Oshikonga she likalekelwa shokuhovela omakonakonombiibeli muSeptemba

MuSeptemba, ohatu ka longa noudiinini tu hovele omakonakonombiibeli, hatu longifa okambo Nghee to dulu okuhafela onghalamwenyo fiyo alushe! Ovaudifi otava dulu okukufa oukwafelikokolindjila tava longo eevili 30. Oshikonga osho she likalekelwa otashi ka longwa ngahelipi?

• Petalelepo lotete: Longifa oshipeko shokonima yokambo, opo u kwafele omunhu a kale e na ohokwe, ndele to mu ulikile nghee ekonakonombiibeli hali ningwa. Kaleka yo momadiladilo ovo va li va ulika ohokwe, mwa kwatelwa omalishuneko. Nonande kava li va tambula ko ekonakonombiibeli nale, otashi dulika va kale ve na ohokwe monghedi yetu ipe yokukonakona nosho yo mokambo. Oumbo inava pumbwa okufiwa pomaumbo opo pehe na ovanhu, ile va tumwe neenhumwafo kovanhu ovo va li inava ulika ohokwe. Okomitiye yoilonga yeongalo otashi dulika i ninge omalongekido e na sha nokwoongala kwa wedwa po momukokomoko womwedi oo.

• Eemhito dimwe vali: Ngeenge eongalo leni ohali longifa outemba voileshomwa, ulika okambo Nghee to dulu okuhafela onghalamwenyo fiyo alushe! Lombwela ovo va ulika ohokwe kutya ngeenge ova ku fa po okambo otava dulu yo okumona eenghundafana dopaMbiibeli doshali. Ulika nghee ekonakonombiibeli hali ningwa pefimbo opo, ile u ninge omalongekido u ke shi ninge lwanima. Omupashukili woilonga otashi dulika a longekide ovaudifi ovo va pyokoka va ka hovele omakonakonombiibeli keenhele domangeshefelo. Oto dulu yo okuninga omakonakonombiibeli novanailonga pamwe naave, ile novanhu ovo wa li wa shakeneka eshi wa li to yandje oundombwedi wohangelela.

Jesus okwe tu lombwela tu ka ‘ninge ovanhu ovahongwa noku va honga.’ (Mat 28:19, 20) Oshikonga eshi she likalekelwa nashi tu kwafele tu wanife po oshilonga osho, hatu longifa okambo Nghee to dulu okuhafela onghalamwenyo fiyo alushe!