Mbela Jehova ota ka nyamukula ngoo omailikano ange?

1-2. Omolwashike tashi dulika tu kale tu udite kutya Jehova ita nyamukula omailikano etu?

OMBIIBELI oya ti: ‘Hafela Omwene, ndele Ye te ku pe, eshi sha wapalela omutima woye.’ (Eps. 37:4) Olo kali fi tuu eudaneko litunhula! Ndele mbela otu na okuteelela Jehova e tu pe diva keshe osho hatu mu pula? Omolwashike tu na okulipula epulo olo? Natu ka taleni koihopaenenwa tai shikula. Omumwameme ina hombolwa okwa ilikana, opo a dule okuya kOfikola yOvaudifi vOuhamba. Ashike opa pita eedula donhumba noka li a shivwa natango. Omumwatate omunyasha okwa pula Jehova e mu velule komukifi wa kwata moiti, opo a dule okulonga shihapu meongalo. Ndele oukolele waye kawa li wa xwepopala. Ovadali Ovakriste ova ilikana, opo okaana kavo ka kale moshili. Ashike okaana kavo oka li ka tokola okweefa po okulongela Jehova.

² Naave otashi dulika wa pula Jehova oshinima shonhumba, ndele ine shi ku pa. Oshidjemo, otashi dulika u fike pexulifodiladilo kutya Jehova oha nyamukula ashike omailikano avamwe, ndele iha nyamukula oye. Ile otashi dulika u diladile kutya owa ninga sha sha puka. Omumwameme wedina Janiceb naye osho a li e udite ngaho. Ye nomushamane waye ova li va ilikana, molwaashi ova li va halelela oku ka longa kObetel. Okwa ti: “Onda li nda tomhwa kutya ohatu ka ya diva kObetel.” Opa pita omido dihapu, ndele ovalihomboli ovo kava li va shivwa natango. Janice okwa ti: “Onda li nda handuka nonda lyalyakana. Onda li handi lipula ngeenge onda ninga sha osho sha udifa nai Jehova. Onda ilikana kondadalunde shi na sha nokuya kObetel. Omolwashike Jehova ina nyamukula eilikano lange?”

3. Oshike hatu ka kundafana moshitukulwa eshi?

³ Omafimbo amwe, otashi dulika tu lipule ngeenge Jehova oha pwilikine ngoo komailikano etu. Ovalumenhu vamwe ovadiinini ovo va li ko efimbo lonale, navo ova li ve lipula oshinima sha faafana. (Job 30:20; Eps. 22:2; Hab. 1:2) Oshike tashi dulu oku ku tomha kutya Jehova ota ka pwilikina komailikano oye? (Eps. 65:2) Opo tu mone enyamukulo kepulo olo, natu ka nyamukuleni tete omapulo taa shikula: (1) Otwa teelela Jehova a ninge shike? (2) Jehova okwa teelela tu ninge shike? (3) Omolwashike twa pumbwa okwiilikana kombinga yoshinima shimwe shi lili?

OTWA TEELELA JEHOVA A NINGE SHIKE?

4. Metwokumwe naJeremia 29:​12, Jehova okwa udaneka okuninga shike?

⁴ Jehova okwa udaneka okupwilikina komailikano etu. (Lesha Jeremia 29:12.) Kalunga ketu oku hole ovalongeli vaye ovadiinini. Onghee ota ka yandja alushe elitulemo komailikano avo. (Eps. 10:17; 37:28) Ashike osho inashi hala okutya ote ke tu pa ashishe osho hatu mu pula. Otashi dulika tu na okuteelela fiyo osheshi ounyuni mupe we uya, opo tu ka pewe oinima imwe oyo twa pula.

5. Jehova oha kaleke shike momadiladilo, ngeenge ta pwilikine komailikano etu? Shi yelifa.

⁵ Jehova oha kaleke momadiladilo elalakano laye, ngeenge ta nyamukula omailikano etu. (Jes. 55:​8, 9) Oshitukulwa shimwe shelalakano laye, oshosho kutya okwa hala kombada yedu ku kale ovanhu, ovo hava dulika kuye nehalo liwa, e li Omupangeli wavo. Ashike Satana okwa popya kutya ovanhu otava dulu okupondola mokulipangela vo vene. (Gen. 3:​1-5) Opo Jehova a ulike kutya odo tadi popiwa kOndiaboli odanakalindi, okwa efa ovanhu ve lipangele vo vene. Ndele okupangela kwovanhu okwa etifa omaupyakadi mahapu oo twa taalela kunena. (Omuud. 8:9) Otu shi shii kutya Jehova ita ka kufa po omaupyakadi aeshe oo paife. Ngeenge ngeno okwa ningi ngaho, vamwe otashi dulika va fike pexulifodiladilo kutya ovanhu otava dulu okupondola mokulipangela notava dulu okuxulifa po omaupyakadi avo.

