Oolyelye tava ka kala ve na ohokwe moshikundafanwa eshi?
1. Ngeenge hatu lesha oifo yetu yOshungonangelo no-Awake! oshike tu na okutala kusho, nomolwashike?
1 Oshungonangelo no-Awake! oya longekidilwa ovanhu aveshe mounyuni. Onghee hano, oifo oyo oi na oitukulwa ya kundafana oinima i lili noku lili. Eshi hatu lesha oshitukulwa keshe paumwene, natu tale kutya oolyelye kondadalunde tashi dulika va ka kale ve na ohokwe musho nokulitulila po elalakano lokushiyandja kovanhu voludi olo.
2. Oikundafanwa ilipi hai kala moifo yetu oyo tashi dulika i kale ihokwifa unene kovanhu vamwe?
2 Mbela Oshungonangelo oyo opo ya piti oya kundafana oshikundafanwa shonhumba shopaMbibeli osho mwa li tamu popi kombinga yasho nomunailonga mukweni? Mbela ope na oshitukulwa shi na sha nonghalamwenyo youkwaneumbo osho tashi dulu okukwafela omupambele woye? Mbela ou shii umwe oo a hala a ka talele po konhele oyo ya li ya pita mo-Awake!? Mbela ope na oshifo shetu shimwe osho tashi dulu okunana ohokwe yomahangano opangeshefa ile epangelo moshitukulwa sheni? Pashihopaenenwa, oshifo osho sha kundafana kombinga yomashongo oo a taalela ovanamido otashi dulika shinane ohokwe yovanhu ovo ve li momaumbo ovakulupe. Omahangano oo haa shilipaleke kutya ovanhu otava dulika komhango otashi dulika a kale e na ohokwe moshifo osho tashi popi kombinga yekaulonyanga.
3. Hokolola oshimoniwa osho tashi ulike ongushu yokuyandja oifo kovanhu ovo tu wete kutya otashi dulika va kale ve na ohokwe muyo.
3 Oidjemo: Konima eshi ovalihomboli vamwe vEendombwedi daJehova moSouth Africa va mona oshifo sho-Awake! yaOktoba 2011 shi na oshipalanyole “How to Raise Responsible Children,” (Nghee to dulu okutekula ounona ve na eenghedi) ova li va tokola opo va dengele keefikola 25 domoshitukulwa sheongalo lavo. Eefikola 22 oda li da tambula oifo noku i tukulila ovanafikola vado. Ovalihomboli vamwe vali vomoshilongo osho tuu osho ova li va ninga sha faafana mokuyandja oifo keefikola domoshitukulwa shavo. Ovahongi vopofikola imwe yomeefikola odo ova li va tokola va longife oifo oyo pefimbo leetundi. Ovalihomboli ovo ova li va hokololela omupashukilishikandjo oimoniwa yavo, nomupashukilishikandjo okwa li a ladipika omaongalo omoshikandjo shaye a yandje oifo keefikola domoitukulwa yao. Oshitaimbelewa osha li sha yakula eembestelinga dihapu doifo ya wedwa po nopa li pe na okupilindululwa imwe.
4. Omolwashike twa hala okuyandja oifo kovanhu vahapu ngaashi tashi dulika?
4 Oifo yetu ohai kundafana eityo lashili loiningwanima yokunena nohai yandje elitulemo kOmbibeli nosho yo kOuhamba waKalunga. Oyo aike oifo kombada yedu tai “udifa ekulilo,” ile tu tye etumwalaka lexupifo. (Jes. 52:7) Onghee hano, otwa hala oku i yandja kovanhu vahapu ngaashi tashi dulika. Onghedi iwa yoku i yandja omokulipula kutya, ‘Oolyelye tava ka kala ve na ohokwe moshikundafanwa eshi?’