Ovaudifi Ovakriste ova pumbwa okukala hava ilikana
1. Oshike twa pumbwa opo tu wanife po oukalele wetu?
1 Itatu dulu okuwanifa po oukalele wetu keenghono detu vene. Jehova oye he tu pe eenghono opo tu dule oku u wanifa po. (Fil. 4:13) Oha longifa ovaengeli opo ve tu kwafele tu mone ovo va fa eedi. (Eh. 14:6, 7) Jehova oye ha kulike eembuto odo hatu kunu nohatu tekele. (1 Kor. 3:6, 9) Inashi fimana tuu kovaudifi Ovakriste okukala twe lineekela Tate yetu womeulu hatu shi ulike okupitila meilikano!
2. Oinima imwe ilipi hatu dulu okukwatela momailikano etu?
2 Otu na okwiilikana paumwene: Otwa pumbwa okukala hatu ilikana pomhito keshe hatu udifa. (Ef. 6:18) Oinima ilipi hatu dulu okukwatela momailikano etu? Ohatu dulu okupula Jehova e tu kwafele tu kale tu na etaleko la yuka li na sha noshitukulwa shetu notu kale tu na ouladi. (Oil. 4:29) Ohatu dulu okupula Jehova e tu wilike opo tu mone ovanamitimadiwa ovo tashi dulika tu konakone navo Ombibeli. Ngeenge omuneumbo okwe tu pula epulo, ohatu dulu okwiilikana momutima pauxupi hatu pula Jehova e tu kwafele opo tu nyamukule monghedi ya yuka. (Neh. 2:4) Ohatu dulu yo oku mu pula e tu pe ounongo opo tu kale twa pitifa komesho oukalele wetu. (Jak. 1:5) Kakele kaasho, Jehova oha kala yo a hafa ngeenge momailikano etu otwa kwatele mo olupandu li na sha noufembanghenda wokukala ovakalele vaye. — Kol. 3:15.
3. Ongahelipi okwiilikanena vamwe taku xumifa komesho oilonga yokuudifa?
3 Otu na okwiilikanena vamwe: Otu na yo ‘okwiilikanenafana,’ hatu popi nokuli komadina ovaudifi vakwetu ngeenge otashi dulika. (Jak. 5:16; Oil. 12:5) Mbela okuhe na oukolele ohaku ku imba u kufe ombinga pauyadi moilonga yokuudifa ngaashi shito? Ngeenge osho, ilikanena ovaudifi vakweni ovo ve na oukolele. Ino diladila kutya kashi na ekwafo lasha okwiilikanena vamwe. Osha yuka yo okwiilikanena ovakwanepangelo opo va kale ve na etaleko liwa li na sha noilonga yetu yokuudifa, opo ovamwatate va ‘kale nokukalamwenyo ku nombili nengungumano.’ — 1 Tim. 2:1, 2.
4. Omolwashike tu na okudiinina mokwiilikana?
4 Oshilonga shokuudifa onghundana iwa mounyuni aushe itatu dulu oku shi wanifa po keenghono detu vene. Ngeenge otwa “diinineni mokwiilikana,” ohatu ka wanifa po oilonga oyo kekwafo laJehova. — Rom. 12:12.