6. Omolwashike twa pumbwa okukala twa tomhwa kutya Jehova ota ka ninga alushe osho shi li pahole nosha yuka?

⁶ Jehova otashi dulika a nyamukule omailikano a faafana meenghedi da yoolokafana. Pashihopaenenwa, eshi ohamba Hiskia ya li tai ehama neenghono, oya li ya ilikana Jehova e i kwafele i veluke. Jehova okwa li e i velula. (2 Eeh. 20:​1-6) Mepingafano naasho, eshi omuyapostoli Paulus a li a lilila Jehova e mu kufe “ekiya mombelela,” tashi dulika ounghundi wopalutu, Jehova ka li a kufa po oupyakadi oo. (2 Kor. 12:​7-9) Diladila koshihopaenenwa shomuyapostoli Jakob nosho yo Petrus. Ohamba Herodes oya li ya hala oku va dipaa aveshe. Eongalo ola li la ilikanena Petrus nosho yo tashi dulika Jakob. Ashike Jakob okwa li a dipawa, ofimbo Petrus a li a xupifwa pashikumwifilonga. (Oil. 12:​1-11) Otashi dulika tu lipule kutya, ‘Omolwashike Jehova a li a xupifa Petrus, ndele ina xupifa Jakob?’ Ombiibeli inai popya shi na sha naasho.c Ohatu dulu okukala noushili kutya Jehova ke na ‘owadi,’ ile tu tye, iha tokola shihe li pauyuki. (Deut. 32:4) Otu shi shii kutya Petrus naJakob aveshe ova li va hokiwa kuJehova. (Eh. 21:14) Omafimbo amwe, otashi dulika Jehova a nyamukule omailikano etu monghedi oyo twa li inatu teelela. Ndele molwaashi otwa tomhwa kutya Jehova oha ningi alushe osho shi li pahole nosha yuka, itatu ka ngongota shi na sha nonghedi omo Jehova a hoolola okunyamukula omailikano etu. — Job 33:13.

7. Oshike tu na okuhenuka, nomolwashike?

⁷ Otu na okukendabala okuhenuka okuyelekanifa onghalo yetu naayo yavamwe. Pashihopaenenwa, otashi dulika tu pule Jehova e tu kwafele monghedi yonhumba kondadalunde, ndele inatu pewa osho twa pula meilikano. Lwanima, otwa uda kutya umwe okwa ilikana kombinga yoshinima sha faafana, na Jehova okwa nyamukula eilikano laye. Omumwameme wedina Anna oku na oshimoniwa sha tya ngaho. Okwa ilikana opo omushamane waye, Matthew, a veluke kokankela. Pefimbo opo tuu opo, ovamwameme ovanamido vavali ova li yo navo tava kondjo nokankela. Anna okwa ilikanena Matthew nosho yo ovamwameme ovo a mana mo. Ovamwameme ova veluka, ndele Matthew okwa fya. Potete, Anna okwe lipula ngeenge ovamwameme ovo, eshi va veluka omolwaashi Jehova a ya mo olunyala. Ngeenge osho, omolwashike ina nyamukula eilikano laye, opo omushamane waye a tye po xwepo? Oshoshili kutya katu shi shii kutya osha enda ngahelipi, opo ovamwameme ovo va veluke. Ndele osho tu shii oshosho kutya Jehova ota ka xulifa po okumona oixuna akushe nokwa djuulukwa oku ka nyumuna ookaume kaye ovo va fya. — Job 14:15.

8. (a) Metwokumwe naJesaja 43:​2, Jehova ohe tu yambidida ngahelipi? (b) Eilikano ohali tu kwafele ngahelipi, ngeenge twa taalela omayeleko a kwata moiti? (Tala okavidio Eilikano ohali tu kwafele tu lididimike.)

⁸ Jehova ote ke tu yambidida alushe. E li Tate yetu omunahole, Jehova ina hala tu mone oixuna. (Jes. 63:9) Ashike ihe tu amene komayeleko aeshe oo taa dulu okufaafanifwa nomilonga, ile nomundilo. (Lesha Jesaja 43:2.) Ndele okwe tu udanekela kutya ote ke tu kwafela tu ‘pite’ muo. Ita efa omayeleko e tu etele omaupyakadi taa kalelele. Jehova okwe tu pa yo omhepo yaye iyapuki i na eenghono i tu kwafele tu lididimike. (Luk. 11:13; Fil. 4:13) Oshidjemo, ohatu dulu okukala nelineekelo kutya ohatu ka kala alushe tu na osho twa pumbwa, opo tu lididimike notu kale ovadiinini kuye.d

JEHOVA OKWA TEELELA TU NINGE SHIKE?

