Jehova ote ku hekeleke

1. Hokolola onghalo yOvajuda eshi va li moukwatwa.

DILADILA kunghee Ovajuda va li ve udite, eshi va li moukwatwa muBabilon. Ova li va mona nghee eduumbo lavo la hanaunwa po. Omolwoulunde wavo nosho yo wooxekulululwa, ova li va kufwa mo momaumbo avo, ndele tava twalwa moukwatwa muBabilon. (2 Omaf. 36:​15, 16, 20, 21) Oshoshili kutya eshi va li moukwatwa muBabilon ova li ve na emanguluko lokuninga oinima yavo ya kwalukeshe. (Jer. 29:​4-7) Ashike onghalamwenyo kaya li ipu, nokava li va hala okukala monhele ya tya ngaho. Ova li ve uditile ngahelipi onghalo yavo? Didilika osho umwe womuvo a ti: “Otwa li omutumba komilonga daBabilon. Otwa lila, eshi twa dimbuluka Sion.” (Eps. 137:1) Eenghwate odo da teka omukumo oda li da pumbwa okuhekelekwa. Ndele olye a li ta dulu oku di hekeleka?

2-3. (a) Jehova okwa li a ningila shike Ovajuda ovo va li moukwatwa? (b) Oshike hatu ka kundafana moshitukulwa eshi?

² Jehova ‘oKalunga kehekeleko alishe.’ (2 Kor. 1:3) E li Kalunga omunahole, oha hekeleke ovo hava ehene popepi naye. Jehova okwa li e shii kutya eenghwate dimwe otadi ka tambula ko outekuduliko waye nokwaalukila kuye. (Jes. 59:20) Onghee konima yeedula di dulife 100 ofimbo inadi ya moukwatwa, Jehova okwa li a nwefa mo omuprofeti Jesaja a shange embo olo a lukilwa. Onelalakano lashike? Jesaja okwa ti: “Kalunga keni osho ta ti: ‘Hekelekeni, hekelekeni oshiwana shange.’” (Jes. 40:​1, KB-13) Okupitila membo lomuprofeti oo, Jehova okwa dula okuhekeleka Ovajuda ovo va li moukwatwa.

³ Ngaashi Ovajuda ovo va li moukwatwa, nafye otwa pumbwa okuhekelekwa omafimbo amwe. Moshitukulwa eshi, ohatu ka kundafana eenghedi nhatu, omo Jehova a li a hekeleka eenghwate: (1) Okwa udaneka okudimina po Ovajuda, ovo ve livela ombedi, (2) okwa pa oshiwana shaye eteelelo nosho yo (3) okwa li e va kwafela vaha kale va tila. Eshi hatu kundafana oitwa oyo, didilika nghee hatu dulu okumona mo ouwa meendjovo daJehova tadi hekeleke.

JEHOVA OHE TU DIMINE PO NEHALO LIWA

4. Jehova okwa li a ulika ngahelipi kutya oKalunga omunanghenda? (Jesaja 55:7)

⁴ Jehova “oXe yefilonghenda.” (2 Kor. 1:3) Okwa ulika oukwatya oo, eshi a udaneka okufila onghenda eenghwate, odo de livela ombedi. (Lesha Jesaja 55:7.) Okwa ti: “Nouwanghenda waalushe ohandi ku filonghenda.” (Jes. 54:​8, KB-13) Jehova okwa li ta dulu okuulika ngahelipi onghenda yaye? Nonande Ovajuda ova li ve na okumona oixuna omolwoilanduliko yeenghatu davo, Jehova okwa li a udaneka kutya itava ka kala muBabilon fiyo alushe. Otava ka kala moukwatwa oule wefimbo ashike linini. (Jes. 40:2) Osho otashi dulika sha li sha hekeleka Ovajuda ovo va li ve livela ombedi nova hala okuhafifa Jehova.

