Longifa embo Ombibeli otai hongo nomupondo

Omukonakonimbibeli ota ka kula nokwiimika oiimati yopamhepo ngeenge okwa shiiva osho Ombibeli tai hongo lela nokutula moilonga osho te lihongo. (Eps. 1:1-3) Ohatu ka kwafela omukonakoni a ninge exumokomesho mokulongifa oitukulwa imwe yembo Ombibeli otai hongo.

Omapulo opehovelo: Pehovelo letukulwa keshe ope na omapulo oo a nyamukulwa moshitukulwa. Oto dulu okupula omapulo oo opo a kale taa ingaana momadiladilo omukonakoni eshi tamu kundafana etukulwa olo. Ile oto dulu okupula omukonakoni a tye sha kepulo keshe. Ino pumbwa oku mu pukulula pomhito oyo ngeenge ina nyamukula mondjila. Enyamukulo laye otali ku kwafele u mone oshitwa osho wa pumbwa okuyandja elitulemo nokudivilika. — Omayel. 16:23; 18:13.

Oshiwedelwako: Ngeenge omukonakoni okuudite ko nawa eshi tamu konakona etukulwa, oto dulu oku mu ladipika a leshe ye mwene oshiwedelwako osho shi na sha nouyelele oo. Pekonakonombibeli tali landula, oto dulu okulongifa efimbo linini u shilipaleka ngeenge oku shi udite ko. Onghee hano, omukonakoni ota ka mona mo ouwa moshiwedelwako ngeenge omwe shi kundafana naye. Otamu dulu okulesha outendo ndele to mu pula omapulo oo we lilongekida.

Okamhungu keendululo: Okamhungu keendululo oko ke li pexulilo letukulwa keshe, oke na omanyamukulo omapulo oo e li pehovelo letukulwa. Onghee hano, oto dulu oku ka longifa opo u mone kutya omukonakoni woye oku udite ko eshi ta yelifa oitwa oyo ya fimanenena kuye mwene. Lesheni pamwe oshitwa keshe nomishangwa. Pula omukonakoni a longife omishangwa opo a yelife kutya omolwashike oshitwa osho shi li mondjila. — Oil. 17:2, 3.