Otwa pumbwa elididimiko moukalele
1. Jehova okwa ulika ngahelipi kutya omulididimiki?
1 Kalunga oha ungaunga alushe novanhu nelididimiko. (Ex. 34:6; Eps. 106:41-45; 2 Pet. 3:9) Oshihopaenenwa shimwe sha tongomana osho tashi ulike kutya Jehova ohe lididimikile ovanhu omolwohole oshi na sha noilonga yokuudifa Ouhamba oyo tai longwa mounyuni aushe. Okwa kala ta ungaunga novanhu oule womido 2 000 lwaapo, nota twikile okunanena ovanamitimadiwa kuye. (Joh. 6:44) Ongahelipi hatu dulu okuhopaenena elididimiko laJehova ngeenge tu li moukalele?
2. Ongahelipi hatu dulu okuulika elididimiko ngeenge hatu longo moitukulwa yetu?
2 Ngeenge tu li moukalele weumbo neumbo: Ohatu hopaenene elididimiko laJehova ‘mokuhaefa’ okuudifila oohandimwe moitukulwa yetu ovo vehe na ohokwe natango. (Oil. 5:42) Otu na okukala hatu lididimikile ovo vehe na ko nasha netumwalaka letu, naavo tave tu sheke ile tave tu pataneke. (Mark. 13:12, 13) Ohatu ulike yo elididimiko mokukala hatu ningi eenghendabala tadi twikile tu tekele eembuto doshili odo twa kuna nokuli nonande haalushe hatu hange mo ovanhu momaumbo ovo va li va ulika ohokwe.
3. Omolwashike twa pumbwa elididimiko ngeenge hatu ningi omalishuneko nosho yo ngeenge hatu ningi omakonakonombibeli?
3 Ngeenge hatu ningi omakonakonombibeli: Ohashi pula elididimiko okufila oshisho oimeno, molwaashi itatu dulu okuulumika ekulo layo. (Jak. 5:7) Sha faafana, ekulo lopamhepo nalo ohali ningwa kanini nakanini nosho yo paendodo. (Mark. 4:28) Fimbo limwe ovanhu ovo hatu konakona navo otashi dulika va kale ve wete shidjuu okweefa po omahongo omalongelokalunga oipupulu ile eenghulunghedi odo dihe li metwokumwe nomishangwa. Onghee hano, katu na okuulumika nokufininika ovakonakonimbibeli vetu va ninge omalunduluko. Otwa pumbwa okuteelela nelididimiko omhepo yaKalunga i vyule omitima davo opo va ninge omalunduluko mokweendela ko kwefimbo. — 1 Kor. 3:6, 7.
4. Ongahelipi elididimiko tali dulu oku tu kwafela tu yandje oundombwedi nomupondo kovapambele vetu?
4 Ngeenge hatu ungaunga novapambele ovo vehe fi ovaitaveli: Nonande ohatu kala twa halelela ovapambele vetu ve lihonge oshili, otwa pumbwa okukonga nelididimiko eemhito tadi wapalele opo tu va pe oundombwedi nokatu na oku va ndubila ouyelele muhapu unene poshikando. (Omuud. 3:1, 7) Kakele kaasho, natu kale hatu yandje oundombwedi okupitila melihumbato letu, ashike otu na okukala twe lilongekida okupopila eitavelo letu, hatu shi ningi nefimaneko. (1 Pet. 3:1, 15) Osha yela kutya ngeenge otwa kala hatu ulike elididimiko shimha tu li moukalele, otashi ke tu kwafela tu pondole shihapu nohatu ka hafifa Tate yetu womeulu.