Nghee hatu dulu okuninga omakonakonombibeli hatu longifa embo ‘Ohole yaKalunga’
1. Embo ‘Ohole yaKalunga’ ola nuninwa shike?
1 Katwa li tuu twa tunhukwa eshi twa li twa mona embo lipe, ‘Likalekeni mohole yaKalunga,’ poshoongalele shoshitukulwa “Natu wilikwe komhepo yaKalunga”! Ngaashi sha li sha shiivifwa poshoongalele, embo eli ola nuninwa oku tu kwafela tu shiive omifikamhango dopaenghedi daJehova nokukala tu di hole, ndele haku tu honga omahovelohongo Ombibeli. Embo eli kali na okuyandjwa moukalele weumbo neumbo.
2. Embo eli oli na okulongifwa ngahelipi, noli na okukonakonwa noolyelye?
2 Embo eli olo tali kala paife embo etivali lokukonakona novakonakonimbibeli ngeenge otwa mane okukonakona navo embo Ombibeli otai hongo. Ashike natu kaleke momadiladilo kutya ovanhu ohava ningi exumokomesho lopamhepo la yoolokafana. Ouhapu woutendo oo tamu konakona otau ka ufwa kokudula kwomukonakonimbibeli. Shilipaleka kutya omunhu oku udite ko nawa ouyelele oo tamu konakona. Embo eli kali na okulongifwa onomenawina okuhovela omakonakonombibeli novanhu ovo va konakona nale omambo mahapu ndele ihave uya kokwoongala, nosha yela kutya inava hala okukala metwokumwe noshili yOmbibeli oyo ve lihonga.
3. Otu na okuninga po shike ngeenge ohatu konakona naumwe membo Longela Kalunga?
3 Ngeenge oho konakona Ombibeli naumwe paife to longifa embo Longela Kalunga nomu li poku li mana ko, oto dulu okutokola okumana ko embo olo nokuladipika omukonakoni a leshe paumwene embo ‘Ohole yaKalunga’ ile mu lundulukile membo olo lipe nokuhovela okudja kehovelo. Oto dulu okuhoolola ngeenge omwa pumbwa okukundafana oikundafanwa oyo i li moiwedelwako ile hasho, ngaashi naanaa hatu ningi membo Ombibeli otai hongo.
4. Otu na okuninga po shike ngeenge omukonakoni okwa ninginifwa fimbo ina mana ko embo Ombibeli otai hongo nosho yo ‘Ohole yaKalunga’?
4 Ngeenge omukonakoni okwa ninginifwa fimbo ina mana ko omambo aeshe, ou na okutwikila okukonakona naye fiyo osheshi embo ‘Ohole yaKalunga’ la pwa ko. Nonande omukonakoni okwa ninginifwa, oto dulu okuvalula omalishuneko, ekonakonombibeli nosho yo efimbo olo hamu konakona. Omuudifi mukweni oo ta i pamwe naave nokukufa ombinga mekonakonombibeli naye ota dulu yo okuvalula efimbo.
5. Ongahelipi hatu dulu okulongifa embo ‘Ohole yaKalunga’ opo tu kwafele ovaudifi ovo inave lipyakidila vali?
5 Ngeenge owa pulwa koshilyo shOkomitiye yOilonga yEongalo u konakone Ombibeli nomunhu oo ine lipyakidila vali noilonga yokuudifa, otashi dulika u pulwe u konakone naye omatukulwa onhumba kondadalunde membo ‘Ohole yaKalunga.’ Omakonakonombibeli a tya ngaho kae na okuningwa oule weemwedi dihapudihapu. Embo eli kali fi tuu efiloshisho liwa olo la nuninwa oku tu kwafela tu likaleke “mohole yaKalunga”! — Jud. 21.