Natu hopaeneneni ovaprofeti — Joel
1. Ongahelipi hatu dulu okuhopaenena elininipiko laJoel ngeenge hatu udifa?
1 Olyelye a li omuprofeti Joel? Joel okwa popya kutya okwa li omonamati ‘waPetuel.’ (Joel 1:1) Omuprofeti oo omulininipiki okwa li a popya nouladi kombinga yetumwalaka laJehova, ndele hakombinga yonghandangala oyo ta dana e li omutumwa. Sha faafana, ponhele yokulikongela efimano ngeenge tu li moukalele, natu kale hatu yukifa elitulemo kuJehova nokOmbibeli. (1 Kor. 9:16; 2 Kor. 3:5) Kakele kaasho, ohatu pamekwa ketumwalaka olo hatu udifa. Oitukulwa ilipi yexunganeko laJoel tai dulu oku tu kwafela tu kale tu na ouladi neetelelo kunena?
2. Eshi efiku laJehova la ehena popepi neenghono, oli na oku tu linyengifa tu ninge shike?
2 ‘Efiku lOmwene oli li popepi.’ (Joel 1:15): Nonande eendjovo odo oda shangwa eedula omayovi da pita, paife otu li pewanifo lado laxuuninwa. Eenghalo dounyuni odo tadi ende tadi naipala neenghono, ovo vehe na ohokwe novasheki ovo hatu shakeneke moukalele otava ulike filufilu kutya omafiku axuuninwa onghalelo yoinima youkolokoshi okwa hovela. (2 Tim. 3:1-5; 2 Pet. 3:3, 4) Eshi tu wete exulilo la ehena popepi neenghono, otu na omatomheno okukala twa pitifa komesho oukalele monghalamwenyo yetu. — 2 Pet. 3:11, 12.
3. Omolwashike oukalele u li oshinima sha fimana eshi oudjuu munene tau ehene popepi?
3 “Omwene Oye ehondameno loshiwana shaye.” (Joel 3:16): Ekakamo olo la popiwa movelishe oyo otali dulu ashike okuyukifwa kehanauno laJehova poudjuu munene. Otashi hekeleke eshi tu shii kutya Jehova ota ka xupifa ovapiya vaye ovadiinini pefimbo olo. (Eh. 7:9, 14) Eshi hatu kufa ombinga moilonga yokuudifa nokumona nghee Jehova te tu yambidida noku tu pa eenghono, ohatu ka kala tu na eitavelo la kola nelididimiko olo tali ke tu kwafela poudjuu munene oo twa taalela.
4. Omolwashike tu na okunyakukwa nokutaalela onakwiiwa tu na omukumo?
4 Nonande ovanhu vamwe ova ti kutya etumwalaka laJoel ola popya oinima itilifi, ola pa ovapiya vaKalunga eteelelo likumwifi lexupifo. (Joel 2:32) Onghee hano, natu taaleleni onakwiiwa tu na omukumo nouladi wokuudifa onghundana iwa yOuhamba waKalunga eshi hatu dulika keendjovo daJoel 2:23 odo tadi ti: “Nyakukweni, nye mu kuwilile mOmwene Kalunga keni.”