Kala u shii kutya Jehova ‘oKalunga omunamwenyo’

1. Oshike hashi kwafele ovapiya vaJehova va twikile oku mu longela, nonande ova taalela omashongo?

OMBIIBELI oya popya kutya otu li ‘momafimbo madjuu okukaliwa muo.’ (2 Tim. 3:1) Oshiwana shaJehova nasho ohashi hangwa komashongo, oo haa hange ovanhu aveshe, ashike sho ohashi patanekwa yo nokuhepekwa. Oshike hashi tu kwafele tu twikile okulongela Jehova, nonande otwa taalela omaupyakadi a tya ngaho? Etomheno limwe la fimana ololo kutya ohatu mono nghee Jehova te tu kwafele, notu shii kutya oku li “Kalunga omunamwenyo.” — Jer. 10:10; 2 Tim. 1:12.

2. Oshike tu shii kombinga yaJehova osho tashi dulu oku tu pameka?

² Jehova oha kala e wete omashongo aeshe oo hatu shakeneke, nokwa halelela oku tu kwafela. (2 Omaf. 16:9; Eps. 23:4) Ngeenge otwa kala tu shii kutya oku li Kalunga kashili, otashi ke tu kwafela tu lididimikile eshongo keshe olo hatu shakeneke. Natu ka tale nghee osho sha li sha ningilwa ohamba David.

3. David okwa li a hala okutya shike, eshi a popya kutya “Omwene Oye omunamwenyo”?

³ David okwa li e shii nawa Jehova nokwa li e lineekela muYe. Eshi ohamba Saul nosho yo ovatondi vaye vali vamwe va li va hala oku mu dipaa, David okwa li a konga ekwafo kuJehova okupitila meilikano. (Eps. 18:6) Eshi Kalunga a nyamukula eilikano laDavid noku mu xupifa, okwa popya a ti: “Omwene Oye omunamwenyo!” (Eps. 18:​46, KB-13) Mbela David okwa li a hala okutya oshike, eshi a popya eendjovo odo. Odjo imwe yomauyelele oya popya kutya David okwa li ta ulike kutya okwe lineekela muJehova “e li Kalunga kashili, oo ha kwafele alushe ovapiya vaye.” David okwa li e shii kutya Kalunga kaye oku shii ashishe osho sha li tashi mu ningilwa, nokwe lilongekida oku mu kwafela, naasho osha li sha kwafela David a twikile oku mu longela. — Eps. 18:​28, 29, 49.

4. Okukala tu shii kutya Jehova oKalunga omunamwenyo, ohashi tu etele ngahelipi ouwa?

⁴ Ngeenge otwa kala twa tomhwa kutya Jehova oKalunga omunamwenyo, otashi ke tu kwafela tu twikile oku mu longela nouladi. Otashi ke tu pa eenghono tu lididimikile omashongo nokutwikila okulonga noudiinini moilonga yaye. Otashi ke tu kwafela yo tu twikile okukala nekwatafano lopofingo naye.

KALUNGA OMUNAMWENYO OTE KU PAMEKE

5. Oshike tashi dulu oku tu kwafela tu kale tu na omukumo, ngeenge twa taalela omashongo? (Ovafilippi 2:13)

⁵ Ohatu ka dula okulididimikila eshongo keshe, ngeenge otwa kala tu shii kutya Jehova oKalunga omunamwenyo nokwa halelela oku tu kwafela. Ota dulu oku tu kwafela moupyakadi keshe, molwaashi iha nyengwa kusha. Oku li omunaenghono adishe nota dulu oku tu pa eenghono tu lididimike. (Lesha Ovafilippi 2:13.) Osho otashi tu tu omukumo tu dule okulididimikila eshongo keshe. Okumona nghee Jehova te tu yambidida tu lididimikile omashongo manini, otashi tu kwafele yo tu kale tu na elineekelo kutya ota dulu oku tu kwafela tu dule okulididimikila omashongo oo a kwata moiti.

6. Eshi David a li omunyasha, oimoniwa ilipi ye mu kwafela a kale e lineekela filufilu muJehova?

⁶ Natu ka kundafaneni oimoniwa yopavali, oyo ya li ya kwafela David a kale e lineekela filufilu muJehova. Eshi a li omunyasha, emwangha nonghoshi oya li ya faduka po needi daxe. David okwa li a taataa nomukumo oifitukuti oyo, nokwa xupifa eedi. Ashike nande ongaho ka li ta diladila kutya okwe shi ninga keenghono daye mwene. Okwa li e shii kutya Jehova okwe mu kwafela. (1 Sam. 17:​34-37) David ka li a dimbwa oimoniwa ya tya ngaho. Eshi a kala nokudilonga kuyo, oshe mu kwafela a kale e na elineekelo kutya Kalunga omunamwenyo ote ke mu pameka yo nomonakwiiwa.