5. Omolwashike tu na oushili tu dulife Ovajuda, kutya Jehova ohe tu dimine po?

⁵ Oshike hatu lihongo? Jehova okwa halelela okudimina po ovapiya vaye filufilu. Kunena, otu na oushili tu dulife Ovajuda ovo va li muBabilon, kutya Jehova ohe tu dimine po. Ngahelipi mbela? Fye otu shii osho Jehova a ninga po, opo tu diminwe po omatimba etu. Konima yomido omafele eshi Jesaja a xunganeka, Jehova okwa li a tuma Omona waye kombada yedu, opo a file aveshe ovo ve livela ombedi. Ekuliloyambo olo ole shi ningifa tashi shiiva, opo omatimba “a dimwe po” filufilu. (Oil. 3:19; Jes. 1:18; Ef. 1:7) Mbela itatu longele tuu Kalunga omunanghenda!

6. Ongahelipi hatu dulu okumona ouwa mokuyandja elitulemo konghenda yaJehova? (Tala yo efano.)

⁶ Eendjovo daJehova da nwefwa mo odo tadi hangwa muJesaja 55:​7, otadi dulu oku tu hekeleka ngeenge otu udite ondjo. Vamwe vomufye otashi dulika tu twikile okukala tu udite ondjo, omolwomapuko oo twa ninga monakudiwa, nokuli nonande otwe livela ombedi. Osho otashi dulu okuningwa, unene tuu ngeenge omapuko etu okwe tu etela oilanduliko ii. Ashike ngeenge otwa hepaulula omanyono etu nokupukulula eenghatu detu, ohatu dulu okukala noushili kutya Jehova okwe tu dimina po. Nongeenge Jehova e tu dimina po, iha dimbuluka vali omapuko etu. (Yelekanifa Jeremia 31:34.) Jehova iha kala ta diladila komapuko oo twa ninga monakudiwa, onghee nafye inatu pumbwa oku shi ninga. Osho sha fimanenena kuJehova, oshosho hatu ningi paife, ndele hamapuko oo twa ninga monakudiwa. (Hes. 33:​14-16) Mafiku, Tate yetu omunanghenda ota ka kufa po oilanduliko aishe oyo ya etifwa komapuko etu.

7. Oshike tashi dulu oku tu linyengifa tu popye novakulunhuongalo ngeenge twa nyona enyono la kwata moiti?

⁷ Oshike tu na okuninga po, ngeenge otu udite ondjo omolwomapuko a kwata moiti oo twa ninga notwa kendabala oku a holeka? Ombiibeli otai tu ladipike tu konge ekwafo kovakulunhuongalo. (Jak. 5:​14, 15) Ashike otashi dulika tu mone shidjuu oku va lombwela osho twa ninga. Ndele ohatu ka dula ashike okupopya novalumenhu ovo, ngeenge otwe livela ombedi notu shii kutya Jehova nosho yo ovalumenhu ovo a nangeka po ve tu kwafele, ovanahole novananghenda. Natu ka taleni kunghee onghenda yaJehova ya li ya hekeleka omumwatate wedina Arthur,a oo a li e udite ondjo neenghono omolwoshinima osho a ninga. Arthur okwa ti: “Hanga oule wodula, onda kala handi tale omafano oipala. Ndele konima eshi nda uda oshipopiwa shi na sha neliudo, onda hepaululila ovakulunhuongalo enyono lange. Konima yaasho, onda li ndi udite nda pepelelwa, ashike onda li ndi udite ondjo neenghono, omolwoshinima osho nda ninga. Ovakulunhuongalo ova li va dimbulukifa nge kutya Jehova ina efa nge. Ohe tu pe outekuduliko molwaashi oku tu hole. Eendjovo davo donghenda oda li da kuma omutima wange, noda kwafela nge ndi lundulule omadiladilo ange.” Paife, Arthur oku li omukokolindjila nomuyakuliongalo. Mbela itashi hekeleke tuu okushiiva kutya Jehova ohe tu file onghenda, ngeenge twe livela ombedi!

