Ngeenge u wete shidjuu okulididimikila omaupyakadi
Pashihopaenenwa, Sallya wokoUnited States, oo konyala a kanifila oiniwe yaye aishe moshikungulu, okwa ti: “Kanda li handi dulu okulididimikila onghalo oyo. Onda li nda wililwa po neenghono.”
Oupyakadi umwe vali oyoo ngeenge wa filwa omuholike woye. Janice wokoAustralia okwa ti: “Eshi ovanamati vange vavali va fya ve li shikulila po, osha li sha teyaula omutima wange neenghono. Onda pula Jehova nda ti: ‘Kwafele nge, onda wililwa po neenghono. Efe nge ashike ndi fye, onda loloka.’”
Oshihopaenenwa shimwe oshaDaniel oo a li a nyika oluhodi eshi omukulukadi waye a li ehe fi omudiinini kuye. Okwa ti: “Eshi omukulukadi wange a lombwela nge kutya ina kala omudiinini kwaame, onda li ashike nda fa nda tuwa komutima nombele. Oupyakadi oo owa li wa etela nge ouyahame oo wa li wa kwata efimbo lile.”
Oshifo eshi shOshungonangelo otashi ka kundafana nghee onghalamwenyo tai dulu okukala tai ti sha, nokuli nongeenge
pa holoka oiponga yopaushitwe
wa filwa omuholike woye
kaume koye kopahombo ehe fi omudiinini kwoove
to ungaunga nomukifi wa kwata moiti
u udite kutya oshixwepo u fye
Tete, natu ka tale kutya ongahelipi hatu dulu okulididimika ngeenge pa holoka oiponga yopaushitwe.
a Omadina amwe oo e li moitukulwa ei ya pambafana hao ovanhu ovo lelalela.