Kwafela ovakonakonimbibeli va ninge ovaudifi vonghundana iwa yOuhamba
1 Ngaashi Mateus 28:19, 20 ta popi, Jesus okwa fiila ovahongwa vaye oshinakuwanifwa sha kwata moiti shokuninga ovanhu ovahongwa. Ovahongwa vape navo ove na yo oku ka ninga ovanhu ovahongwa. Hauxuuninwa, okwa li tapa ka kala ongudu inene yovahongwa. Osho okwa li tashi ke shi ningifa tashi shiiva opo onghundana iwa i udifwe mounyuni aushe momafimbo aa a tongomana mondjokonona, efimbo lexulilo olo tu li mulo paife. — Mat. 24:14.
2 Ovakonakonimbibeli vetu otashi dulika va kale ounona vetu ile ovanhu ovo va hala okukonakona nafye Ombibeli. Otwa halelela okukwafela oohandimwe va tya ngaho opo navo va tambule ko oshinakuwanifwa shokukwafela vamwe va ninge ovahongwa vaJesus Kristus. — Luk. 6:40.
3 Va kwafela va dule okuyandja oundombwedi: Ladipika ovakonakonimbibeli voye va kale hava lombwele vamwe kombinga yaasho tave lihongo. Va hokololela oimoniwa yomomapya oyo tai va tu omukumo. Deula ounona voye fimbo vanini va kale hava kufa ombinga moukalele pauyadi she likolelela kokudula kwavo. (Eps. 148:12, 13) Ulika kutya owa lenga oukalele woye okupitila meendjovo nomoshihopaenenwa shoye. — 1 Tim. 1:12.
4 Jehova oha longifa ashike ovo va fimaneka omifikamhango daye douyuki nohava dulika kudo. Oshoshili kutya ovaudifi vape kave na eshiivo lihapu ngaashi ovaudifi vOuhamba ovo ve liyapulila Jehova nova ninginifwa. Ndele nande ongaho, ovahongwa vape ove na okukala va itavela omahovelohongo Ombibeli notava dulu oku a yelifila vamwe. (Tala embo Organized, pp. 79-82.) Ovaudifi vape ove na okukala va dja mo filufilu ‘muBabilon Shinene’ noihava kufa nande ombinga moinima yopapolitika. Ove na okukala hava ongala pandjikilile pokwoongala keshe kweongalo. — Eh. 18:2, 4; Joh. 17:16; Heb. 10:24, 25.
5 Ngeenge ou wete kutya omukonakonimbibeli woye umwe okwa wana okuninga omuudifi ina ninginifwa, shiivifila omupashukili omuunganeki. Omupashukili omuunganeki ota ka unganeka ovakulunhuongalo vavali va shakene naave nomukonakonimbibeli woye, opo va tale ngeenge okwa wana tuu shili okuninga omuudifi ina ninginifwa. Ngeenge okwa ningi omuudifi ina ninginifwa, oto ka kala u na oufembanghenda woku mu deula moukalele eshi tamu longo pamwe naye.