Kwafela ovapofi ve lihonge kombinga yaJehova
1. Ongahelipi Jesus a li a ulikila ovapofi olukeno?
1 Okwa li ku na ashike omafiku manini Jesus a ka dipawe. Omanga a li ta di muJeriko, ovapofi vavali ovaeheli ova li tava ingida mokule tava ti: “Omwene,. . . tu fila onghenda!” Nonande Jesus okwa li ta diladila kombinga yomayeleko madjuu oo a li ta ka shakeneka, okwa li a kanghama nokwiifana ovalumenhu ovo noku va velula. (Mat. 20:29-34) Ongahelipi hatu dulu okushikula oshihopaenenwa shaJesus shokukenukila ovapofi?
2. Ongahelipi hatu dulu okuudifila omupofi oo tashi dulika tu shakeneke meenhele daaveshe?
2 Kala ho kwafele: Ngeenge owa shakeneke omupofi, kutya nee omeenhele daaveshe, popya kutya oove lyelye noku mu pa ekwafo olo a pumbwa. Molwaashi ovapofi luhapu ohava ungaungwa navo nai, otashi dulika a kale a angala petameko. Ndele ngeenge owe mu ulikile oukaume nokuulika kutya ou na ko nasha naye shili, ota ka kala a manguluka. Kaleka yo momadiladilo kutya oupofi owa yoolokafana, naasho otashi ka ufa kutya okwa pumbwa ekwafo li fike peni. Shimha we mu kwafele, oto dulu oku mu lombwela kutya oto kufa ombinga moilonga yokuhonga Ombibeli. Mu pula u mu leshele omushangwa, ngaashi Epsalme 146:8 ile Jesaja 35:5, 6. Ngeenge oha lesha eendada doshipofi, mu pula ngeenge okwa hala oshishangomwa meendada doshipofi osho tashi ke mu kwafela e lihonge shihapu kombinga yOmbibeli. Oto dulu yo oku mu kwafela a tape oungalo ko-jw.org. Ngeenge okombiyuta yaye oya unganekwa monghedi omo hai dulu okulesha osho shi li ko-screen, ota ka hafela unene oitukulwa oyo i li ko-jw.org nosho yo oishangomwa oyo hai dulu okutapwa molupe lo-RTF (Rich Text Format). — “Tala oshimhungu “Ngeenge to kwafele omupofi . . . ”
3. Ongahelipi hatu dulu okukonga mo ovapofi moshitukulwa shetu?
3 Okukonga mo ovapofi: Ngeenge hatu longo eumbo neumbo ihatu shakeneke naanaa ovapofi molwaashi vahapu vomuvo ihava kala va manguluka okupopya novanhu vehe va shii ovo have uya momaumbo avo. Onghee hano, otashi pula eenghendabala da mana mo tu ‘pule’ ile tu konge mo ovanhu va tya ngaho opo tu va udifile. (Mat. 10:11) Mbela ou na omunailonga pamwe naave ile omunafikola mukweni oo e li omupofi? Kendabala u popye naye. Ngeenge moshitukulwa sheni omu na ofikola yovapofi, oto dulu okutwala oishangomwa yeendada doshipofi kongulumambo yofikola oyo. Mbela ou shii omunhu umwe oo e na omupofi moukwaneumbo waye? Mbela moshitukulwa sheni omu na omahangano oo haa yandje omakwafo kovapofi ile e va pa eenhele dokukala? Yelifila oshilyo shoukwaneumbo, omuyakuli ile omupashukili wehangano kutya Eendombwedi daJehova oda halelela okukwafela ovapofi, noku mu twaalela oshileshomwa sheendada doshipofi ile oungalo va kwatwa. Mu ulikila eudaneko lOmbibeli olo kutya Kalunga mafiku ota ka xulifa po oupofi fiyo alushe. Oto dulu yo oku mu ulikila okavidio ko-jw.org ke na oshipalanyole “Without It, I Would Feel Lost,” oko ka hokolola oshimoniwa shomulumenhu omupofi oo a mona ouwa mokukala e na Ombibeli meendada doshipofi. Ngeenge owa yelifa nawa elalakano letalele po loye, oshi na oupu u ka pewe epitikilo u ka popye novapofi vovene.
4. Oilihongomwa ilipi hatu lihongo moshimoniwa shaJanet?
4 Omumwameme omupofi wedina Janet okwa li a ka talela po onhele yovapofi. Okwa li a hovela eenghundafana nomukainhu omunyasha omupofi. Janet okwa lombwela omukainhu oo a ti, “Jesus okwa li a velula ovapofi opo a ulike osho ta ka ningila ovapofi aveshe.” Ova kundafana Ehololo 21:3, 4, naJanet okwa yelifa nghee Ouhamba waKalunga tau ka wanifa po eudaneko olo. Omukainhu okwa mwena po ndele ta ti: “Inandi shi uda nande onale komupofi mukwetu. Ovanhu vahapu ova itavela kutya ovapofi ihava mono ko molwaashi ve na osho va ninga ile ooxekulululwa.” Janet okwa li a tumina omukainhu oo okakwatakanifi kopaintaneta oko ta ke mu twala kembo Ombibeli otai hongo, nopaife ohava konakona Ombibeli pamwe luvali moshivike.
5. Nonande itatu dulu okuvelula ovapofi ngaashi Jesus, omanangeko noupuna elipi hatu ka mona ngeenge otwa ulike kutya otu na ko nasha navo?
5 Oshoshili kutya itatu dulu okuvelula ovapofi ngaashi Jesus, ashike ohatu dulu okukwafela aveshe ovo omadiladilo avo a twikifwa kukalunga kefimbo longhalelo ei yoinima, mwa kwatelwa ovo va twika palutu opo va udeko oshili yEendjovo daKalunga. (2 Kor. 4:4) Jesus okwa li a velula ovalumenhu vavali ovapofi popepi naJeriko molwaashi okwa li e “va uditile olukeno.” (Mat. 20:34) Ngaashi Jesus, ngeenge otwa kala tu na ko nasha novapofi, ohatu ka hafela oufembanghenda wokukwafela vamwe ve lihonge kombinga yaJehova, oo ta ka xulifa po oupofi fiyo alushe.