Okavidio kedina The Wonders of Creation Reveal God’s Glory
Ovanhu vahapu ohava kala va shambukwa ngeenge tava tale eshito. Ndele vamwe ohava dimbwa kutya eshito otali tu hololele shihapu kombinga yomadiladilo nomaliudo Omushiti wetu Munenenene. (Rom. 1:20) Nalenale, David okwa li e lihonga shihapu kombinga yaJehova okupitila mEendjovo daye. Ashike eshito ola li le mu kwafela yo e lihonge kombinga yaJehova nokweehena popepi naye. (Eps. 8:4, 5) Okavidio kedina Wonders of Creation Reveal God’s Glory oka longekidwa nelalakano loku tu kwafela atusheni, mwa kwatelwa ounona novakonakonimbibeli, tu konakone nawa oinima imwe meshito. Osho otashi ke tu kwafela tu shiive nawa omaukwatya aJehova e li Omushiti wetu Munenenene nohatu ka ehena popepi elela naye. Shimha wa mane okutala okavidio oko, kendabala u nyamukule omapulo taa landula:
(1) Ongahelipi ounene weshito nonghedi omo la unganekwa tai tu linyengifa tu kale tu na olupandu linene lokupandula Jehova? (Jes. 40:26) (2) Ngeenge otwa konakona nawa omeva, mbela otae tu hongo shike kombinga yOmushiti? (Eh. 14:7) (3) Ongahelipi ounene wedu noshinano shoshiyeleke osho shi li pokati kalo netango tai holola ounongo waJehova? (4) Mbela omwedi owa shitwa nelalakano lashike? (Eps. 89:38) (5) Ongahelipi Jehova a shita ovanhu monghedi oyo tai va etele ehafo? (6) O-DNA oshike? (Eps. 139:16) (7) Ongahelipi ovanhu va yooloka ko koishitwa yaJehova aishe yokombada yedu? (Gen. 1:26) (8) Oshike wa teelela nodjuulufi oku ka hafela mounyuni mupe?
Omapulo a wedwa po: (9) Omaluvala okwa dja peni? (10) Ongahelipi omeva haa dulu eenghono dedu eenghono nokulonda fiyo okoxulo yomiti? (11) Omeva ohaa dana onghandangala ilipi momalutu etu? (12) Tumbula epambafano olo li li pokati koinima i na omwenyo. (13) Oshike hashi kwafele oishitwa i pange oukaume naikwao? (14) Omutungilo woimeno hau ifanwa o-golden angle oshike, nou liwetikile mo ngahelipi meshito?
“Taleni” ile konakoneni nawa eshito laJehova: Jesus okwa li e tu ladipika a ti: ‘Taleni eedila dokeulu nokudidilika eenhemo domoixwa.’ (Mat. 6:26, 28) Ngeenge otwa ningi ngaho, ohatu ka kala tu na eitavelo nelineekelo la kola mOmushiti nohatu ka kala twa lenga Jehova omolwounongo waye, eenghono daye dokuxupifa nomolwohole yaye. Ponhele yokweefa tu piyaanekwe koilonga yomounyuni ou, natu kaleni hatu ningi eenghendabala nokulongifa efimbo mokukonakona eshito laJehova, nokudilonga kwaasho tali tu hongo kombinga yaKalunga ketu. — Eps. 19:2.