Natu hopaeneneni ovaprofeti — Habakuk
1. Omolwashike tashi dulika tu kale tu udite ngaashi omuprofeti Habakuk?
1 Eshi oukolokoshi tau ende nokuhapupala, otashi dulika tu kale tu udite ngaashi Habakuk oo a li a pula Jehova a ti: “Oshike Ove ho talifa nge osho inashi yuka, ndele ndi na okutala eshunduko?” (Hab. 1:3; 2 Tim. 3:1, 13) Ngeenge otwa dilonga ketumwalaka laHabakuk nokoshihopaenenwa shaye sheitavelo, otashi ke tu kwafela tu lididimike eshi twa teelela efiku laJehova letokolo. — 2 Pet. 3:7.
2. Ongahelipi kunena hatu dulu okuulika kutya otu na eitavelo?
2 Okwa kala e na eitavelo: Habakuk okwa kala oupafi nokwa kala e lipyakidila pamhepo ponhele yokweefa a wililwe po keenghalo dii. (Hab. 2:1) Jehova okwa li a shilipaleka omuprofeti oo kutya Eendjovo daye otadi ka wanifwa pefimbo nosho yo kutya ‘omuyuki ota ka kala e nomwenyo keitavelo laye.’ (Hab. 2:2-4) Osho otashi ti shike kOvakriste ovo ve li pexulilo elela lomafiku axuuninwa? Osha fimanenena okukala twa tomhwa kutya exulilo otali uya ponhele yokukala hatu lipula kutya onaini tali uya. Eitavelo otali ke tu linyengifa tu kale oupafi pamhepo notu pitife komesho oukalele. — Heb. 10:38, 39.
3. Omolwashike twa pumbwa okukaleka po ehafo letu eshi hatu longele Jehova?
3 Hafela muJehova: Eitavelo letu otali ka yelekwa eshi Gog yaMagog ta ka ponokela oshiwana shaKalunga. (Hes. 38:2, 10-12) Eenhamanana ohadi eta omaudjuu, nokuli nokwaavo tava ka findana lwaxuuninwa. Otashi dulika tu ka kale tuhe na oikulya ya wana ile tu ka kanife oiniwe yetu ihapu ndele onghalonawa yovanhu tai naipala. Ohatu ke linyenga ngahelipi ngeenge omaupyakadi okwa holoka? Nonande Habakuk okwa li a teelela eenghalo didjuu, okwa kala a tokola toko okukaleka po ehafo laye eshi ta longele Jehova. (Hab. 3:16-19) “Ehafo mOmwene” otali ke tu kwafela yo tu lididimikile omaudjuu omonakwiiwa. — Neh. 8:10; Heb. 12:2.
4. Ehafo lilipi hatu dulu okukala tu na paife nosho yo monakwiiwa?
4 Ovanhu ovo tava ka xupifwa kuJehova mefiku letokolo otava ka twikila okulihonga kombinga yeendjila daye, mwa kwatelwa novanyumunwa. (Hab. 2:14) Onghee hano, natu longifeni omhito keshe tu popye kombinga yaJehova nosho yo oilonga yaye ikumwifi. — Eps. 34:2; 71:17.