Elihumbato olo tali fimanekifa Kalunga

1. Omolwashike Eendombwedi daJehova hadi didilikwa mo ngeenge di li poyoongalele yoshitukulwa?

¹ Luhapu ngeenge tu li poshoongalele shoshitukulwa, ovanhu ohava mono noupu kutya otu li poshoongalele. Moilando ihapu omo hamu ningilwa oyoongalele, ovakalimo ohava shiivifilwa moikundaneki yomoshitukulwa efiku tashi ka kala ko. Luhapu meehotela nomeerestoulanda ohamu kala mu yadi ovanhu ovo ve uya koshoongalele, novanhu ohava didilike kutya moshitukulwa omu na ovaenda vahapu va djala oukalata voshoongalele. Apa otapa landula omadimbulukifo oo taa dulu oku tu kwafela tu fimanekife Kalunga okupitila melihumbato letu ngeenge tu li modoolopa omo tamu ningilwa oshoongalele. — 1 Pet. 2:12.

2. Ongahelipi hatu dulu okufimanekifa Kalunga nomidjalo detu ngeenge tu li modoolopa omo tamu ningilwa oshoongalele?

² Omidjalo di shii okufimanekwa: Okudjala kwetu monghedi yefimaneko ngeenge tu li poshoongalele luhapu ohaku kumu etaleko lovanhu li na sha nafye. Ndele onghedi yetu yokudjala peemhito dimwe ngaashi eshi hatu fiki peehotela, hatu li peerestoulanda, ile twa ya keefitola nosho tuu, oyo unene hai kumu etaleko lovanhu li na sha nafye. Nonande katu na okudjala oikutu yetu yokokwoongala peemhito da tya ngaho, osho hatu djala na shi kale sha wapala noshi shii okufimanekwa ndele haikutu yomeumbo. Ovanhu momundingonoko otava ka dula okumona eyooloko olo li li pokati ketu novanhu ovo vehe fi ovaitaveli. (Rom. 12:2) Kakele kaasho, otu na okudjala oukalata vetu voshoongalele, nokungaho ohatu ka shiva ovanhu koshoongalele notashi ke tu pa omhito yokuyandja oundombwedi, nEendombwedi dikwetu otadi ke tu didilika mo.

3. Ongahelipi hatu dulu okuulika elididimiko nosho yo eenghedi diwa?

³ Elididimiko nosho yo eenghedi diwa: Mounyuni omu ovanhu vahapu ve lihole vo vene novehe shii kupandula, itashi ka kala tuu shiwa ngeenge otwa ungaunga nelididimiko novayakuli vomeehotela nomeerestoulanda nokuulika eenghedi diwa! (2 Tim. 3:1-5) Ngeenge hatu umbulile vamwe oipundi ile ngeenge tu li momukweyo opo tu pewe oileshomwa oyo ya pita poshoongalele, katu na okukonga ouwa wetu vene, ndele natu konge ouwa wavakwetu. (1 Kor. 10:23, 24) Omulumenhu umwe oo a li e na ohokwe konima eshi a li poshoongalele oshikando shaye shotete, okwa ti: “Itandi dimbuluka nande oshipopiwa shimwe shomoipopiwa oyo ya yandjwa efiku olo, ndele elihumbato lEendombwedi ola li la kuma nge neenghono.”

4. Omolwashike tu na okuliyamba poshoongalele ngeenge eenghalo detu otadi shi pitike?

⁴ Ovo va hala okuliyamba: Omhepo yeliyambo oukwatya oo hau didilikifa mo Ovakriste vashili. (Eps. 110:3) Mbela ito dulu okuliyamba opo u kwafele poshoongalele? Poshoongalele shimwe, ovamwatate novamwameme 600 ova li ve liyamba opo va wapaleke onhele yoshoongalele manga inashi hovela. Ovanailonga voponhele opo ova ti: “Eshi oshinima shikumwifi osho inatu mona nande onale! Kasha li shipu okudiladila kutya ovanhu aveshe ovo ovaliyambi.” Paife otwa teelela nodjuulufi oshoongalele shoshitukulwa shomo 2013 nomhito oyo hatu ka mona kai fi ashike yokupwilikina nokuhongwa kuKalunga, ndele noku mu fimanekifa yo.

[Oshimhungu shi li pepandja 3-6]

Omadimbulukifo e na sha noshoongalele shoshitukulwa shomo 2013

◼ Efimbo lomutumba: Omivelo otadi ka patuluka po 7:00 yongula. Omusika oyo hai tetekele omutumba otai ka hovela po 9:00 wongula omafiku aeshe atatu. Ngeenge oya tameke, atusheni otu na okukala omutumba opo oshoongalele shi hovele monghedi i shii okufimanekwa. Eimbilo neilikano laxuuninwa olo tali ka dimbula omutumba wEtitano nOlomakaya otali ka shiivifwa po 4:30 komatango nomOshoondaxa opo 3:15 komatango.

◼ Eenhele dokupaakinga: Poyoongalele aishe, ovanhu otava ka paakinga eehauto oshali, notaku ka paakingwa palandulafano. Ovanhu otava ladipikwa va longife oshihauto shimwe apa tashi shiiva molwaashi eenhele dokupaakinga ohadi kala alushe dinini.

