Oshoongalele shefiku le likalekelwa shomo 2010
1. (a) Oipalanyole yopamishangwa ilipi ya li ya kundafanwa poyoongalele yefiku le likalekelwa? (b) Oitwa ilipi kondadalunde ya li ya kundafanwa pushimwe shomoyoongalele yefiku le likalekelwa oyo ya pita ye ku kwafela moukalele woye?
1 Oipalanyole imwe yoyoongalele yefiku le likalekelwa ya pita ongaashi: ‘Natu kaleni tu shii oinima oyo ya fimanenena,’ ‘Natu kaleni twa pama tu li oshiunda shimwe,’ ‘Natu hepaulule oshili’ nosho yo ‘Fye onhata, Jehova Omumi wetu.’ (Fil. 1:9, 10, 27, NW; Joh. 18:37; Jes. 64:8, yelekanifa NW.) Mbela owa halelela ngoo oku ka kala poshoongalele shefiku le likalekelwa shomudo woilonga 2010? Otashi ka kala shi na oshipalanyole: “Efimbo olo la xupa ko olixupi,” sha dja mo 1 Ovakorinto 7:29, NW.
2. Ongahelipi tamu dulu okulilongekidila nexwamo oshoongalele shefiku le likalekelwa?
2 Hoveleni okukundafana nexwamo kombinga yoshoongalele shefiku le likalekelwa diva shimha efiku olo tashi ka kala ko la shiivifwa meongalo. Ovadali vamwe ohava kwafele ounona vavo va kale va teelela oshoongalele nodjuulufi mokushanga efiku olo mokalindeli koukwaneumbo pamwe nomusholondodo woinima oyo va pumbwa okutwaalela koshoongalele nokukala tava valula kutya oku na omafiku angapi oshoongalele shi hovele. Pefimbo lEkonakono lOukwaneumbo weni, otamu dulu okukundafana kombinga yoitwa oyo mwa li mwa didilika poyoongalele yefiku le likalekelwa oyo ya pita. Otamu dulu yo okulongekida omitima deni omolwoshoongalele mokulesha membo Benefit From Theocratic Ministry School Education, epandja 13-16, opo mu kwafele omaukwaneumbo eni a ‘tale nhumbi haa udu.’ — Luk. 8:18.
3. Ongahelipi hatu dulu okumona ouwa pauyadi mwaasho tashi ka kundafanwa poshoongalele?
3 Tula moilonga osho we lihonga: Konima yoshoongalele ovanhu vahapu ohava popi tava ti: “Oshoongalele osha li shiwa neenghono.” Osho osho shi na okukala ngaho, molwaashi oshoongalele oshimwe shomomafiloshisho aJehova a denga mbada. (Omayel. 10:22) Opo ouyelele oo wa yandjwa poshoongalele u ku etele ouwa, ou na okudilonga kwaasho we lihonga noku shi diinina. (Luk. 8:15) Ngeenge to shuna keumbo okudja koshoongalele, kundafana noukwaneumbo woye ile naavo u li navo mohauto kombinga yaasho sha kundafanwa ko. Kundafaneni shi na sha nomalalakano oo mwa hala okulitulila po nosho yo oitwa oyo tai ke mu kwafela moukalele. Ngeenge omwa kundafana oinima oyo, otashi ke mu kwafela mu mone ouwa tau kalelele mwaasho sha kundafanwa koshoongalele. — Jak. 1:25.
4. Omolwashike oshoongalele osho tashi ka kala she likalekelwa kufye?
4 Ohatu kala alushe twa hafa ngeenge twa pewa oshali iwa oyo twa li twa halelela. Mbela otwa teelela ngoo nodjuulufi osho Jehova e tu longekidila poshoongalele shefiku le likalekelwa osho tashi uya? Otu na oushili kutya oshoongalele osho otashi ke tu kwafela meenghedi dihapu. Jehova, Tate yetu womeulu, ote ke tu pa oshali iwa, sha hala okutya, etwomukumo nedeulo opo tu wanife po oilonga oyo e tu pa. — 2 Tim. 4:2; Jak. 1:17.