Ngeenge kaume koye kopahombo ehe fi omudiinini kwoove

Maria wokoSpain okwa ti: “Eshi omushamane wange a ti kutya ota fiye nge po opo a ye kuumwe oo omunyasha, onda li nda hala okufya. Onda li ndi wete shihe li pauyuki, unene tuu ngeenge handi diladila komaliyambo oo nda ninga omolwaye.”

Bill wokoSpain okwa ti: “Eshi omukulukadi wange a fiya nge po, onda li nda wililwa po neenghono. Omalalakano etu nosho yo eteelelo letu oya iwa moshipala. Omafimbo amwe onda li handi kala ndi udite nda pepelelwa, ashike lwanima ohandi kala nda polimana.”

OMUNHU oha kala a dengwa pomutima ngeenge kaume kaye kopahombo ehe fi omudiinini kuye. Vamwe otashi dulika va dimine po ookaume kavo kopahombo ovo ve livela ombedi ndele tava kala vali ve na ekwatafano liwa.a Kashi na nee mbudi kutya otava kala va hombola ile otava teya ohombo, ovo ookaume kavo hava kala vehe fi ovadiinini kuvo ohava kala va dengwa pomutima. Ongahelipi tava dulu okuungaunga nomaliudo a tya ngaho?

OMISHANGWA ODO TADI DULU OKU KU KWAFELA

Nonande ova dengwa pomutima, vahapu ova mona ehekeleko mOmishangwa. Ove lihonga kutya Kalunga oku na ko nasha navo nohe va kenukile. — Malakia 2:13-16.

“Ngeenge ndi noshisho shoudjuu meni lange, omahekeleko oye oo a hekeleka omwenyo wange.” — Epsalme 94:19.

Bill okwa ti: “Ngeenge handi lesha ovelishe oyo, ohandi kala nda fa ndi wete Jehova ta hekeleke nge, ngaashi xe omunanghenda.”

“Osheshi kwaau omunefilonghenda oto limonifa oove mwene omunefilonghenda.” — Epsalme 18:25.

Carmen okwa ti: “Omushamane wange okwa kala ehe fi omudiinini kwaame oule weemwedi. Ashike ondi na elineekelo kutya Jehova ota kala alushe omudiinini kwaame. Ke na efiku a fiye nge po.”

“Kaleni muhe na nande oshisho shasha, ndelenee oufyoona weni u shiivifileni Kalunga momailikano nomomaindilo . . . , nombili yaKalunga ei i dule eendunge adishe, otai ka amena omitima deni nomadiladilo eni muKristus Jesus.” — Ovafilippi 4:6, 7.

Sasha okwa ti: “Ohandi leshulula ovelishe oyo lwoikando. Kalunga okwa pa nge ombili yopamadiladilo monghalamwenyo yange eshi nda kala handi ilikana lwoikando.”

Aveshe ovo va tumbulwa ova li hava kala va hala okusholola omafimbo amwe. Ashike ova li ve lineekela muJehova Kalunga nova li va tuwa omukumo kEendjovo daye. Bill okwa weda ko a ti: “Eitavelo lange ola kwafela nge ndi kale ndi na onghalamwenyo tai ti sha nonande oinima kaya li tai ende nawa. Nonande onda li handi ende oule wefimbo ‘molufilu lomudile wefyo,’ Kalunga okwa li e li pamwe naame.” — Epsalme 23:4.

a Opo u mone ouyelele muhapu kutya ou na okudimina po kaume koye kopahombo oo ehe fi omudiinini ile hasho, tala oitukulwa ya pambafana mo-Awake! yomafiku 22 Aprili 1999, i na oshipalanyole “When a Mate Is Unfaithful.”

Nghee vamwe ve lididimika

Lesha nokudilonga komishangwa odo tadi hekeleke.

Bill okwa ti: “Ohandi lesha embo laJob nosho yo lEpsalme, nohandi didilike eevelishe odo tadi kwafele nge monghalo omo ndi li. Onda didilika kutya ovashangi ovo vOmbiibeli navo ova li ve udite ouyahame oo nda li ndi udite.”

Eemusika ohadi hekeleke.

Carmen okwa ti: “Ngeenge itandi dulu okukofa oufiku, ohandi pwilikine komusika. Osho osha li sha hekeleka nge neenghono.” Daniel okwa ti: “Onde lihonga okudenga oshiketala, nomusika oya kwafela nge ndi kale ndi na ombili yopamadiladilo.”

Lombwela vamwe omaliudo oye.

Daniel okwa ti: “Kanda li handi lombwele vamwe omaliudo ange. Ashike onda li ndi na ookaume vawa nonda li handi va lombwele omaliudo ange keshe efiku. Onda li handi va lombwele omaliudo ange moku va shangela eenhumwafo nosho yo mokupopya navo. Osho osha li sha kwafela nge neenghono.” Sasha okwa ti: “Ekwafo olo nda li nda mona okudja kovapambele vange ola li la kwafela nge neenghono adishe. Meme okwa kala e lile nge po alushe, nokwa kala e na efimbo lokupwilikina kwaame. Tate okwa ulikila nge ohole nonda kala ndi udite nda amenwa, naasho osha kwafela nge ndi kale ndi na ombili yopamadiladilo.”

Twikila okwiilikana.

Carmen okwa ti: “Ohandi ilikana alushe. Onda li ndi udite kutya Kalunga oku li popepi naame, ha pwilikine kwaame noha kwafele nge. Onda ehena elela popepi naKalunga eshi nda li monghalo oyo idjuu.”