Amena eliudo loye
1. Oshoongalele shefiku le likalekelwa shomudo woilonga 2013 oshi na oshipalanyole shilipi, nosha nuninwa oku tu kwafela monghedi ilipi?
1 Efiku keshe, ohatu shakeneke eenghalo odo tadi tu ningifa tu nyone po eliudo letu. Nomolwaasho oshoongalele she likalekelwa shomudo woilonga 2013, oo tau hovele mo 1 Septemba 2012, shi na oshipalanyole “Amena eliudo loye.” (1 Tim. 1:19) Oshoongalele osho osha nuninwa okukwafela keshe umwe womufye a yandje elitulemo kunghee ha longifa oshali oyo ikumwifi ya dja kOmushiti wetu.
2. Omapulo a fimana elipi taa ka nyamukulwa poshoongalele?
2 Didilika oitwa ei: Oshoongalele osho otashi ka nyamukula omapulo aheyali a fimanenena e na sha neliudo:
• Oinima ilipi tai dulu okunyateka eliudo letu?
• Ongahelipi hatu dulu okudeula eliudo letu?
• Ongahelipi hatu dulu okuhenuka okukala netimba lohonde yovanhu?
• Okudiladila nosho yo okukatuka metwokumwe nomafinamhango Ombibeli otaku holola shike shi na sha nafye?
• Ongahelipi hatu dulu okuhenuka okuyahameka vamwe ngeenge tashi uya poinima oyo ya kwatela mo eliudo?
• Ovanyasha, ongahelipi tamu dulu okukala mwa pama ngeenge tamu yelekwa mu nyone?
• Ovo eliudo lavo hali wilikwa komhepo iyapuki ohava mono omanangeko noupuna elipi?
3. Ongahelipi hatu dulu okumona ouwa poshoongalele?
3 Kekwafo laJehova, ohatu dulu okukondjifa eenghendabala daSatana dokunyona po eliudo letu. Tate yetu womeulu omunahole ote tu lombwele okupitila mEendjovo daye nomehangano laye ta ti: “Apa ondjila, ei mu nokweenda nayo!” (Jes. 30:21) Oshoongalele osho oshi li onghedi imwe oyo Jehova ta longifa oku tu pa ewiliko la tya ngaho. Onghee hano, ninga omalongekido opo u ka kale po efiku alishe. Yandja elitulemo filufilu nokutala nghee to dulu okutula ouyelele oo moilonga pauhandimwe. Kaleni tamu popi kombinga yaasho sha kundafanwa poshoongalele mu li oukwaneumbo. Ngeenge otwa tula moilonga ehongo olo hatu pewa, otashi ke tu pameka opo tu twikile ‘okukala tu neliudo liwa’ noku tu kwafela tuha yulwe komalihafifo ounyuni waSatana. — 1 Pet. 3:16.