Oshimhungu shomapulo
◼ Olyelye e na okuyadeka okafooloma kokupula omakonakonombibeli ile oileshomwa, oko haka kala moileshomwa yetu ile kointaneta?
Luhapu moileshomwa yetu ohamu kala okafooloma oko haka yadekwa nohaka tuminwa koshitaimbelewa ngeenge omunhu a hala okukala ha talelwa po kEendombwedi daJehova ile okukala hatu tuminwa oileshomwa. Kakele kaasho, ovanhu ohava dulu okupula omakonakonombibeli okupitila ko-Web site yetu www.watchtower.org. Omafiloshisho aeshe oo otaa kwafele ovanhu vahapu ve lihonge oshili. Ndele oupyakadi owa ka holoka po ashike eshi ovaudifi navo hava longifa omafiloshisho oo nelalakano lokukwafela ovapambele vavo va kale hava tuminwa oileshomwa ile hava talelwa po kovaudifi vonhumba.
Oohandimwe vamwe ovo va kala hava tuminwa oileshomwa okudja koshitaimbelewa ohava tanguna kutya ehangano ohali va piyaaneke moku va tumina oileshomwa nonande inave i pula nomokutula omadina avo momusholondodo wokutuminwa oifo shihe li pahalo lavo. Ovaudifi ovo hava pulwa va ka talele po oohandimwe ovo moitukulwa yavo ohava shakeneke mo vamwe ovo tava tanguna kutya ova lulilwa. Onghee hano, omunhu oo e na ohokwe oye mwene e na okuyadeka okafooloma oko haka kala moileshomwa yetu ile okuyandja ouyelele waye ko-Web site yehangano, ndele omuudifi haye e na okuyadekela ko omunhu a tya ngaho. Ngeenge ehangano ola didilike kutya omuudifi wonhumba oye a yadeka okafooloma ile a yandja ouyelele waumwe ko-Web site yetu, itali ka ungaunga nomaindilo a tya ngaho.
Ndele mbela ongahelipi nee hatu dulu okuudifila omupambele ile omushiivikile wetu? Ngeenge owa hala a kale ha tuminwa oileshomwa, omolwashike ito kala ho mu tumine ove mwene? Ashike ngeenge ota ulike ohokwe nokwa hala umwe womEendombwedi a kale he mu talele po ndele ku shii nghee u na okukwatafana novakulunhuongalo vomeongalo lomoshitukulwa omo ha kala, ou na okuyadeka ofooloma yedina Please Follow Up (S-43), opo nee, i yandja kuhamushanga weongalo leni oo te ke i talulula noku i tumina koshitaimbelewa. (Eongalo keshe oli na okukala li na eefooloma odo da wana.) Ashike ngeenge omunhu oo a ulika ohokwe oku li modolongo, monhele yonhumba yokukwafela ovo va pikwa ile moshipangelo, ku na okupula oshitaimbelewa osho shi konge oo te ke mu talela po. Ponhele yaasho, ou na oku mu ladipika a kwatafane novamwatate ovo have uya okutalela po oohandimwe ovo ve li monhele oyo ile oye mwene a shangele koshitaimbelewa.