Nghee hatu dulu okukwafela, ngeenge pa holoka oiponga

Oiponga yopaushitwe otai hapupala neenghono kunena. Ngeenge pa holoka oshiponga, ope na okuningwa eenghendabala, opo ku unganekwe ku yandjwe oikwafa. Onghee Olutuwiliki ola ninga omalongekido, opo moshitaimbelewa keshe mu kale Oshikondo shOkuyandja Oikwafa.

Ngeenge opa holoka oshiponga, ovamwatate ovo ve li moshikondo osho ohava kwatafana diva novakulunhuongalo vomoshitukulwa, opo va mone kutya ekwafo lilipi ovaudifi va pumbwa. Ngeenge oshiponga osha kula neenghono, novaudifi itava dulu okulikwafela vo vene, oshitaimbelewa otashi ka tuma ovamwatate ovo va pyokoka va kwatele komesho oilonga yokuyandja oikwafa. Ovamwatate ovo otashi dulika va pule ovaliyambi, ile va pule omayambidido oinima yonhumba kondadalude, ile tashi dulika va lande oinima moshitukulwa noku i tukula.

Ohashi eta omauwa mahapu, ngeenge oinima tai unganekwa monghedi ya tya ngaho. Ohashi kwafele mokuhaendulula oilonga oyo ya longwa nale, okuhangwangwana nosho yo okuhahepifa oimaliwa noilongifo. Ashike osho otashi dulu okuholoka po, ngeenge ovamwatate ova katuka eenghatu kuvo vene.

Ovamwatate ovo va nangekwa po koshitaimbelewa otava dulu okutokola kutya otava ka longifa oimaliwa i fike peni, nonokutya ovaliyambi vangapi va pumbiwa moilonga yokuyandja oikwafa. Otava dulu yo okulongela kumwe novanambelewa vomoshitukulwa, ovo tava dulu oku tu kwafela, opo tu endelele po oilonga yetu. Onghee oohandimwe inava kendabala okuyandja oikwafa, ile oku i tuma nokuya koshitukulwa osho sha hangwa koshiponga, shapo ongeenge va pulwa ve shi ninge.

Ashike ngeenge pa holoka oshiponga ohatu kala twa hala okukwafela. (Heb 13:16) Otu hole ovamwatate! Mbela oshike hatu dulu okuninga? Eshi sha fimanenena, ohatu dulu okwiilikanena ovo va hangwa koiponga nosho yo ovo tava yandje oikwafa. Ohatu dulu yo okuyandja omayambidido okupitila moilonga yomounyuni aushe. Koshi yewiliko lOlutuwiliki, oitaimbelewa oi shii kutya omayambidido oo openi a pumbwa okulongifwa unene. Onghee ngeenge otwa hala okukufa ombinga, ohatu dulu oku shi ulika mokuyadeka ofoloma yo-Local Design/Construction Volunteer (DC-50).

TALENI OKAVIDIO EFUNDJA LINENE OLO LA LI LA DENGA BRAZIL, NDELE TAMU NYAMUKULA EPULO TALI SHIKULA:

Oshike she ku kumwifa eshi wa mona nghee Eendombwedi daJehova da yandja oikwafa konima yefundja olo la li moBrazil mo 2020?