7. Ongahelipi okukala netaleko la yuka kwa kwafela David a lwife Goliat?

⁷ Lwanima, ofimbo David a li omunyasha, okwa li a ya konhanda yovakwaita Ovaisrael. Ofimbo a li oko, okwa li a didilika kutya ovakwaita ova li va tila omutongolume Omufilisti, wedina Goliat, oo a li ta “talifa nawa ovakwaita Ovaisrael.” (1 Sam. 17:​10, 11) Ovakwaita ova li ve mu tila omolwounene waye nosho yo oinima oyo a li te va ula. (1 Sam. 17:​24, 25) David okwa li ta yandje elitulemo kushimwe shi lili. Okwa li e shii kutya, eshi Goliat a li ta sheke ovakwaita Ovaisrael, havo lelalela a li ta sheke, ndele okwa li ta sheke “ovakwaita vaKalunga omunamwenyo.” (1 Sam. 17:26) David okwa li e na Jehova momadiladilo. Okwa li e lineekela muKalunga, oo a li e mu kwafela, eshi a li omufita weedi, kutya ote ke mu kwafela yo nomonghalo oyo. David okwa li a ya a ka lwife Goliat, molwaashi oku shii kutya Jehova ote mu amene, nokwa li a pondola. — 1 Sam. 17:​45-51.

8. Ongahelipi hatu dulu okukala tu na elineekelo kutya Jehova ote ke tu kwafela, tu lididimikile omashongo? (Tala yo efano.)

⁸ Nafye ohatu dulu okulididimikila omashongo, ngeenge otwa kala tu shii kutya Jehova oKalunga omunamwenyo, oo e lilongekida oku tu kwafela. (Eps. 118:6) Ohatu dulu okukala twe lineekela muye filufilu, mokudilonga kwaasho e tu ningila monakudiwa. Kala ho lesha omahokololo Ombiibeli, oo tae ku dimbulukifa nghee Jehova a xupifa ovalongeli vaye. (Jes. 37:​17, 33-37) Kala yo ho tale nokulesha eelaporta ko-jw.org, odo tadi ulike nghee Jehova ha yambidida ovamwatate novamwameme kunena. Dilonga kunghee Jehova a kala noku ku kwafela. Ino kala wa limbililwa, ngeenge ku na oshimoniwa sha fela oko. Omolwashike? Oushili oyoo kutya, Jehova okwe ku ningila oinima ihapu monghalamwenyo yoye. Okwe ku shiva u ninge kaume kaye. (Joh. 6:44) Nokuli nopaife, oye e ku kwafela u twikile oku mu longela. Onghee, pula Jehova e ku kwafele u dimbuluke eemhito omo a nyamukula omailikano oye, omo e ku pa osho wa pumbwa pefimbo la wapala, nanghee e ku kwafela u lididimikile eenghalo didjuu. Okudilonga koimoniwa ya tya ngaho, otashi ku kwafele u kale u na elineekelo kutya Jehova ota twikile oku ku kwafela.

9. Oshike twa pumbwa okukaleka momadiladilo, ngeenge twa taalela omashongo? (Omayeletumbulo 27:11)

⁹ Ngeenge otwa kala tu shii kutya Jehova omunhu wolela, otashi ke tu kwafela tu kale tu na etaleko la yuka li na sha nomashongo oo twa taalela. Ngahelipi mbela? Ohatu ka tala ko omashongo oo twa taalela e li omhata inene, oyo i li pokati kaJehova naSatana. Ondiaboli oya popya kutya ohatu ka efa po okulongela Jehova, ngeenge otwa taalela eenghalo didjuu. (Job 1:​10, 11; lesha Omayeletumbulo 27:11.) Ashike ngeenge otwa twikile okukala ovadiinini kuJehova, nonande otwa taalela eenghalo didjuu, ohatu ka ulika kutya otu mu hole, nohatu ka nyaneka pomutenya oipupulu yOndiaboli. Mbela owa taalela omapataneko okudja kepangelo, ouxupilo tau kande omapunya, ovanhu itava pwilikine nawa moukalele, ile omashongo amwe vali? Ngeenge osho, dimbuluka kutya eenghalo da tya ngaho ota di ku pe omhito u hafife omutima waJehova. Dimbuluka yo kutya ite ku efa u hangwe keyeleko li dule eenghono doye. (1 Kor. 10:13) Ote ku pe eenghono u lididimike.