JEHOVA OKWE TU PA ETEELELO

8. (a) Jehova okwa li a pa eenghwate eteelelo lilipi? (b) She likolelela kuJesaja 40:​29-31, eteelelo ola li la kuma ngahelipi Ovajuda ovo ve livela ombedi?

⁸ Pataleko lopanhu, Ovajuda ovo va li moukwatwa ova li tava monika vehe na ekwafo lasha. Epangelo enaenghono mounyuni, Babilon, kala li li hole okumangulula eenghwate dalo. (Jes. 14:17) Ashike Jehova okwa li a pa oshiwana shaye eteelelo. Okwa li a udaneka okumangulula oshiwana shaye, nokape na osho tashi mu i moshipala. (Jes. 44:26; 55:12) Momesho aJehova, Babilon okwa li a fa ondwi. (Jes. 40:15) Ondwi oto dulu oku i fudila po, ndele tai kana po. Eteelelo ola li tali dulu okukuma ngahelipi eenghwate? Ola li tali dulu oku va hekeleka. Ashike ola li tali dulu okuninga shihapu shi dulife opo. Jesaja okwa shanga a ti: “Ovo hava teelele Omwene, otava pewa eenghono dipe.” (Lesha Jesaja 40:​29-31, KB-13.) Heeno, eteelelo ola li tali va pameke; ova li tava dulu ‘okuyelula omavava pombada ngaashi eenhwa.’

9. Oshike sha li sha kwafela eenghwate di kale de lineekela momaudaneko aJehova?

⁹ Jehova okwa li a kwafela eenghwate di kale de lineekela momaudaneko aye. Ngahelipi mbela? Diladila komaxunganeko oo a wanifwa nale. Ova li ve shii kutya Asiria okwa finda ohamba yokolundume yaIsrael nokwa li a tula ovanhu moukwatwa. (Jes. 8:4) Ova li va mona nghee Babilon a hanauna po Jerusalem nokutula ovanhu moukwatwa. (Jes. 39:​5-7) Ova li yo va mona eshi ohamba yaBabilon ya twiyula ohamba Sedekia omesho noku i twala kuBabilon. (Jer. 39:7; Hes. 12:​12, 13) Oinima aishe oyo Jehova a li a xunganeka oya li ya wanifwa po shili. (Jes. 42:9; 46:10) Oinima aishe oyo oya li ya pameka eitavelo lavo kutya eudaneko laJehova li na sha noku va mangulula otali ka wanifwa po shili.

10. Oshike tashi dulu oku tu kwafela tu kale tu na eteelelo momafiku aa axuuninwa?

¹⁰ Oshike hatu lihongo? Ngeenge twa teka omukumo, eteelelo otali dulu oku tu hekeleka noku tu kwafela tu kale vali tu na ouladi. Otu li momafimbo madjuu omo ovatondi vaKalunga tave tu pataneke. Ashike inatu teka omukumo. Jehova okwe tu pa eteelelo litunhula li na sha noku ka kala nomwenyo fiyo alushe, hatu ka hafela ombili yashili neameno. Natu kaleke eteelelo letu la twa momadiladilo nomomitima detu. Ngeenge hasho, eteelelo letu otali ka kala la fa omutalelo muwa, ashike owa dofa, molwaashi mekende omo hatu talele ola kaka. Ongahelipi hatu dulu “okuwapaleka ekende olo,” oku shi popya pafaneko, opo tu kaleke eteelelo letu la twa? Ohatu dulu okukala hatu dilonga efiku keshe kunghee onghalamwenyo tai ka kala itunhula mounyuni mupe. Ohatu dulu okulesha oitukulwa, okutala ouvidio nosho yo okupwilikina komaimbilo, oo a popya kombinga yeteelelo letu. Ohatu dulu yo okupopya naJehova meilikano kombinga yomaudaneko oo twa teelela nodjuulufi a ka wanifwe po.

