Kala we lilongekida alushe okulongifa nawa okafo Mbela owa hala okushiiva oshili?
1. Okafo Shiiva oshili ohaka pondola mokuninga shike?
1 Okafo Mbela owa hala okushiiva oshili? oka nuninwa oku tu kwafela tu hovele omakonakonombibeli. Oke li yo oshilongifo hashi pondola osho hatu dulu okulongifa opo tu tandavelife eembuto doshili. (Omuud. 11:6) Apa otapa landula omaetepo amwe e na sha nanghee hatu dulu okulongifa nawa okafo ka tya ngaho.
2. Ongahelipi hatu dulu okuhovela eenghundafana hatu longifa okafo oko?
2 Nghee to dulu okuhovela nako eenghundafana: Otashi dulika wa pumbwa okupa omuneumbo okafo noku mu ulikila omapulo ahamano oo e li kombada yako, ndele to mu pula to ti: “Epulo lilipi pomapulo aa olo ho lipula unene shi na sha nalo?” Shimha a nyamukula, kundafana naye enyamukulo la kanghamena kOmbibeli okudja mokafo oko ndele to lesha umwe womomishangwa odo da etwa mo ndele inadi tofwa mo. Lesha ile ngonga pauxupi osho sha shangwa pepandja laxuuninwa, ndele to mu pe embo Ombibeli otai hongo. Kutya nee okwa tambula ko embo ile hasho, owe mu pa okafo oko taka dulu okumenifa omidi doshili momutima waye. — Mat. 13:23.
3. Oshike hatu dulu okutya ngeenge omuneumbo okwa ti kutya okwe lipyakidila?
3 Ngeenge omuneumbo okwa ti onde lipyakidila: Oto dulu okutya: “Pamwe nandi ku fiile ashike okafo aka molwaashi paife owe lipyakidila. Mokafo omu na omapulo ahamano a fimana oo hatu lipula nao neenghono, nomu na yo enyamukulo lepulo keshe la dja mOmbibeli. Ngeenge otwa ka shakena vali fiku limwe, ohandi ka kala nda hafa okuuda kutya oto ti ngahelipi.”
4. Oshike hatu dulu okutya ngeenge hatu yandje okafo Shiiva oshili moilonga yepandavanda?
4 Ngeenge to longo mepandavanda: Oto dulu okutya: “Wa lele po! Mbela ope na ngoo efiku limwe wa li we lipula limwe lomomapulo aa? [Teelela omunhu a nyamukule.] Okafo aka otaka yandje omanyamukulo a yela nawa notaa mbilipaleke a dja mOmbibeli.” Ashike ngeenge omunhu ina endelela, oto dulu okukundafana naye enyamukulo limwe okudja mokafo oko, ndele to mu pe embo Ombibeli otai hongo.
5. Ongahelipi hatu dulu okulongifa okafo Shiiva oshili omafimbo amwe ngeenge meumbo inatu hanga mo omunhu?
5 Momaumbo omo muhe na ovanhu: Moitukulwa imwe, luhapu ovaudifi ohava fiye oileshomwa ponhele opo tai dulu okumonika noupu ngeenge meumbo inava hanga mo omunhu. Ngeenge eongalo leni oli na onghedindjikilile ya tya ngaho, omolwashike omafimbo amwe itamu fiye po okafo Mbela owa hala okushiiva oshili? Eshi to ka ninga elishuneko oto dulu okutya: “Eshi twa li peumbo eli oshikando shimwe, otwa li twa fiya po okafo aka molwaashi meumbo katwa li twa hanga mo omunhu. Mbela epulo lilipi lomomapulo aa wa hala la nyamukulwa?”
6. Omolwashike okafo Shiiva oshili ke li oshilongifo hashi pondola moukalele?
6 Okafo Shiiva oshili oka kundafana oshili monghedi i li paunafangwa noya yela nawa. Otaka dulu okukwafela ovanhu vomomalongelokalunga nosho yo vomomaputuko aeshe. Oshipu okuyandja okafo oko; nokuli novanyasha ile ovaudifi vape otava dulu oku ka yandja. Mbela oho longifa ngoo okafo oko pomhito keshe tai wapalele?