Kala ho yandje oundombwedi nondjungu ngeenge u li peenhele domalandifilo
1. Omolwashike tuhe na okusholola ngeenge ohatu mono shidjuu okuudifila peenhele domalandifilo?
1 Mbela oho mono shidjuu okuyandja oundombwedi ngeenge u li peenhele domalandifilo? Ngeenge osho, ino sholola, molwaashi omuyapostoli Paulus oo a li e na ondjungu moukalele noiha tila, naye okwa li a pumbwa okukala e “nouladi” opo a dule okuudifa. (1 Tes. 2:2) Ohatu ka kundafana moutendo tava landula kombinga yomalipulo amwe oo hatu kala tu na nosho yo omaetepo oo tae ke tu kwafela tu pondole.
2. Omolwashike tuhe na okukala hatu lipula unene kombinga yokukenyananeka ovanailonga?
2 Mbela ovanailonga otava ka kala va kenyanana ngeenge owe va udifile? Meengeshefa dihapu, ovanailonga ohava yakula ovanhu ve lili noku lili, onghee hano, itava ka kala ve wete hatu va piyaaneke. Efimbo limwe otashi dulika nokuli va ungaunge naave nefimaneko, molwaashi tava diladila kutya naave oumwe womovalandi. Kakele kaasho, ovanailonga otava ka ungaunga naave nefimaneko ngeenge owa djala nawa noto popi navo nombili nosho yo nohamu.
3. Ongahelipi hatu dulu okuhenuka okukenyananeka ovalandi?
3 Mbela ohandi ka dula ngoo okuninga etwalemo lange moipafi yovalandi vahapu? Ngeenge otashi dulika, kala ho i pefimbo opo eefitola inadi yada, ngaashi ngeenge opo va patulula. Ino faukila omukulunhu wofitola ile omulandifi pomhito opo e li novanhu vamwe. Etwalemo loye nali kale lixupi nawa.
4. Oshike hatu dulu okutya ngeenge hatu udifile meengeshefa?
4 Ohandi ka tya nee shike? Ngeenge mofitola omu na ovanailonga vahapu, inda tete u ka popye nomukulunhu wavakwao. Oto dulu okutya: “Otwe uya oku mu talela po peenhele deni doilonga, molwaashi ovanangeshefa ihatu va hange mo luhapu momaumbo. Ondi shii kutya owe lipyakidila noilonga paife, ndele onda hala tu kundafane ashike oule wokafimbo kaxupi.” Ndele opo tuha diladilife ovanhu kutya nafye ohatu landifa, luhapu oshixwepo tuha tumbule omayambidido pomhito oyo okuninga omunhu oye mwene a pula kutya oilonga yetu ohai yambididwa ngahelipi. Peemhito dimwe, oto dulu okupula epitikilo komukulunhu wofitola u kundafane novanailonga pauxupi she likolelela konghalo mongeshefa keshe. Kundafana navo to endulula osho wa popya nomukulunhu wofitola. Ngeenge ovanailonga otava monika va fa ve lipyakidila, etwalemo loye li ninga lixupi ndele to va fiile outraktate. Ngeenge onghalo itai shi pitike u popye novanailonga, pula ngeenge ito dulu okutula oileshomwa ponhele yonhumba vo ve ke i lileshele nale.
5. Omolwashike taku dulu okutiwa kutya ohatu dulu okuyandja oundombwedi peenhele domalandifilo nondjungu?
5 Jesus naPaulus ova li hava udifile nondjungu peenhele domalandifilo, onghee hano, naave oto dulu oku shi ninga. (Mat. 4:18-21; 9:9; Oil. 17:17) Indila kuJehova e ku pe omutima wa ngungumana nosho yo ouladi. (Oil. 4:29) Peenhele dihapu domalandifilo ito kala ino hanga po ovanhu, onghee hano, hetekela onghedi oyo yokuyandja oundombwedi hai pondola.