Omapulo a dja kovaleshi
Mbela outumbulilo “oto ke va wilika,” oo tau hangwa mEpsalme 12:7, otau ulike ‘kovafininikwa’ (ovelise 5,) ile ‘okomalombwelo aJehova’ (ovelise 6)?
Oshikalimo shetukulwa olo otashi ulike kutya ovelise oyo otai ulike kovanhu.
Epsalme 12:1-4 ola popya kutya “Ovadiinini kave mo vali mokati kovanhu.” Opo nee mEpsalme 12:5-7, okwa ti:
“Jehova ota ti: ‘Molwaashi ovafininikwa ova fininikwa,
Omolwokukema kweehepele,
Ohandi ka fikama nokukatuka onghatu.
Ohandi ke va xupifa kwaavo tava ungaunga navo nodino.’
Omalombwelo aJehova okwa yuka;
Oku li ngaashi oshisilveri sha hemunwa mediko lelova, Sha kosholwa lwoikando iheyali.
Jehova, oto ke va wilika;
Oto ka amena keshe umwe womuvo kepupi eli fiyo alushe.”
Ovelise 5 oya popya kombinga yaasho Kalunga ta ka ningila ovafininikwa. Ote ke va xupifa.
Ovelise 6 oya weda ko tai ti: “Omalombwelo aJehova okwa yuka,” ‘oku li ngaashi oshisilveri sha hemunwa.’ Ovelise oyo otai ulike nghee Ovakriste vashili hava kala ve uditile eendjovo daJehova. — Eps. 18:30; 119:140.
Didilika osho ovelise ya shikula ko ya popya, Epsalme 12:7, oya ti: “Jehova, oto ke va wilika; Oto ka amena keshe umwe womuvo kepupi eli fiyo alushe.” Oshityaponhele “va” otashi ulike kushike?
Molwaashi ovelise 7 oya shikula ovelise 6, oyo ya popya kombinga ‘yomalombwelo aJehova,’ vamwe otashi dulika va diladile kutya oshityaponhele “va” osha yukifwa keendjovo daye. Otu shi shii kutya Kalunga okwa kala nokwaamena Ombiibeli, eshi vamwe va kala nokuninga eenghendabala doku i shilika noku i hanauna po. — Jes. 40:8; 1 Pet. 1:25.
Oshoshili kutya Jehova oha amene oshiwana shaye, ngaashi ovelise 5 ya popya. Jehova okwa kala nokwaamena, nota twikile okwaamena “omapongo” nosho yo ‘ovafininikwa.’ — Job 36:15; Eps. 6:4; 31:1, 2; 54:7; 145:20.
Ndele mbela oshityaponhele “va,” osho sha popiwa movelise 7 otashi ulike kushike?
Oshikalimo shEpsalme olo otashi ulike kutya oshityaponhele “va” otashi ulike kovanhu.
Epsalme 12:1 ola popya kombinga yovapiya vaJehova “ovadiinini,” ovo va lundilwa kovakolokoshi. Ola popya yo kutya Jehova ota ka hanauna po aveshe ovo hava mbweenga nomilungu davo. Epsalme olo otali tu kwafele tu kale tu na elineekelo kutya Kalunga ota ka popila oshiwana shaye.
Ovelise 7 oya popya kutya Jehova ote ke “va” amena, tashi ulike kwaavo va fininikwa kovakolokoshi.
Oshityaponhele “va” osho sha longifwa movelise ei osha dja mOmishangwa dOshiheberi. O-Septuagint yOshigreka oya longifa oshityaponhele “fye” lwoikando ivali movelise 7, tashi ulike kovadiinini, ovo va li va fininikwa. Hauxuuninwa, ovelise 7 oya popya kutya, “keshe umwe,” oo e li omudiinini ota ka amenwa “kepupi eli,” olo tali ulike kovakolokoshi ovo hava longo owii. (Eps. 12:7, 8) Ovelise 7 mOmishangwa dOshiheberi melaka lOshiaramia, nayo oya longifa oshityaponhele “va,” eshi ya ti: “OMWENE, oto ka amena ovayuki kepupi eli likolokoshi, fiyo alushe, noku va amena. Oo oumbangi, oo tau ulike kutya Epsalme 12:7 itali ulike keendjovo daKalunga.
Nokungaho, ovelise oyo otai kwafele “ovanhu ovadiinini” va kale ve na elineekelo kutya Kalunga ote ke va amena.