11. Oshike sha kwafela omumwameme umwe oo a li e na ouyehame wa kwata moiti a dule okulididimika?

¹¹ Diladila nghee eteelelo la li la hekeleka nokupameka omumwameme wedina Joy, oo a li e na ouyehame wa kwata moiti. Okwa ti: “Ngeenge nda li nda teka omukumo, ohandi lombwele Jehova omaliudo ange ndi na elineekelo kutya oku udite ko onghalo yange. Pomafimbo a tya ngaho, Jehova okwa li ha pe nge ‘eenghono di dule dopaushitwe.’” (2 Kor. 4:7) Joy okwa li yo ha faneke momadiladilo e li mounyuni mupe, ‘omo itamu ka kala nande umwe ta ti: “Aame oshingone.”’ (Jes. 33:​24, KB-13) Nafye ngeenge otwa mbubulile Jehova omitima detu, nokuyandja elitulemo keteelelo letu, ohatu ka dula okulididimika.

12. Otu na omatomheno elipi okukala twe lineekela momaudaneko aJehova? (Tala yo efano.)

¹² Ngaashi ashike Jehova a li a ningila Ovajuda, ovo va li moukwatwa, nafye okwe tu pa omatomheno mahapu, opo tu kale twe lineekela momaudaneko aye. Diladila kombinga yomaxunganeko oo taa wanifwa po. Pashihopaenenwa, otu wete epangelo enaenghono mounyuni li na ‘ombinga imwe yoshilongo ya pama, ndelenee ikwao inai pama.’ (Dan. 2:​42, 43, KB-13) Ohatu udu yo “omakakamo edu keembinga neembinga.” Nohatu kufa ombinga mokuudifila ‘oiwana aishe.’ (Mat. 24:​7, 14) Omaxunganeko oo nosho yo makwao mahapu ohaa pameke elineekelo letu momaudaneko aJehova taa hekeleke, oo taa ka wanifwa po.

JEHOVA OHE TU KWAFELE TUHA KALE TWA TILA

13. (a) Omashongo elipi Ovajuda va li tava ka taalela pefimbo lokumangululwa kwavo? (b) Ngaashi sha popiwa muJesaja 41:​10-13, Jehova okwa li a hekeleka ngahelipi Ovajuda, ovo va li moukwatwa?

¹³ Nonande Jehova okwa li a hekeleka ovo va li moukwatwa neteelelo litunhula, okwa li e shii kutya ova li tava ka taalela omashongo, eshi tava ka mangululwa. Jehova okwa li a xunganeka kutya ohamba inaenghono otai ka ponokela nokupangela oiwana oyo ya dingilila Babilon, nolwanima otai ka ponokela Babilon sho vene. (Jes. 41:​2-5) Mbela Ovajuda ova li va pumbwa okukala va tila? Jehova okwa li a hekeleka oshiwana shaye komesho yefimbo, eshi a ti: “Ino tila, osheshi Ame ondi li pamwe naave. Ino [kala] wa limbililwa, osheshi Aame Kalunga koye.” (Lesha Jesaja 41:​10-13, KB-13.) Jehova okwa li a hala kutya shike, eshi a ti: “Aame Kalunga koye”? Ka li ta dimbulukifa Ovajuda ve mu longele, molwaashi ove shii nale kutya osho ve na okuninga. Ponhele yaasho, okwa li te va dimbulukifa kutya natango oku li pamwe navo. — Eps. 118:6.