KALUNGA OMUNAMWENYO OTE KU PE ONDJABI

10. Kalunga omunamwenyo ota ka ningila shike ovalongeli vaye?

¹⁰ Jehova oha yandje ondjabi kwaavo have mu longele. (Heb. 11:6) Ohe tu pe ombili, nohe tu kwafele tu kale twa wanenwa paife, note ke tu pa yo omwenyo waalushe monakwiiwa. Ohatu dulu okukala nelineekelo kutya Jehova okwa halelela, noku na eenghono dokuninga ngaho. Osho ohashi tu kwafele tu kale twe lipyakidila moilonga yaye, ngaashi ashike ovapiya vaye vomonakudiwa va li va ninga. Timoteus, oo a li ko pefimbo lovayapostoli, osho a li a ninga ngaho. — Heb. 6:​10-12.

11. Oshike sha li she linyengifa Timoteus a longe noudiinini meongalo? (1 Timoteus 4:10)

¹¹ Lesha 1 Timoteus 4:10. Timoteus okwa li e lineekela muKalunga omunamwenyo. Nomolwaasho, okwa li a longela Kalunga noudiinini. Omeenghedi dilipi a li a ninga ngaho? Omuyapostoli Paulus okwa li e mu ladipika a xwepopaleke ounghulungu waye wokuhonga moukalele nosho yo meongalo. Okwa li yo e mu ladipika a tulile po oshihopaenenwa shiwa ovaitaveli vakwao, ovanyasha novakulunhu. Timoteus okwa li yo e lineekelelwa oinakuwanifwa idjuu, mwa kwatelwa okuyandja omayele nopehe na oku va lila okafima koluko, te shi ningi pahole. (1 Tim. 4:​11-16; 2 Tim. 4:​1-5) Nonande otashi dulika omafimbo amwe vamwe kava li va didilika oilonga yaTimoteus youdiinini, okwa li e na elineekelo kutya Jehova oku wete oilonga yaye note ke mu pa ondjabi. — Rom. 2:​6, 7.

12. Omolwashike ovakulunhuongalo hava longo noudiinini meongalo? (Tala yo efano.)

¹² Ovakulunhuongalo navo kunena otava dulu okukala noushili kutya Jehova oku wete, nokwa lenga oilonga yavo iwa. Kakele kokuninga omatalelepo oufita, okuhonga nosho yo okuudifa, ovakulunhuongalo vahapu ohava yambidida yo oilonga yokutunga noyokuyandja oikwafa. Vamwe ohava longo mEengudu dOkutalela po ovanaudu, ile mEekomitiye dOkukwatafana nOipangelo. Ovakulunhuongalo ohava ningi ngaho, molwaashi ove shii kutya eongalo olaJehova, ndele kali fi lovanhu. Nomolwaasho, ohava wanifa po nomutima aushe oinakuwanifwa yavo, ve na elineekelo kutya Kalunga ote ke va pa ondjabi omolwoilonga yavo. — Kol. 3:​23, 24.

13. Jehova oha kala e uditile ngahelipi eenghendabala odo hatu ningi, opo tu mu longele?

¹³ Hakeshe umwe ta dulu okukala omukulunhuongalo. Ndele atushe ohatu dulu okupa sha Jehova. Ohe shi pandula neenghono, ngeenge hatu ningi eenghendabala tu mu longele. Ohe shi didilike yo, ngeenge hatu yandje omayambidido oilonga yomounyuni aushe, nonande omanini. Oha kala a hafa, ngeenge e wete hatu aneke tu yandje omatyekosha pokwoongala, nonande otu na eehoni. Oha kala yo a hafa, ngeenge hatu dimine po ovo va nyona kufye. Nonande otashi dulika u udite kutya ito longele Jehova shihapu, kala u shii kutya okwa lenga oilonga yoye. Oku ku hole note ke ku pa ondjabi. — Luk. 21:​1-4.

