‘Yandja oundombwedi nawanawa’ kombinga yOuhamba waKalunga
1. Embo lilipi la li la yandja poshoongalele shoshitukulwa shomo 2009?
1 Embo ‘Yandja oundombwedi nawanawa’ kombinga yOuhamba waKalunga ola li la yandja poshoongalele shoshitukulwa shomo 2009 nopaife ola tolokwa mOshikwanyama. Oshishangomwa osho osha kundafana embo lOilonga yOvayapostoli monghedi oyo tai ningifa omuleshi a kale a tunhukwa omolwoiningwanima oyo ya hokololwa mo. Embo Yandja oundombwedi inali kundafana ovelishe novelishe yembo olo, ndele ponhele yaasho, ola divilika oilihongomwa oyo hatu dulu okulihonga momahokololo oo a hokololwa membo lOilonga notali tu kwafele tu mone nghee hatu dulu okutula moilonga pauhandimwe osho twe lihonga. — Rom. 15:4.
2. Yelifa kutya oinima imwe ilipi oyo tai hangwa membo Yandja oundombwedi.
2 Oinima imwe oyo i li membo olo: Pepandja 2 lembo olo ope na onhumwafo oyo i li etwalemo lembo ya dja kOlutuwiliki omo la popya kutya ola hala tu mone ouwa moshishangomwa osho. Okudja petukulwa 2, pehovelo letukulwa keshe ope na eendjovo odo tadi ngongo oshikalimo shetukulwa nopa ulikwa yo kutya etukulwa ola kanghamena keevelishe dilipi dembo lOilonga. Omatukulwa mahapu oku na oimhungu oyo i na ouyelele tau hongo u na sha novanhu vonhumba, neenhele nosho yo oiningwanima yonhumba. Kominghulo domapandja oku na onhele opo to dulu okuninga omadidilikoshango. Membo olo omu na omafano taa divilike oiningwanima yopaMbibeli, oo tae ke ku kwafela u kale wa fa u wete oiningwanima oyo ya fimana eshi to dilonga kuyo. Pepandja laxuuninwa ope na oshuuliki osho sha yelifa kutya omafano e lili noku lili otaa ulike kushike. Meni loshipeko shalo omu na ouwaalita ovo tave tu kwafele tu mone kutya ovalongelikalunga vakwetu vomefelemido lotete ova li va enda peni eshi va li tava tandavelifa onghundana iwa ‘fiyo okominghulo dounyuni.’ — Oil. 1:8.
3. Ohatu ka mona omanyamukulo komapulo a fimana elipi ngeenge otwa konakona embo lOilonga yovayapostoli?
3 Omanyamukulo komapulo a fimana: Ngeenge otwa konakona embo lOilonga yovayapostoli otashi ke tu kwafela tu mone omanyamukulo komapulo a fimana e na sha noukalele wopaKriste. Pashihopaenenwa, oilonga netumwalaka lilipi hali didilikifa mo ovashikuli vaJesus Kristus? Olyelye ta wilike oilonga yokuudifa mounyuni aushe nongahelipi? Omahepeko nosho yo omafininiko ohaa pe ovaudifi eemhito dilipi? Omhepo iyapuki ohai dana onghandangala ilipi ngeenge tashi uya poukalele wetu?
4. Ongahelipi hatu dulu okumona ouwa pauyadi eshi hatu konakona embo Yandja oundombwedi?
4 Opo mu mone ouwa pauyadi, otamu dulu okukonakona embo olo pEkonakono lOukwaneumbo weni ile lopaumwene. Mu li oukwaneumbo ile oohandimwe dilongeni kunghee tamu dulu okulongifa moukalele oilihongomwa oyo tamu lihongo membo olo. Onghee hano, eshi hatu konakoneni oshishangomwa osho shi tunhula, nashi tu linyengifeni tu udifeni nawanawa onghundana iwa kombinga yOuhamba waKalunga! — Oil. 28:23.