Nghee efyo tali ka findwa

NONANDE okuhadulika kwovadali vetu votete, Adam naEva, okwa etela ovanhu aveshe oulunde nefyo, osho inashi lundulula elalakano laKalunga li na sha novanhu. Kalunga okwa popya lwoikando mEendjovo daye, Ombiibeli, kutya elalakano laye inali lunduluka.

• “Ovayuki, vo otava ka fyuulula oshilongo, ndele tava kala mo alushe.” — Epsalme 37:29.

• “Ye ota ka hanauna po efyo fiyo alushe, ndele Omwene, Kalunga ta ka feta po omahodi momesho aaveshe.” — Jesaja 25:8.

• “Omutondi wahauxuuninwa ou ta hanaunwa po oye efyo.” — 1 Ovakorinto 15:26.

• “Nefyo itali kala po vali ile oluhodi ile okulila ile ouyehame itau kala po vali.” — Ehololo 21:4.

Ongahelipi Kalunga ta ka “hanauna po efyo” ile ta ka xulifa po efyo olo li li omutondi? Ombiibeli oya popya sha yela kutya ‘ovayuki otava ka kala fiyo alushe.’ Ndele oya ti yo kutya “kombada yedu kape na nande omunhu omuyuki, ou ha ningi ngeno ouwa auke.” (Omuudifi 7:20) Eshi Jehova ta ka pa ovanhu inava wanenena omwenyo waalushe, mbela osha hala okutya ota ka hauluka omifikamhango daye douyuki? Hasho nandenande! Molwaashi “Kalunga iha fufya,” ke na fiku a ninge ngaho. (Titus 1:2) Ndele oshike ta ka ninga po opo a wanife po elalakano laye lopahole li na sha novanhu?

EFYO OTALI FINDWA OMOLWEKULILO

Jehova Kalunga okwa ninga elongekido lopahole eshi a yandja ekulilo opo a mangulule ovanhu mefyo. Ekulilo otali ulike kofuto ya yeleka oshinima osho sha nyonaunwa ile ofuto i li pauyuki. Molwaashi ovanhu aveshe ovalunde nova tokolelwa efyo, Ombiibeli oya yelifa nawa ya ti: “Kape na omunhu ta dulu okukulila omumwaina, nokuyandjela mukwao oikulila kuKalunga, osheshi okufutila omwenyo oifuta apa i fike, otai nyengana.” — Epsalme 49:7, 8.

Ngeenge omunhu ina wanenena okwa fi, kungaho, okwa futila po ashike ehandukilo lomatimba aye mwene; ita dulu okulikulila ye mwene ile okukulila umwe moulunde. (Ovaroma 6:7) Otwa li twa pumbwa omunhu a wanenena opo a yambe po omwenyo waye, hamolwomatimba aye, ndele omolwomatimba etu. — Ovaheberi 10:1-4.

Kalunga okwa li a ninga elongekido la tya ngaho. Okwa tuma Omona waye, Jesus, okudja meulu a dalwe kombada yedu e li omunhu a wanenena. (1 Petrus 2:22) Jesus okwa popya kutya okwe uyile ‘okuyandja omwenyo waye u ninge oikulila yavahapu.’ (Markus 10:45) Okwa fya opo a finde efyo olo li li omutondi, notu dule okukala nomwenyo. — Johannes 3:16.

EFYO OTALI KA FINDWA NAINI?

Metwokumwe newanifo lexunganeko lOmbiibeli olo tali wanifwa kunena, otu li “omafimbo madjuu” oo taa ulike kutya otu li “momafiku axuuninwa” ounyuni ou woukolokoshi. (2 Timoteus 3:1) Omafiku axuuninwa otaa ka xulila ‘mefiku letokolo nolekano lovanhu vehe na Kalunga.’ (2 Petrus 3:3, 7) Ashike ovanhu ovo ve hole Kalunga otava ka xupa pehanauno olo, notava ka pewa ‘omwenyo waalushe.’ — Mateus 25:46.

Ovanhu vamwe omamiliyona otava ka mona omhito yokupewa omwenyo waalushe ngeenge va nyumunwa. Eshi Jesus a li a talela po oshilando shaNain, okwa li a nyumuna. Omufiyekadi umwe okwa li a filwa omonamati ewifa, na Jesus okwa li e mu udila “olukeno,” ndele ta nyumuna omonamati waye. (Lukas 7:11-15) Omuyapostoli Paulus okwa popya yo a ti: ‘Ondi neteelelo olo lomuKalunga, nokutya, otaku ka kala enyumuko lovayuki nolovalunde.’ Eteelelo olo la twa otali ulike ohole yaKalunga inenenene yokuhola ovanhu. — Oilonga 24:15.

Ovanhu omabiliyona ova teelela nodjuulufi oku ka kala nomwenyo fiyo alushe. Ombiibeli oya ti: “Ovayuki, vo otava ka fyuulula oshilongo, ndele tava kala mo alushe.” (Epsalme 37:29) Pefimbo opo, otava ka kala va hafa neenghono notava ka hekelekwa eshi tava ka mona ewanifo leendjovo domuyapostoli Paulus odo a shanga omido 2 000 da pita, tadi ti: “Efyo, efindano loye oli li peni? Efyo, oshitwifo shoye oshi li peni?” (1 Ovakorinto 15:55) Omutondi munenenene wovanhu, efyo, ota ka findwa.