KALA POPEPI NAKALUNGA OMUNAMWENYO

14. Ongahelipi okukala nekwatafano lopofingo naJehova taku dulu oku tu kwafela tu kale ovadiinini kuye? (Tala yo efano.)

¹⁴ Ngeenge otwa kala tu na ekwatafano lopofingo naJehova, otashi ke tu kwafela tu kale ovadiinini kuye. Josef osho a li a ninga ngaho. Okwa li a anya okuya moluhaelo, molwaashi okwa li e na ekwatafano lopofingo naJehova, noka li a hala oku mu nyemateka. (Gen. 39:9) Opo tu kale tu na ekwatafano lopofingo naJehova, otwa pumbwa okukala hatu kongo efimbo tu ilikane kuye, nokulesha Eendjovo daye. Osho otashi ka pameka oukaume wetu naye. Ngaashi Josef, ngeenge otwa kala tu na ekwatafano lopofingo naJehova, itatu ka ninga sha osho tashi mu nyemateke. — Jak. 4:8.

15. Oshike hatu lihongo kwaasho sha li sha ningilwa Ovaisrael, eshi va li mombuwa? (Ovaheberi 3:12)

¹⁵ Ngeenge omunhu okwa efa po okukala e lineekela muJehova, Kalunga omunamwenyo, ota dulu okweefa po noupu oku mu longela. Natu ka tale osho sha li sha ningilwa Ovaisrael, eshi va li mombuwa. Ova li ve shii kutya Jehova oko e li, ashike ova li va hovela okukala nomalimbililo, ngeenge ote ke va wanifila po ngoo eemhumbwe davo. Ova li nokuli va pula tava ti: “Hano Jehova oku li ngoo shili mokati ketu, ile ke mo?” (Ex. 17:​2, 7) Nokudja opo, ova li va tukululila Kalunga ounashibofa. Fye inatu hala okushikula oshihopaenenwa shavo shokuhadulika, osho shi li elondwelo kufye kunena. — Lesha Ovaheberi 3:12.

16. Oshike tashi dulu okuyeleka eitavelo letu?

¹⁶ Ounyuni ou we tu dingilila, ohau shi ningifa shidjuu kufye okukala nekwatafano lopofingo naJehova. Ovanhu vahapu mounyuni ou, ova itavela kutya Kalunga ke ko. Naluhapu ovanhu va tya ngaho, ohava monika va fa tave shi endifa nawa monghalamwenyo. Naasho ohashi yeleke eitavelo letu. Nonande otwa itavela kutya Kalunga oko e li, otashi dulika tu hovele okukala twa limbililwa, ngeenge ote tu kwafele ngoo. Omushangi wEpsalme 73 naye osho a li e udite ngaho pomhito imwe. Okwa li e wete nghee ovanhu ovo ihava dulika kEemhango daKalunga tave shi endifa nawa monghalamwenyo. Oshidjemo, okwa li a hovela okukala a limbililwa, ngeenge osha fimana ngoo okulongela Kalunga, ile hasho. — Eps. 73:​11-13.

17. Oshike tashi ke tu kwafela tu kale nekwatafano lopofingo naJehova?

¹⁷ Oshike sha li sha kwafela Omupsalme a lundulule etaleko laye? Okwa li a dilonga kwaasho Jehova ta ka ningila ovo va efa po oku mu longela. (Eps. 73:​18, 19, 27) Okwa li yo a dilonga kouwa oo hau di mokulongela Kalunga. (Eps. 73:24) Nafye ohatu dulu okudiladila komanangeko noupuna oo Jehova e tu pa. Nokuyelekanifa kutya ngeno onghalamwenyo yetu oya tya ngahelipi, ngeno otwa li ihatu longele Jehova. Ngeenge otwa kala tu shii ouwa oo hau di mokulongela Jehova, otashi ke tu kwafela tu kale ovadiinini kuye; nohatu ka popya ngaashi omupsalme oo a ti: “Okukala popepi naKalunga, osho elao lange.” — Eps. 73:28.

18. Omolwashike tuhe na okukala twa tila onakwiiwa?

¹⁸ Ohatu dulu okutaalela eshongo keshe olo tali tu hange momafiku aa axuuninwa, molwaashi otu li “ovapiya vaKalunga kashili omunamwenyo.” (1 Tes. 1:9) Kalunga ketu oku li omunhu wolela, noha kala alushe pamwe naavo have mu longele. Okwa dja nokuyambidida ovapiya vaye monakudiwa, noku li yo pamwe nafye kunena. Mafiku otu li pokuhangwa koudjuu munene. Ashike katu li ofye atuke. (Jes. 41:10) Atushe ohatu dulu “okupopya nomukumo hatu ti: ‘Jehova oye omukwafi wange; itandi tila sha.’” — Heb. 13:​5, 6.