Oshimhungu shomapulo

◼ Ohatu dulu ngoo okwiilikana ngeenge hatu ningi ekonakonombibeli nomuneumbo monghalo keshe?

Oshi na omauwa mahapu okukala hatu hovele nokuxulifa ekonakonombibeli neilikano. Ohatu ilikana kuJehova e tu pe omhepo yaye iyapuki opo i tu wilike pefimbo leenghundafana. (Luk. 11:13) Eilikano ohali kwafele yo omukonakoni a mone kutya ekonakonombibeli ola kwata moiti notali mu hongo okwiilikana. (Luk. 6:40) Onghee hano, oshiwa okuhovela okukala ho ilikana pamwe nomunhu diva konima eshi mwa konakona naye Ombibeli oikando yonhumba. Ndele molwaashi omakonakonombibeli ohaa ningilwa momidingonoko nomeenghalo da yoolokafana, omukwatelikomesho oye a pumbwa okulongifa eendunge dokuyoolola a tale kutya onaini e na okwiilikana.

Oshinima shimwe sha fimana osho omunhu e na okutala kusho osho onhele opo ekonakono tali ningilwa. Owa pumbwa okukala ho hovele nokuxulifa ekonakonombibeli neilikano to shi ningi nelungi ngeenge oho konakona nomunhu ponhele opo hapa kala omapiyaano onhumba. Ndele ngeenge okwiilikanena ponhele oyo otaku ningifa ovatali va kale va tala kunye ile taku ningifa omukonakoni a kale a fya ohoni, otashi dulika shi kale shiwa okuhenuka okwiilikana pomhito oyo fiyo osheshi mwa mona onhele opo pehe na omapiyaano. Otu na okukala hatu longifa eendunge dokuyoolola tu tale kutya onaini tashi wapalele okwiilikana, kashi na nee mbudi kutya ekonakono otali ningilwa peni. — Tala Oukalele Wetu wOuhamba wOshiingilisha waMarsa 2005, epandja 4.