9. Metwokumwe naJakob 1:​6, 7, omolwashike twa pumbwa okukala twe lineekela kutya Jehova ote ke tu kwafela?

⁹ Jehova okwa teelela tu kale twe mu lineekela. (Heb. 11:6) Omafimbo amwe, otashi dulika tu kale tu udite twa wililwa po komaupyakadi etu. Otashi dulika nokuli tu hovele okukala twa limbililwa ngeenge Jehova ote ke tu kwafela ngoo. Ashike Ombiibeli otai tu shilipaleke kutya keenghono daKalunga ohatu dulu ‘okunhuka engholo.’ (Eps. 18:29) Onghee hano, ponhele yokweefa omalimbililo a hapupale, otu na okwiilikana tu na eitavelo filufilu notu na elineekelo kutya Jehova ota ka nyamukula omailikano etu. — Lesha Jakob 1:​6, 7.

10. Yandja oshihopaenenwa shi na sha neenghendabala odo tu na okuninga konima eshi twa ilikana Jehova e tu kwafele.

¹⁰ Jehova okwa teelela tu katuke metwokumwe nomailikano etu. Pashihopaenenwa, omumwatate otashi dulika a pule Jehova e mu kwafele a pewe efudo koilonga, opo a dule okukala poshoongalele shoshitukulwa. Ongahelipi tashi dulika Jehova a nyamukule eilikano olo? Otashi dulika a pe omumwatate ouladi oo a pumbwa, opo a ka popye nomuyandji waye woilonga. Ndele omumwatate natango okwa pumbwa okuya komuyandji waye woilonga noku mu pula, tashi dulika a pumbwa oku shi ninga lwoikando. Otashi dulika nokuli a pule omunailonga mukwao a longe ko ponhele yaye. Nongeenge osha pumbiwa, ota dulu okupula aha futwe mefiku olo ita longo.

11. Omolwashike tu na okwiilikana lwoikando kombinga yaasho hatu lipula nasho?

¹¹ Jehova okwa teelela tu ilikane lwoikando kombinga yaasho hatu lipula nasho. (1 Tes. 5:17) Jesus okwa ulika kutya oinima imwe oyo hatu pula otashi dulika tuhe i pewe pefimbo opo. (Luk. 11:9) Onghee inatu sholola. Natu ilikaneni twa mana mo nolwoikando. (Luk. 18:​1-7) Ngeenge otwa twikile okwiilikana kombinga yoshinima shonhumba, ohatu ulikile Jehova kutya otwa halelela osho hatu indile. Ohatu ulike yo kutya otu na eitavelo kutya ota dulu oku tu kwafela.

OMOLWASHIKE TWA PUMBWA OKWIILIKANA KOMBINGA YOSHINIMA SHIMWE SHI LILI?

12. (a) Epulo limwe lilipi tu na okulipula li na sha naasho hatu pula meilikano, nomolwashike? (b) Ongahelipi hatu dulu okukala noushili kutya omailikano etu otaa ulike kutya otwa fimaneka Jehova? (Tala oshimhungu “Mbela oinima oyo handi pula meilikano otai ulike ngoo kutya onda fimaneka Jehova?”)

¹² Ngeenge inatu pewa oshinima osho twa pula meilikano, otashi dulika tu lipule omapulo aa atatu. Lotete ololo kutya, ‘Mbela ohandi ilikana ngoo kombinga yoshinima sha yuka?’ Luhapu, ohatu diladila kutya otu shii osho sha denga mbada kufye. Ndele oinima oyo hatu pula otashi dulika ihe tu etele ouwa mokweendela ko kwefimbo. Ngeenge ohatu ilikana kombinga youpyakadi wonhumba, otashi dulika pe na ekandulepo loupyakadi oo li li xwepo li dulife olo twa pula. Oinima imwe oyo hatu pula otashi dulika ihe li metwokumwe nehalo laJehova. (1 Joh. 5:14) Pashihopaenenwa, diladila koshihopaenenwa shovadali ovo va tumbulwa metetekelo. Ova pula Jehova meilikano, opo a shilipaleke kutya okaana kavo ota ka twikile oku mu longela. Eilikano la tya ngaho otashi dulika tali monika la yuka. Ashike Jehova iha fininike nande oumwe womufye e mu longele. Okwa hala atusheni, mwa kwatelwa ounona vetu, tu hoolole oku mu longela. (Deut. 10:​12, 13; 30:​19, 20) Onghee ovadali ovo ova li ve na okupula Jehova e va kwafele va hange omutima wokaana kavo, opo ke linyengifwe ka kale ke hole Jehova noka ninge kaume kaYe. — Omayel. 22:6; Ef. 6:4.

