“Shi tambula”
1 Efimbo limwe, eshi kwa li ta popi novahongwa vaye shi na sha nohombo, Jesus okwa ulika kokuhahombola ku li ‘oshipewa.’ Opo nee okwa ti: “Ou ta dulu oku shi tambula, ne shi tambule.” (Mat. 19:10-12) Omido donhumba konima yaasho, omuyapostoli Paulus okwa shanga shi na sha nomauwa okuhahombola nokwa ladipika vamwe va landule oshihopaenenwa shaye shokukala ina hombola. (1 Kor. 7:7, 38, OB-1986) Vahapu kunena ova “tambula” ko okuhahombola notava hafele omauwa ako. Mbela amwe omuo oelipi?
2 Okulonga nope “he na epiyaano”: Paulus okwa shiiva kutya okuhahombola okwe mu pa omhito yokulongela Jehova e “he na epiyaano.” Sha faafana kunena, omumwatate ina hombola ota dulu okulalakanena okuya kOfikola yOkudeula mOukalele, nosho yo luhapu omunhu oo ina hombola oha kala a manguluka okuya moukokolindjila, okulihonga elaka lipe, okuya oko ku na omhumbwe ya kula, oku ka longa koBetel ile okumona omaufembanghenda oilonga amwe e likalekelwa. Otashi dulika a kale nefimbo lihapu nosho yo eemhito dokuninga ekonakono lopaumwene lomoule, okudilonga nosho yo okupopya naJehova meilikano tali di komutima. Omunhu oo ina hombola luhapu ota dulu okulongifa efimbo lihapu okuliyamba okukwafela vamwe. Oilonga aishe oyo oi li ‘ouwa waye mwene.’—1 Kor. 7:32-35; Oilonga 20:35.
3 Oilonga i he na epiyaano ya tya ngaho tai longelwa Kalunga ohai eta omanangeko noupuna mahapu. Konima yomido 27 dokukala muKenya, omumwameme ina hombolwa okwa shanga ta ti: “Okwa li ookaume vahapu noilonga ihapu! Otwa ninga oinima pamwe notwa talelafana po. . . . Okwa li nda dula okulongifa emanguluko la wedwa po nokwa li handi dulu okweenda noupu oko okuhahombolwa taku pitike opo ndi lipyakidile noukalele, naasho osha etela nge ehafo linene.” Okwa weda ko ta ti: “Mokweendela ko kwomido, ekwatafano lange naJehova ola ninga lopofingo elela.”
4 Oku shi tambula: Jesus okwa ti kutya elinyengotomheno lokulalakanena oshipewa shokuhahombola oli na okukala ‘molwouhamba wokeulu.’ (Mat. 19:12) Ngaashi oshipewa keshe, okuhahombola oku na okulongifwa nawa opo ku ete ehafo nomauwa. Mokutambula ko eemhito odo hadi etwa kokuhahombola nokulineekela muJehova omolwounongo neenghono, ovanhu vahapu inava hombola ova uda ko nawa efimano lokutambula ko oshipewa osho.