Nghee u na okulilongekida omatwalemo taa pondola
1. Omolwashike sha fimana okukala tu na etwalemo liwa?
1 Ngaashi ashike okumakela kashona oikulya i na omulyo haku ningifa omunhu a kale a teelela nodjuulufi okulya oikulya oyo, etwalemo liwa ohali twala meenghundafana diwa dopamishangwa. Omatwalemo taa pondola otashi dulika a kale a yoolokafana moule noshikalimo, ndele ngaashi oikulya yomulyo muwa, omatwalemo okwa pumbwa okudiladilwa nokulongekidwa komesho yefimbo. (Omayel. 15:28) Oshike hashi ningifa etwalemo tali pondola?
2. Ongahelipi hatu dulu okulilongekida etwalemo lihokwifa?
2 Hoolola etwalemo lihokwifa: Etwalemo letu otashi dulika li pendule ohokwe ile li xulife po eenghundafana nomuneumbo. Onghee hano, ngeenge to lilongekida, diladila kombinga yoinima oyo ovanhu vomoshitukulwa ve na ohokwe muyo. Mbela ovanhu vomoshitukulwa sheni ova hala epangelo liwa, onghalamwenyo youkwaneumbo ihafifa ile okuxulifwa po kwoita? Ovanhu paulelalela ove hole okupopya kombinga yomadiladilo avo, onghee hano, longekida omapulo oo taa ningifa omunhu a popye etaleko laye. Mbela ito dulu okulongifa oshihopaenenwa shimwe shomomatwalemo oo e li mokafo Oukalele Wetu wOuhamba noku shi hetekela moshitukulwa sheni? Omolwashike ihamu liendifa po pomatwalemo omafimbo amwe pElongelokalunga lOukwaneumbo weni?
3. Ongahelipi hatu dulu okuninga omatwalemo a yukila keputuko nokonakudiwa yovanhu vomoshitukulwa shetu?
3 Diladila keputuko nonakudiwa: Moitukulwa imwe, otwa teelelwa tu fikile hatu popi osho she tu endifa. Ofimbo moitukulwa ikwao, ohashi ulike okuhe na efimaneko ngeenge omweenda ina pula sha kombinga yonghalonawa yomuneumbo noku mu lombwela sha kombinga youyelele wonhumba wopaumwene. Moitukulwa imwe, ovanhu ngeenge ove na omalongelokalunga ohatu dulu okupopya kombinga yOmbibeli metwalemo letu. (Oil. 2:14-17) Ashike moitukulwa omo muhe na omalongelokalunga opaKriste, ile muhe na sha omalongelokalunga, otashi ka kala shiwa okupopya shi na sha nOmbibeli eshi to ningi elishuneko, ponhele yoku shi ninga petalelepo lotete. — Oil. 17:22-31.
4. Oshike tu na okuninga shi na sha neendjovo dopehovelo detwalemo letu?
4 Eendjovo dopehovelo: Lilongekida noukeka eendjovo dopehovelo. Luhapu ohashi kala shiwa okulongifa omatumbulo axupi noku li paunafangwa. Onghedi omo hatu popi eendjovo detu dopehovelo oya fimanenena yo. Popya nexwamo. Kala to limemesha monghedi oyo tai ulike kutya ou na ko nasha nomuneumbo. Ngeenge otwa landula omaetepo oo, otashi ke tu kwafela tu longekide omatwalemo taa hokwifa oo tae ke linyengifa ovanhu moshitukulwa shetu va lye “koshililo shOmwene.”—1 Kor. 10:21.