13. Metwokumwe nOvaheberi 4:​16, Jehova ote ke tu kwafela naini? Shi yelifa.

¹³ Epulo etivali ololo kutya, ‘Mbela efimbo ngoo laJehova okunyamukula eilikano lange?’ Otashi dulika tu kale tu udite kutya otwa pumbwa enyamukulo lomeendelelo komailikano etu. Ashike Jehova oku shii efimbo la denga mbada loku tu kwafela. (Lesha Ovaheberi 4:16.) Ngeenge inatu pewa pefimbo opo osho twa pula, otashi dulika tu diladile kutya Jehova ina nyamukula eilikano letu. Ndele otashi dulika halo efimbo laJehova loku tu nyamukula. Pashihopaenenwa, diladila kombinga yomumwatate omunyasha oo a ilikana a velulwe koudu waye. Ngeenge Jehova okwe mu velula pashikumwifilonga, Satana ota dulu okutya omumwatate oo ota twikile ashike okulongela Jehova, molwaashi okwa velulwa. (Job 1:​9-11; 2:4) Shikwao vali, Jehova okwa tula po nale efimbo olo, eshi ta ka velula aveshe ovo tava vele. (Jes. 33:24; Eh. 21:​3, 4) Fiyo opapa, inatu teelela Jehova e tu velule pashikumwifilonga. Onghee hano, omumwatate okwa li ta dulu okupula Jehova e mu pe eenghono nosho yo ombili yopamadiladilo e lididimikile ouyahame waye noku twikile okulongela Kalunga noudiinini. — Eps. 29:11.

14. Oshike to lihongo moshimoniwa shaJanice?

¹⁴ Diladila kombinga yoshimoniwa shaJanice, oo a li a ilikana shi na sha noku ka longa kObetel. Konima yeedula nhano, okwa li a didilika kutya Jehova okwa nyamukula eilikano laye, ndele omonghedi i lili oyo a li ina teelela. Okwa ti: “Jehova okwa longifa efimbo olo a honge nge oinima ihapu nokwa kwafela nge ndi ninge Omukriste e li xwepo. Onda li nda pumbwa okukulika elineekelo lange muye. Onda li yo nda pumbwa okuxwepopaleka onghedi yange yokuninga ekonakono lopaumwene. Onda li nda pumbwa okumona ehafo lokomutima olo inali likolelela keenghalo dange.” Lwanima, Janice nomushamane waye ova ka pulwa va longe moilonga youpashukilishikandjo. Okutala konakudiwa, Janice okwa ti: “Jehova okwa li a nyamukula omailikano ange, ndele hamonghedi oyo nda li nda teelela. Osha pula nge efimbo, opo ndi ude ko kutya enyamukulo olo Jehova a pa nge ola denga mbada. Onda pandula neenghono, eshi nda mona omhito yokumona ohole nolukeno laye.”

15. Omolwashike inatu pumbwa okupopya oinima kondadalunde omafimbo amwe momailikano etu? (Tala yo omafano.)

¹⁵ Epulo etitatu ololo kutya, ‘Mbela itandi dulu okwiilikana kombinga yoshinima shimwe shi lili?’ Oshiwa okwiilikana hatu tumbula oinima kondadalunde. Ndele omafimbo amwe, oshi li xwepo tuha tumbule oinima kondadalunde, opo tu dule okumona kutya Kalunga okwe tu halela shike. Diladila koshihopaenenwa shomumwameme ina hombolwa oo a li a ilikana shi na sha nokuya kOfikola yOvaudifi vOuhamba. Okwa li a hala okuya kofikola oyo, opo a dule oku ka longa oko ku na omhumbwe inene. Onghee ofimbo ta twikile okwiilikana a tambulwe kofikola oyo, ota dulu yo okupula Jehova e mu kwafele a didilike mo eemhito dimwe vali omo ta dulu okutamununa mo oukalele waye. (Oil. 16:​9, 10) Opo nee ota dulu okukatuka metwokumwe neilikano laye mokupula omupashukilishikandjo wavo, ngeenge eongalo lopopepi ola pumbwa ovakokolindjila vahapu. Ile ota dulu okushangela koshitaimbelewa ta pula opo pe na omhumbwe inene yovaudifi vOuhamba.e

16. Otu na okukala twa tomhwa koshike?

¹⁶ Ngaashi twe lihonga, ohatu dulu okukala twa tomhwa kutya Jehova ota ka nyamukula omailikano etu pahole nosho yo monghedi ya yuka. (Eps. 4:3; Jes. 30:18) Omafimbo amwe, otashi dulika tuha mone omanyamukulo oo twa li twa teelela. Ashike Jehova ke na efiku e lipwililikile omailikano etu. Oku tu hole neenghono. Ke na efiku e tu efe. (Eps. 9:10) Onghee twikila okukala we “mu lineekela alushe,” to mu mbubulile omutima woye meilikano. — Eps. 62:8.