Nghee to dulu okukala u na ombili, nonande ope na oita nomapiyaano
Gary, oo a li nale omukwaita, okwa ti: “Ofimbo inandi konakona Ombiibeli, kanda li ndi shii kutya omolwashike mounyuni mu yadi elongifo leenghono, okuhenouyuki nosho yo omaupyakadi. Ashike paife ondi na ombili yopamadiladilo. Ondi shii kutya Jehova Kalunga ota ka ningifa ounyuni u kale onhele ya amenwa.”
Gary haye aeke ha kala e udite ngaho. Tala nghee Ombiibeli ya li ya kwafela vamwe.
OMBIIBELI OTAI TI: “Ove, Omwene Jehova, oumuwa, nowe lilongekida okudimina po.” — Epsalme 86:5.
NGHEE OSHO TASHI KWAFELE: Wilmar, wokoColombia, okwa ti: “Ovelise ei oya shilipaleke nge kutya Jehova omunanghenda. Ondi shi shii kutya okwa halelela okudimina nge po omolwoinima aishe oyo nda ninga monakudiwa, eshi nda kufa ombinga moita.”
OMBIIBELI OTAI TI: “Ame ohandi shiti omaulu mape nedu lipe. Inya yonale itai dimbulukiwa vali, nongaashi kape na ou te i diladila momutima waye.” — Jesaja 65:17, KB-13.
NGHEE OSHO TASHI KWAFELE: Zafirah, wokoUnited States, okwa ti: “Ondi na ostresa nepolimano omolwoimoniwa oyo nda pita muyo, eshi nda li moukwaita. Ashike omushangwa ou ohau dimbulukifa nge kutya mafiku Jehova ota ka kwafela nge ndi dimbwe filufilu oinima aishe oyo ii. Itandi ke i dimbuluka vali nandenande. Osho oshinima sha denga mbada!”
OMBIIBELI OTAI TI: “Pomafiku ayo, omuyuki ota ka hapa, nombili otai ka hapupala, fiyo osheshi omwedi wa fya ko.” — Epsalme 72:7.
NGHEE OSHO TASHI KWAFELE: Oleksandra, wokoUkraine, okwa ti: “Ohandi dilonga alushe keendjovo odo. Mafiku itatu katwa vali eendjodi di na sha noita, noitatu ke lipula vali ngeenge ovaholike vetu ove li ngoo meameno.”
OMBIIBELI OTAI TI: “Ovafi voye otava ka ninga ovanamwenyo. . . . Dudulukeni, nye mu nyakukwe, onye amushe ava mwa nangala mondwi.” — Jesaja 26:19, KB-13.
NGHEE OSHO TASHI KWAFELE: Marie, wokoRwanda, okwa ti: “Konyala ovapambele vange aveshe ova fila momadipao a nghinanghenda, oo a li a ningilwa Ovatutsi. Ashike ovelishe oyo otai shilipaleke nge kutya ohandi ke va mona vali. Onda teelela nodjuulufi oku ka uda eendaka davo dehafo, eshi tava ka nyumunwa.”
OMBIIBELI OTAI TI: “Konima ashike yokafimbo kanini, ovakolokoshi itava ka kala po vali; . . . Ashike ovalidiiniki otava ka fyuulula edu, notava ka hafela neenghono ombili pauyadi.” — Epsalme 37:10, 11.
NGHEE OSHO TASHI KWAFELE: Daler, wokoTajikistan, okwa ti: “Nonande oita oya xula, ope na natango okuhenouyuki novalongi vominyonena. Eevelise odo oda kwafela nge neenghono. Jehova oku wete keshe shimwe noku udite ko onghalo yange. Okwa udaneka kutya okumona oixuna akushe otaku ka xula po mafiku noita ku ka dimbulukiwa vali.”
Ovanhu, ovo va popiwa moshifo eshi, ovamwe vomEendombwedi daJehova omamiliyona, ovo va kwafelwa kOmbiibeli va kale ve na ombili. Ove lihonga nghee tava dulu okufinda oukwamuhoko, oukwashiwana nosho yo outondwe. (Ovaefeso 4:31, 32) Eendombwedi daJehova ihadi kufa ombinga moinima yopapolotika nosho yo melongifo leenghono. — Johannes 18:36.
Eendombwedi daJehova ohadi kwafelafana yo mounyuni aushe. (Johannes 13:35) Pashihopaenenwa, Oleksandra, oo a popiwa metetekelo, okwa li a ya onhapo koshilongo shimwe pamwe nomumwainakadona omolwoita. Okwa ti: “Eshi twa tauluka eengaba, otwa mona Eendombwedi daJehova domoshilongo osho de uya oku tu shakeneka. Ode tu kwafela tu tambule ko onghalo moshilongo osho shipe tu li eenhauki.”
Ohatu ku shivi nohamu kokwoongala kwetu u uye u lihonge shi na sha netumwalaka lombili olo lili mOmbiibeli, nanghee to dulu oku li tula moilonga. Inda ko jw.org u mone onhele oyo i li popepi naave, ile u pule u konakone Ombiibeli oshali naumwe womEendombwedi daJehova, tamu longifa okambo Nghee to dulu okuhafela onghalamwenyo fiyo alushe!