Tambuleni ko ovaenda
1. Oshiningwanima shilipi hashi tu pe omhito ya denga mbada yokuyandja oundombwedi, nomolwashike?
1 Efimbo lEdimbuluko ohali tu pe omhito iwa yokuyandja oundombwedi li dule omafimbo makwao. Diladila kwaashi: Omudo ou otwa teelela ovanhu ve dulife pomamiliyona 10 ve uye kEdimbuluko nove uye va ude kombinga yanghee ohole ya ulikwa meenghedi mbali da tongomona okupitila mekulilo. (Joh. 3:16; 15:13) Otave ke lihonga kombinga yomanangeko noupuna oo tava dulu okumona omolwoshali yaJehova. (Jes. 65:21-23) Didilika kutya omupopi haye aeke ta ka yandja oundombwedi poshiningwanima osho. Ovapwilikini navo otava ka kala ve na omhito yokuyandja oundombwedi udidilikwedi neenghono mokutambula ko ovaenda nohamu. — Rom. 15:7.
2. Ongahelipi hatu dulu okutambula ko ovaenda nohamu?
2 Ponhele yokukala omutumba wa mwena wa teelela okwoongala ku hovele, omolwashike ito hambelele nokulishiiva naavo ve li popepi naave? Otashi dulika ovaenda va kale va tila nokave shii kutya oshike tashi ka ningwa po. Ohamu yetu nosho yo oku va popifa monghedi youkaume hatu limemesha otaku ke va kwafela va kale va manguluka nove udite va tambulwa ko. Opo tu mone kutya omunhu okwe uya molwaashi a shivwa, ohatu dulu oku mu pula ngeenge osho oshikando shotete ta ongala nafye ile ngeenge oku shii mo umwe meongalo. Oto dulu okukala omutumba pamwe naye opo mu longife ko kOmbibeli nokeimbilo loye. Ngeenge Edimbuluko otali ningilwa mOlupale lOuhamba, oto dulu oku mu ulikila pauxupi oinima oyo i li mo. Nyamukula omapulo oo tashi dulika ta ka kala e na konima yoshipopiwa. Ngeenge eongalo leni oli na okudja mo diva mOlupale opo li yapukile likwao, oto dulu okutya: “Onda hala okuuda kutya oto ti ngahelipi shi na sha nokwoongala? Ongahelipi handi dulu oku ku mona?” Opo nee ninga elongikido uye ko kuye. Ovakulunhuongalo ove na okutwa omukumo ovaudifi inave lipyakidila vali ovo ve uya kEdimbuluko.
3. Omolwashike sha fimana okuninga eenghendabala dokuhambelela ovaenda pEdimbuluko?
3 Otashi ka kala oshikando shotete kovaenda vahapu okumona kutya oshiwana shaJehova osha hafa, shi na ombili nosha hangana omolwekwatafano lasho lopofingo naJehova. (Eps. 29:11; Jes. 11:6-9; 65:13, 14) Mbela ovaenda otava ka dimbuluka shike konima yEdimbuluko? Shihapu otashi ke likolelela kwaasho twa ninga opo tu va kwafele.