Auguste otau ka kala omwedi wopandjokonona womalipyakidilo!

1. Oshikonga she likalekelwa shilipi tashi ka ningwa mounyuni aushe eshi Ouhamba waKalunga u li pokuwanifa omido 100?

¹ Eshi Ouhamba waKalunga u li pokuwanifa omido 100, itashi ka kala tuu shiwa okufimaneka Jehova okupitila moshikonga she likalekelwa! MuAuguste, ohatu ka kufa ombinga moshikonga shokuyandja okafo kape mounyuni aushe ke na oshipalanyole, Openi hatu dulu okuhanga omanyamukulo omapulo oo a fimanenena monghalamwenyo? Okafo oko otaka ladipike ovaleshi va konge omanyamukulo mOmbibeli notaka yelifa nghee o-jw.org tai dulu oku va kwafela.

2. Ongahelipi hatu dulu okukufa ombinga ‘mokuhambelela Jehova twa nyakukwa pombada’ muAuguste?

² Hambelela Jehova wa nyakukwa pombada: Opo ovaudifi va kwafelwe va tamunune mo oukalele wavo, opa longekidwa efiloshisho le likalekelwa la keshe oo a hala okukufa oukwafelikokolindjila muAuguste. Momwedi oo, ovaudifi va ninginifwa otava dulu okukufa oukwafelikokolindjila weevili 30. Molwaashi Auguste oku na Omatitano, Omalomakaya nOyoondaxa itano, ovaudifi vahapu ovo hava i koilonga yokulikongela omboloto ile kofikola mokati koshivike otava ka dula okukufa oukwafelikokolindjila. Ngeenge ou na omukonakonimbibeli ta ningi exumokomesho ile okaana koye oko ka hala okuninga omuudifi, shi shiivifila diva omuunganeki wolutu lovakulunhuongalo. Itashi ka kala tuu etwomukumo ngeenge oohandimwe va tya ngaho ove tu waimine ve li ovaudifi momwedi oo udidilikwedi! Nonande ovakokolindjila vondjikilile vahapu ove hole okukufa efudo muAuguste shimha va wanifa po eevili davo dokomudo, otava dulu okuninga po omalunduluko opo va ka kufe ombinga pauyadi moshikonga osho she likalekelwa. Omaukwaneumbo okwa pumbwa okukundafana fimbo kuyele nghee taa ka kufa ombinga ‘mokuhambelela Jehova a nyakukwa pombada’ muAuguste. — Esra 3:11; Omayel. 15:22.

3. Otu na elineekelo lilipi li na sha noshikonga she likalekelwa?

³ Nonande otashi dulika twa li twa kufa ombinga moshikonga sha yukila oko monakudiwa, otwe lineekela kutya eshi otashi ka kala shopandjokonona. Natu kendabaleni tu hange oshitwa shopombada sheevili, shovaudifi nosho yo shovakwafelikokolindjila momwedi oo waAuguste. Eshi hatu fiki pexulilo lomudo woilonga 2014, otwa hala Jehova a nangeke noupuna eenghendabala doshiwana shaye mounyuni aushe opo Auguste u kale omwedi omo mwa yandjwa oundombwedi munenenene kuhe na vali! — Mat. 24:14.