Eisho loye oli li ngoo paunafangwa?
1. Okukaleka ‘eisho letu paunafangwa’ otashi ti shike?
1 Luhapu ohatu katuka eenghatu she likolelela kwaasho tu wete. Nomolwaasho osha yeleka eshi Jesus a ti: “Eisho loye ngenge [oli li paunafangwa, NW], olutu loye alishe ola yela.” (Mat. 6:22) Ngeenge eisho letu oli li “paunafangwa” meityo lopamhepo, ohali yandje elitulemo kelalakano limwe, sha hala okutya, okulonga ehalo laKalunga. Okupitifa Ouhamba komesho otaku tu kwafele tuha lalakanene oinima yopamaliko inai pumbiwa ile oinima imwe vali oyo tai dulu okuya moshipala oukalele wetu.
2. Oshike tashi dulu okupengifa etaleko letu, ndele oshike tashi ke tu kwafela?
2 Otwa pumbwa okulikonakona pauhandimwe: Etaleko letu li na sha naasho twa pumbwa otali dulu okupengifwa komashiivifo oo haa ulikwa moikundaneki taa ulike kutya otwa pumbwa shike ile kutya vamwe ove na shike. Fimbo inatu lalakanena oshinima shonhumba ile inatu landa oshinima osho tashi pula tu longife efimbo lihapu, oimaliwa ile eenghono detu, otwa pumbwa tete ‘okuvalula oitungifo,’ mokulipula epulo eli kutya: ‘Mbela oshinima eshi otashi ka xwepopaleka ngoo oilonga yange yokulongela Jehova ile otashi ke i ya moshipala?’ (Luk. 14:28; Fil. 1:9-11) Oshi li yo pandunge okulikonakona efimbo nefimbo tu tale kutya omonghedi vali ilipi hatu dulu okukaleka onghalamwenyo yetu paunafangwa opo tu longe shihapu moukalele. — 2 Kor. 13:5; Ef. 5:10.
3. Oshike hatu lihongo moshimoniwa shomumwameme oo a li a ninga omalunduluko opo a kaleke onghalamwenyo yaye paunafangwa?
3 Eshi omumwameme umwe a li a hovela oukokolindjila wondjikilile, okwa li a tokola okuhaefa po okulonga efiku liyadi koilonga yaye yokulikongela omboloto nonande oilonga yetatafiku nayo oya li tai dulu oku mu futa oimaliwa oyo tai ka wanifa po eemhumbwe daye. Ndele hauxuuninwa okwa ka fika pexulifodiladilo, a ti: “Kape na omunhu ta dulu okukalela oovene vavali. Onda li ndi na okuyamba po oinima oyo nda li nda hala opo ndi wanife po eemhumbwe dange. Ndele onda ka didilika kutya oinima yopamaliko ohai kulupa nohandi lilolola ashike moku i lalakanena.” Eenghalo domumwameme oo ode ke mu pitika a ninge omalunduluko opo onghalamwenyo yaye i kale paunafangwa, ndele ta kongo oilonga imwe, naasho oshe mu kwafela a twikile okukala omukokolindjila.
4. Omolwashike sha endelela okukaleka eisho letu paunafangwa paife?
4 Molwaashi efimbo eli tu li mulo ola endelela, osha fimanenena okukaleka eisho letu paunafangwa. Efiku keshe tali piti po, ohatu ende hatu ehene popepi elela nexulilo longhalelo ei yoinima nolehovelo lounyuni mupe waKalunga. (1 Kor. 7:29, 31) Ngeenge otwa kala twa pitifa komesho oilonga yokuudifa, ohatu ke lixupifa fye vene naava tave tu pwilikine. — 1 Tim. 4:16.