Xwepopaleka ounghulungu woye moukalele, mokuudifila meenhele domalandifilo

Omolwashike sha fimana: Molwaashi ovanhu vahapu ohava kala koilonga efimbo lihapu, onghedi ya denga mbada hatu dulu oku va udifila etumwalaka lOuhamba omo ku va udifila ashike koilonga. Okuudifila meenhele domalandifilo otaku dulu okukala ku hafifa notaku pondola molwaashi kape na oo ta ti kandi mo meumbo novanailonga ohave lihumbatele nawa ovo tava monika va fa ovalandi. Opo ovaudifi va pondole, ove na okulongifa eendunge dokuyoolola nokukala hava djala nokuliwapeka monghedi tai wapalele. (2 Kor. 6:3) Onghee hano, omupashukili woilonga oku na okutala kutya eenhele domalandifilo otadi ka longwa koolyelye nonghee di na okulongwa.

Nghee to dulu oku shi ninga:

Lilongekida etwalemo li li pauxupi. Ngeenge otwa kundafana nomunailonga efimbo lihapu, otashi dulika tuha ka pitikwe vali tu popye naye monakwiiwa.
Konga efimbo u talele po eengeshefa pefimbo opo inadi lipyakidila unene, ngaashi ngeenge opo da patuluka.
Kendabala okupopya tete nomukulunhu woilonga. Kala u na ohamu noto ulike oukaume. Oto dulu okutya: “Ohatu talele po ovanhu pauxupi peenhele davo doilonga molwaashi ihatu va hange mo momaumbo.” Ninga etwalemo pauxupi noku mu pa okafo, oshifo ile oshileshomwa keshe osho u na. Opo tuha talike ko tuli ovalandifi, otashi ka kala pandunge tuha pule omayambidido okuninga shapo ovanhu ovo ve tu pula.
Ngeenge omukulunhu woilonga omunambili, mu pula epitikilo u popye pauxupi novanailonga. Peenhele domalandifilo dimwe, oto dulu okupula ngeenge oto dulu okufiya oishangomwa imwe monhele omo ovanailonga hava lile ile hava ombo.
Longifa eendunge dokuyoolola nokukala ho tifuka. Pashihopaenenwa, ngeenge omunailonga ota popi nomulandi ile e lipyakidila, teelela a mane.

Kendabala okuninga ngaha momukokomoko womwedi:

Pelongelokalunga lOukwaneumbo weni tali landula, otamu dulu okuninga etwalemo li li pauxupi olo tamu ka longifa ngeenge otamu ka udifila keenhele domangeshefelo.