◼ Eenhele dokunangala: Ovaudifi ovo va hala okuninga eindilo leenhele dokunangala ove na okuyadeka ofoloma yedina Special Needs Room Request (CO-5). Okomitiye yOilonga yEongalo oi na okushilipaleka ngeenge omuudifi okwa wana ngoo okupewa onhele yokukala, tai landula omifindalandu odo di li mofooloma nosho yo odo di li monhumwafo yo 14 Desemba 2010, oyo ya li ya shangelwa olutu lovakulunhuongalo. Ovaudifi ovo tava dulu okukongelwa eenhele ovovo ashike ve na edina liwa meongalo nosho yo ovo ve na ounona ve na elihumbato liwa.

◼ Okuumbulila vamwe oipundi: Oipundi otai dulu ashike okuumbulilwa ovo tamu ende navo mohauto ile hamu di navo meumbo limwe nosho yo ovo ho konakona navo Ombibeli. — 1 Kor. 13:5.

◼ Omusha: Oto indilwa u etelele omusha woye opo uha fiye po onhele yoshoongalele u ka lande oikulya pefimbo lomusha. Oto dulu okulongifa okandjato kanini kokutalaleka oikulya, oko taka dulu okutulwa koshi yoshipundi. Eendjato dinene domaukwaneumbo dokutalaleka oikulya odi na okutulwa opo to ulikilwa kovayakuli. Oikwatelwa yoikwamakende nosho yo oikunwa yoalkoholi inai pitikilwa mo monhele yoshoongalele.

◼ Omayambidido: Ohatu dulu okuulika olupandu letu omolwomalongekido oshoongalele mokuyandja omayambidido nehalo liwa e na sha noilonga yomounyuni aushe poshoongalele. Ngeenge owa hala okuyambidida notyeke, ou na okushanga ko “Christian Congregation of Jehovah’s Witnesses of Namibia.” Kakele koimaliwa keemuma neetyeke, poyoongalele imwe otapa dulu yo okuyandjwa omayambidido taku longifwa oukalata vo-debit ile credit.

◼ Oiponga nosho yo ekwafo lopaulumomhumbwe: Ngeenge opa holoka onghalo oyo tai pula omunhu a pewe ouhaku meendelelo poshoongalele, ninga ekwatafano nomuyakuli oo e li popepi naave, oo ta ka shiivifila diva oshikondo shEkwafo lOtete opo ovo tava longo moshikondo osho va konakone kutya onghalo oyo oya kwata moiti shi fike peni nokuyandja ekwafo.

◼ Omiti: Ngeenge oho nu omiti odo wa shangelwa kundokotola, alikana etelela da wana molwaashi itadi ka kala po opo hapa pewa ovanhu omakwafo opaulumomhumbwe. Eevenda odo da longifwa kwaavo ve na oudu woshuuka odi li oyeekelwashi ya nyika oshiponga nomolwaasho kadi na okutulwa momandoloma oimbodi ponhele yoshoongalele ile peehotela.

◼ Eenghaku: Omudo keshe poshoongalele ohapa holoka oiponga ihapu oyo hai etifwa keenghaku. Oshiwa okulanda eenghaku tadi wapalele, odo omunhu to wana mo nawa, odo tadi ke ku kwafela uhe limonife oshiponga ngeenge to ende keetalapa nosho yo peenhele di lili noku lili.

◼ Outemba vounona: Outemba vokulonga ounona okweenda kave na okweetwa monhele yoshoongalele. Ashike outemba vounona vokukala omutumba va mangelwa mo otava dulu okulongifwa nokukala polwaamba lovadali.

◼ Omaadi okulishasha: Oyoongalele yoshitukulwa ihapu ohai ningilwa meenhele dihe na omhepo ya wana omo hamu longifwa ashike omashina okupepela omhepo. Onghee hano, otashi ka kala shiwa okuhalongifa omaadi okulishasha oo e na edimba li na eenghono, olo tali dulu okuninga nai ovo ve na oupyakadi wokufuda ile omaupyakadi amwe. — 1 Kor. 10:24.

◼ Ofooloma yokulandula ovanhu ovo ve na ohokwe: Ofooloma yedina Please Follow Up (S-43) otai dulu okulongifwa opo ku yandjwe ouyelele u na sha novanhu ovo va ulika ohokwe eshi va pewa oundombwedi wohangelela pefimbo loshoongalele. Eefoloma odo da yadifwa otadi dulu okuyandjwa konduda yomambo ile kuhamushanga weongalo leni ngeenge mwa shuna komaongalo.

◼ Eerestoulanda: Natu fimanekifeni edina laJehova okupitila melihumbato letu liwa ngeenge tu li keerestoulanda. Otu na okudjala monghedi oyo tai wapalele Ovakriste. Oshi li onghedindjikilile okuyandja olupandu lokamaliwa keepresenda 10 fiyo 15, she likolela keyakulo.

◼ Oilonga yeliyambo: Keshe oo a hala okukufa ombinga moilonga yeliyambo poshoongalele oku na okuya kOshikondo shOilonga yEliyambo. Ovanyasha ovo ve li meni lomido 16 navo otava dulu okukwafela poshoongalele tava longo mepashukilo lovadali ile lovatekuli vavo ile lovakulunhu vamwe ngeenge ova pewa epitikilo kuumwe womovadali.