower Publications Index ile Elongifwambo lokukonga omauyelele moishangomwa yEendombwedi daJehova otai ke ku kwafela u mone omauyelele e na sha noikundafanwa ihapu nokumona omayelifilo eevelise dihapu dOmbiibeli. Longifa Okalongifwambo kokukonakona Eendjovo daKalunga (sgd-KY), oko ke na omauyelele e na sha neenhele, efimbolandulafano, ondjudo yoinima, oiyelekifo nosho tuu.
Didilika oitwa oyo ya fimana moshishangomwa opo i ku kwafele u dimbuluke osho wa konakona. Oto dulu yo okulombwela vamwe kombinga yasho. Mbela omu na sha osho to dulu okulongifa moukalele? Meenghedi da tya ngaho, ito ka kaleka ashike oitwa oyo wa konakona momadiladilo ndele oto ke i longifa yo opo vamwe va mone mo ouwa.