Oshikonga she likalekelwa shi na sha nokushiva ovanhu kEdimbuluko
1. Ovaudifi vOuhamba mounyuni aushe otava ka kufa ombinga moshikonga shilipi osho tashi ka hovela mo 21 Marsa 2009, nomolwashike?
1 MEtine, 9 Aprili 2009, ovalongeli vaJehova Kalunga mounyuni aushe otava ka ongala opo va dimbuluke shi na sha nohole inenenene oyo Jehova a ulikila ovanhu aveshe. (Rom. 5:6-8) Otwa teelela nodjuulufi ovanhu omamiliyona ovo ve na ohokwe ve uye okwoongala pamwe nafye eshi hatu dimbuluka efyo laJesus. Opa unganekwa oshikonga she likalekelwa shokushiva ovanhu kEdimbuluko mounyuni aushe, osho tashi ka hovela mo 21 Marsa.
2. Oitwa ilipi u na okukaleka momadiladilo ngeenge to yandje okafo kokushiva ovanhu kedimbuluko?
2 Oitwa oyo tu na okukaleka momadiladilo: Kendabala okulongifa pauyadi omafano, omapulo nosho yo omishangwa odo da ulikwa mokafo keshivo. Pashihopaenenwa, oto dulu okulongifa efano olo li li kombada yokafo ndele to ti: “Onda hala oku ku shiva u uye u dane pamwe nafye edimbuluko lefyo laJesus olo tali ka kala ko mEtine, 9 Aprili 2009.” Opo nee kundafana shi na sha noshipalanyole nosho yo omapulo oo e li pedu lasho. Divilika yo kutya omuneumbo oo okwa manguluka okushiva oukwaneumbo wavo nosho yo ovanhu vamwe vali ovo a hala okuuya navo kEdimbuluko.
3. Ongahelipi to dulu okudimbulukifa ovanhu ovo wa li wa shiva kedimbuluko pefimbo loshikonga shokushiva ovanhu kEdimbuluko?
3 Ngeenge eongalo leni oli na oshitukulwa sha kula, ovakulunhuongalo otava dulu okulombwela ovaudifi va fiye oufo pomaumbo omo muhe na ovanhu. Momaxuliloshivike oto dulu okuyandja oifo pamwe nokafo oko keshivo. Litulila po elalakano lokushiva ovanhu ovo ho talele po, ovakonakonimbibeli, ovapambele voye, ovanafikola vakweni, ovanailonga vakweni, ovashiinda shoye nosho yo ovashiivikile vamwe. Omudo wa dja ko, omumwameme umwe okwa li a shiva ovapambele vaye 30 kedimbuluko nokwa kala te va dimbulukifa lwoikando shi na sha nanghee omhito oyo ya fimana. Omumwameme oo ka li tuu a hafa eshi ovapambele vaye 25 va li ve uya okudana edimbuluko, navane vomuvo lwanima ova ka tambula ko ekonakonombibeli!
4. Omalongekido elipi tu na okuninga paife, nomolwashike?
4 Ninga omalongekido paife: Ovaudifi vamwe otashi dulika tava dulu okutamununa mo oukalele wavo muMarsa nosho yo muAprili. Ngeenge ou na ounona ile ovakonakonimbibeli ovo tava ningi exumokomesho liwa, eemwedi odo otashi dulika di kale efimbo liwa kuvo okuninga ovaudifi inava ninginifwa. Paife olo efimbo lokuninga omalongekido opo u ka kufe ombinga pauyadi moshikonga shi na sha nokushiva ovanhu kedimbuluko opo ve uye va dimbuluke ohole inenenene oyo va ulikilwa kuJehova nosho yo kuJesus Kristus. — Joh. 3:16; 15:13.