Omapulo A Dja Kovaleshi

Jesus okwa li a hala okutya shike, eshi a ti: “Inamu diladila kutya onde uya okweeta ombili”?

Jesus okwa honga ovanhu va kale ve na ombili navakwao. Ashike pomhito imwe, okwa li a lombwela ovayapostoli vaye a ti: “Inamu diladila kutya onde uya okweeta ombili kombada yedu; inandi uya okweeta ombili, ndele eongamukonda. Osheshi onde uya okweeta etukauko; omulumenhu ota pataneke xe, omonakadona ota pataneke ina, noshitenya shomukainhu otashi pataneke inamweno.” (Mat. 10:34, 35) Jesus okwa li a hala okutya shike?

Jesus ka li a hala okutukula oilyo yomaukwaneumbo, ashike okwa li e shii kutya omahongo aye otaa ka eta etukauko momaukwaneumbo amwe. Onghee hano, ovo va hala okuninga ovahongwa vaKristus nokuninginifwa, ova pumbwa okushiiva kutya omafimbo amwe oilyo yomaukwaneumbo avo itai ka hafela etokolo lavo. Ngeenge va taalela omashongo okudilila kookaume kopahombo, ovo vehe fi Eendombwedi, ile kuvamwe vali moukwaneumbo, otashi dulu oku shi ningifa shidjuu kuvo okukala ovadiinini komahongo aKristus.

Ombiibeli oya ladipika Ovakriste va “kale nombili novanhu aveshe.” (Rom. 12:18) Ashike omahongo aJesus otaa dulu okukala ngaashi “eongamukonda” komaukwaneumbo amwe. Osho ohashi ningwa ngeenge oshilyo shimwe shoukwaneumbo sha tambula ko omahongo aJesus, ofimbo oilyo ikwao inai a tambula ko, ile tai a pataneke. Monghalo ya tya ngaho, ovaneumbo vaao te lihongo oshili ohava ningi ‘ovatondi’ vaye. — Mat. 10:36.

Omukainhu omunyasha ta ende a manguluka, eshi ta fiye po ina oo ta ningi omaudi note mu indile a aluke. Omukainhu omunyasha e kwete embo “Nghee to dulu okuhafela onghalamwenyo fiyo alushe!”

Ovashikuli vaKristus, ovo ve li momaukwaneumbo a tukauka palongelokalunga, omafimbo amwe ohava kala va taalela eenghalo odo tadi yeleke ohole yavo yokuhola Jehova naJesus. Pashihopaenenwa, ovapambele ovo vehe fi Eendombwedi, otashi dulika va kendabale oku va fininika va dane omafiku omafudo opalongelokalunga. Ngeenge ova yelekwa, olyelye tava ka hafifa? Jesus okwa ti: “Keshe ou e hole unene xe ile ina komesho yange, ina wapalela nge.” (Mat. 10:37) Oshoshili kutya, Jesus ka li ta ti kutya opo ovahongwa vaye va kale ve mu wapalela kave na okukala ve hole ovadali vavo. Ndele ponhele yaasho, okwa li te va hongo osho ve na okupifa komesho monghalamwenyo. Ngeenge oilyo youkwaneumbo, oyo ihe fi Eendombwedi, otai tu pataneke eshi hatu longele Jehova, otu na okutwikila okukala tu i hole, ashike otu na okukala tu hole tete Kalunga komesho yaaishe.

Omapataneko oo haa dilile momaukwaneumbo otaa dulu oku tu nyemateka neenghono. Ashike ovahongwa vaJesus ove na okukaleka momadiladilo eendjovo daye, odo tadi ti: “Ou ita kufa omuti waye womahepeko, ndele ta shikula nge, ina wapalela nge.” (Mat. 10:38) Oku shi popya noitya imwe, Ovakriste ova tala ko omapataneko omomaukwaneumbo e li oshitukulwa shomahepeko, oo ovashikuli vaKristus ve na okulididimikila. Pefimbo opo tuu opo, ohava kala ve na elineekelo kutya elihumbato lavo liwa otali ke linyengifa ovapambele ovo vehe fi Eendombwedi ve lialuluke nova tambule ko etumwalaka lOmbiibeli. — 1 Pet. 3:1, 2.