14. Ongahelipi Jehova a li a kwafela Ovajuda ovo va li moukwatwa, opo vaha kale va tila?

¹⁴ Jehova okwa li yo a kwafela Ovajuda ovo va li moukwatwa, opo vaha kale noumbada, eshi e va dimbulukifa eenghono daye inadi ngabekwa nosho yo ounongo waye. Okwa li a lombwela Ovajuda ovo va li moukwatwa va tale keulu oko ku yadi eenyofi. Okwe va lombwela kutya ina shita ashike eenyofi, ndele oku shii yo keshe imwe kedina layo. (Jes. 40:​25-28) Ngeenge Jehova oku shii edina lonyofi keshe, osha yela kutya oku shii edina lomupiya waye keshe. Nongeenge Jehova oku na eenghono dokushita eenyofi, oku na yo eenghono dokukwafela oshiwana shaye. Onghee hano, Ovajuda ovo va li moukwatwa kava li ve na etomheno lokukala ve na oshisho, ile va tila.

15. Kalunga okwa li a kwafela ngahelipi Ovajuda, ovo va li moukwatwa, opo ve lilongekidile onakwiiwa?

¹⁵ Jehova okwa li yo a kwafela oshiwana shaye shi kale she lilongekidila onakwiiwa. Membo laJesaja, Kalunga okwa lombwela oshiwana shaye, a ti: “Liidilila monduda yoye, u ka hondame okafimbo kanini, fimbo oupyuhandu tau pitilile po.” (Jes. 26:​20, KB-13) Ovajuda otashi dulika va li va tula moilonga elombwelo olo eshi ohamba Kores ya li ya ponokela Babilon. Omunandjokonona umwe Omugreka okwa ti kutya, eshi Kores a ya muBabilon okwa li a “lombwela [ovakwaita vaye] va dipae keshe umwe oo ta hangika pondje.” Ovakalimo vomuBabilon otashi dulika va li va tila. Ashike Ovajuda ovo va li moukwatwa, otashi dulika va li va xupifwa, molwaashi ova li va dulika komalombwelo aJehova.

16. Omolwashike inatu pumbwa okukala tu na oshisho sha pitilila shi na sha nonakwiiwa? (Tala yo efano.)

¹⁶ Oshike twe lihonga? Mafiku ohatu ka taalela oudjuu munene, oo inau kala ko nale mondjokonona yovanhu. Ngeenge owa hovele, ovanhu mounyuni otava ka kala va ngwangwana nova mbadapala. Ashike oshiwana shaJehova hasho tashi ka kala ngaho. Otu shii kutya Jehova oKalunga ketu. Ohatu ka kala tu na omukumo tu shii kutya ‘exupifo letu ola ehena popepi.’ (Luk. 21:28) Nokuli nonande oiwana ye limanga kumwe, okwe tu ponokele, ohatu ka twikila okulineekela muJehova. Jehova ota ka longifa ovaengeli ve tu amene note ke tu pa omalombwelo, oo taa xupifa eemwenyo. Omalombwelo oo ohatu ke a pewa ngahelipi? Natu kale ashike twa teelela. Ashike otashi dulika tu a pewe okupitila momaongalo etu. Kungaho, omaongalo etu otaa dulu okukala ‘onduda’ omo hatu ka amenwa. Ongahelipi hatu dulu okulilongekidila onakwiiwa? Natu kale tu na ekwatafano la kola novamwatate novamwameme, hatu dulika nehalo liwa komalombwelo ehangano, nokukala twa tomhwa kutya Jehova oye ta wilike ehangano laye. — Heb. 10:​24, 25; 13:17.

17. Ongahelipi to dulu okukonga ehekeleko kuJehova?

¹⁷ Nonande onghalamwenyo kaya li ipu kOvajuda ovo va li moukwatwa, Jehova okwa li e va hekeleka. Nafye ote ke tu ningila sha faafana. Onghee kashi na nee mbudi kutya oshike tashi ka ningwa po monakwiiwa, twikila okukonga ehekeleko kuJehova. Kala u na eitavelo kutya oha dimine po filufilu ovapiya vaye. Kala u na eteelelo la twa. Dimbuluka kutya ino pumbwa okukala wa tila, molwaashi Jehova oye Kalunga koye.