Oumaliwa vavali vongushu inini

Onghedi imwe ya fimana omo hatu dulu okuyambidida oinima yOuhamba omokuyambidida pashimaliwa oilonga yokuudifa mounyuni aushe. Ongahelipi ngeenge otu na oyuuyemo inini?

Jesus okwa li a mona pomhito imwe omufiyekadi ohepele ta tula oumaliwa vavali vongushu inini mokakefa komayambidido motembeli. Ohole yokuhola Jehova oya li ye linyengifa omufiyekadi oo a yandje ‘moluhepo laye ashishe eshi e kwete, emona laye alishe.’ (Mark. 12:41-44) Eshi Jesus a popya shi na sha nomufiyekadi oo, otashi ulike kutya omayambidido aye oku na ongushu inene momesho aKalunga. Sha faafana, Ovakriste vopefimbo lovayapostoli navo kava li va tala ko oshinakuwanifwa shokuyambidida oilonga yokuudifa shi li ashike oufembanghenda wOvakriste ovo ve na oyuuyemo ihapu. Omuyapostoli Paulus okwa li a popya shi na sha noshihopaenenwa shOvamakedonia kutya nonande ova li ‘moluhepo linene, ove va indila neenghono va pewe okukala pamwe navo meyakulo lovayapuki.’ — 2 Kor. 8:1-4.

Onghee hano, ngeenge ohatu dulu ashike okuyandja ‘oumaliwa vavali vongushu inini’, otu na okudimbuluka kutya shimha va tulwa kumwe otava ka eta po omuvalu muhapu. Okuyandja kwetu tashi di komutima ohaku hafifa Tate yetu womeulu oo ha yandje nehalo liwa, osheshi ‘Kalunga oku hole ou ta yandje nehafo.’ — 2 Kor. 9:7.