Omido efele Ouhamba tau udifwa!
1. Ovapiya vaJehova okwa li va ladipikwa va ninge shike mefelemudo lwaapo la pita?
1 “Tala, Ohamba otai pangele! Nye ovakalele vayo voku shi shiivifa. Hano udifeni, udifeni, udifeni Ohamba nouhamba wayo.” Neendjovo odo ditunhula da popiwa komumwatate Rutherford hanga oule wefelemudo la pita, oshiwana shaJehova osha li sha ladipikwa shi tandavelife etumwalaka lOuhamba keshe pamwe. Naasho osho twa li twa ninga. Ngaashi Ovakriste votete, nafye ohatu udifa onghundana iwa yOuhamba ‘kovashitwa aveshe vokoshi yeulu.’ (Kol. 1:23) Okutala mefelemudo la dja ko, oshike twa ninga po opo tu udife Ouhamba waKalunga? Ongahelipi hatu dulu okutwikila oku u udifa eshi tau wanifa omido 100 okudja eshi wa dikwa po?
2. Ongahelipi oileshomwa yetu ya kala tai xumifa komesho Ouhamba waKalunga?
2 Okutala konakudiwa: Omido omilongo da pita, oileshomwa yetu oya kala tai yambidida Ouhamba waKalunga. Ndele okudja mo 1939 oshifo shetu osho sha fimanenena osha hovela okukala shi na oshipalanyole: Oshungonangelo tai shiivifa Ouhamba waJehova. Oshifo osho ohashi popi alushe kombinga yOuhamba naasho tau ka wanifa po. Oshifo sho-Awake! nasho osha divilika Ouhamba waKalunga kutya oo auke tau pe ovanhu eteelelo. Inashi yukila ko tuu eshi oifo ei ivali paife hai tolokwa unene nokutandavelekwa mounyuni aushe!—Eh. 14:6.
3. Eenghedi dimwe dilipi odo twa kala hatu longifa opo tu udife Ouhamba?
3 Oshiwana shaJehova ohashi longifa eenghedi di lili noku lili opo shi udife Ouhamba. Nale, otwa li hatu longifa omambako e li moihauto, eeradio neengalamafona. Eenghedi odo ode tu kwafela tu tandaveleke onghundana iwa kovapwilikini vahapu pefimbo opo eshi ovaudifi vOuhamba va li vanini. (Eps. 19:5) Omido opo da di ko, otwa nyanyangida ouyelele ko-jw.org, nokungaho ohatu udifa Ouhamba kovanhu omamiliyona, mwa kwatelwa naavo ve li moilongo omo oilonga yetu yokuudifa ya shilikwa.
4. Ohatu kufa ombinga meenghedi de likalekelwa dilipi?
4 Oshiwana shaJehova ohashi kufa yo ombinga meenghedi de likalekelwa dokuudifa etumwalaka lOuhamba. Pashihopaenenwa, okutameka mo 1990, otwa ninga eenghendabala tu tamunune mo oilonga yetu yeumbo neumbo mokuudifila meenhele dokufuwila, meepaakinga nopeengeshefa. Kunena, otwa unganeka onghedi ye likalekelwa yokuyandja oundombwedi meenhele daaveshe mounyuni aushe moilando ya kula oyo ye lipyakidila. Kakele kaasho, omaongalo mahapu ohaa kufa ombinga mokuudifila meenhele daaveshe moitukulwa yao taa longifa outemba noitaafula yoileshomwa oyo hai dikwa peenhele opo hapa ende ovanhu vahapu kolupadi. Oshoshili kutya otu na okukaleka po oilonga yetu yeumbo neumbo oyo ya fimanenena. — Oil. 20:20.
5. Eemhito dilipi omudo mupe woilonga tau ka pa vahapu vomufye?
5 Okutala konahiya: Okuhovela momudo woilonga muSeptemba, ovanhu vahapu otava ka hovela okuninga ovakokolindjila vondjikilile. Mbela ito dulu oku va waimina? Ngeenge hasho, mbela ito dulu okukufa oukwafelikokolindjila efimbo nefimbo? Kutya nee oto dulu okuninga omukokolindjila ile hasho, Jehova ota ka nangekanoupuna omaliyambo oye oo to ningi opo u kufe ombinga pauyadi mokuudifa Ouhamba. — Mal. 3:10.
6. Omolwashike omwedi waOktoba 2014 tau ka kala omwedi we likalekelwa?
6 Omwedi waOktoba 2014 Ouhamba otau ka wanifa omido efele okudja eshi wa dikwa po. Osha yeleka eshi Oshungonangelo yomoukalele omwedi oo tai ka yandja elitulemo kOuhamba waKalunga. Omolwashike ito ningi eenghendabala opo u yandje oifo ei kuvahapu ngaashi tashi dulika? Eshi hatu tale konakwiiwa, keshe umwe na twikile ‘okuudifa evangeli lOuhamba waKalunga’ kukeshe oo ta pwilikine. — Oil. 8:12.