Momukokomoko wonghalamwenyo yetu, otwe lihonga kOmuhongi wetu Munenenene

OSHIHOPAENENWA SHOVADALI VANGE

Pexulilo lo 1950 nasha, ovadali vange ova li va tembuka okudja koItaly va ya koKindersley, moSaskatchewan, shaCanada. Diva konima yaasho, ove lihonga oshili noya ka kala oshitukulwa sha fimanenena monghalamwenyo yetu. Ohandi dimbuluka eshi nda li okaana, onda li handi kala efimbo lile moukalele pamwe noukwaneumbo wetu, onghee omafimbo amwe ohandi ningi omashendjo handi ti kutya, onda kufa “oukwafelikokolindjila” eshi ndi na omido hetatu!

Ovadali vange ova li va hepa, ashike ova tula po oshihopaenenwa shiwa shokuninga omaliyambo, opo va longele Jehova. Pashihopaenenwa, mo 1963 ova li va landifa po oinima yavo ihapu, opo va mone oimaliwa va ka kale poshoongalele shopaiwana moPasadena, California, shaU.S.A. Mo 1972 otwa li twa tembukila koTrail, British Columbia, shaCanada, osho sha li kokule neekilometa 1000 lwaapo, opo tu ka kwafele moshitukulwa omo hamu popiwa elaka lOshiitaly. Tate okwa li ha longo oilonga yokuwapaleka. Okwa li a anya okutambula ko oilonga oyo tai mu pe oimaliwa ihapu, opo a dule okuyandja elitulemo kokulongela Jehova.

Onda pandula eshi ovadali vange ve tu tulila po oshihopaenenwa shiwa novamwaina vange vatatu. Oshihopaenenwa shavo osho sha li edeulo lange lotete moilonga yaJehova. Ova honga nge oshinima osho handi dulu okudimbuluka monghalamwenyo, osho kutya: Ngeenge onda pitifa komesho ouhamba, Jehova ota ka fila nge oshisho. — Mat. 6:33.

ESHI TWA HOVELA OILONGA YEFIMBO LIYADI

Mo 1980, onda hombola Debbie, omumwameme muwa oo a li ta yandje elitulemo kokulongela Jehova. Otwa li twa hala okuya moilonga yefimbo liyadi, onghee Debbie okwa li a hovela okukokola ondjila konima yeemwedi nhatu eshi twa hombola. Konima yomudo umwe, eshi twa kala mohombo, otwa li twa tembukila keongalo linini oko kwa li ku na omhumbwe inene, nonda li nda waimina Debbie moukokolindjila.

Konima yefimbo lonhumba, otwa li twa teka omukumo notwa li twa hala okutembuka. Ashike tete, otwa li twa popya nomupashukilishikandjo. Okwe tu lombwela pahole, ashike ine tu lila okafima koluko, a ti: “Otamu naipike onghalo nyee vene. Otamu yandje unene elitulemo komashongo oo mwa taalela. Ashike ngeenge omwa yandje elitulemo koinima iwa, otamu ke i mona.” Omayele oo oo twa li twa pumbwa. (Eps. 141:5) Konima eshi twe a tula moilonga, otwa li twa didilika kutya ope na oinima ihapu iwa oyo hatu dulu okuyandja elitulemo kuyo. Vahapu meongalo ova li va hala okulonga shihapu moilonga yaJehova, mwa kwatelwa ovanyasha nosho yo ovo ve na ookaume kopahombo vehe fi eendombwedi. Osho osha li oshilihongomwa sha fimana kufye. Otwe lihonga okukala hatu yandje elitulemo koinima iwa, nokukala twe lineekela kutya Jehova ota dulu oku tu kwafela tu lididimikile eenghalo odo hatu piti mudo. (Mika 7:7) Otwa li twa hafa vali, nonghalo oya li ya xwepopala.

Ovahongi ovo ve tu honga mofikola yotete youkokolindjila ova li va longela koilongo imwe. Ove tu ulikila omafano, nova popya nafye kombinga yomashongo nosho yo omanangeko noupuna oo va mona ofimbo va li tava longele koilongo oyo. Osho oshe tu ningifa tu litulile po elalakano lokuninga ovatumwa.

Opo tu hange elalakano olo, mo 1984 otwa li twa tembukila koQuebec, shi li kokule naBritish Columbia eekilometa 4000, oko haku popiwa elaka lOshifrench. Osho osha yela kutya otwa li tu na okulihonga eputuko nosho yo elaka lipe. Eshongo vali limwe ololo kutya katwa li tu na oimaliwa ya wana. Pomhito imwe, otwa li ashike hatu li oihakautu, oyo omunafaalama a li e tu pitika tu pupudulule mepya laye. Debbie okwa kala ta teleke oihakautu oyo meenghedi dihapu da yoolokafana noya li hai tokola elaka! Kashi na nee mbudi kutya otwa li twa taalela omashongo a tya ngahelipi, otwa li twe lididimika nehafo. Kakele kaasho, otwa li tu na oushili kutya, Jehova okwa li te tu file oshisho. — Eps. 64:10.

Efiku limwe, otwa li twa yakula ongodi oyo twa li inatu teelela. Otwa li twa shivwa tu ka longe kObetel yaCanada. Otwa hangika nale twa ninga eindilo lokuya kofikola yaGilead, onghee eshi twa shivwa tu ye kObetel otwa li twa hafa, ashike otwa li yo twa uda nai. Ndele otwa li twa tambula ko eshivo olo. Eshi twa fika, otwa pula omumwatate Kenneth Little, oshilyo shOkomitiye shOshitaimbelewa, twa ti: “Ongahelipi shi na sha neindilo letu lokuya kofikola yaGilead?” Okwa nyamukula a ti: “Ohatu ka ungaunga naasho konima ngeenge omwa shivwa.”

Konima yoshivike shimwe, ame naDebbie otwa li twa shivwa koGilead. Onghee otwa li tu na okuninga etokolo. Omumwatate Little okwe tu lombwela a ti: “Kashi na nee mbudi kutya oshilonga shilipi tamu ka hoolola, oshilonga keshe oshi na ouwa nomashongo. Kape na oshilonga shi li xwepo shi dule shikwao. Ashike Jehova ota dulu oku mu nangeka noupuna moshilonga keshe.” Otwa li twa hoolola okuya kofikola yaGilead, nokonima yomido, otwa li twa mona oushili weendjovo domumwatate Little. Peemhito dimwe, ohatu longifa eendjovo odo, opo tu kwafele vamwe ovo ve na okuhoolola kutya oshinakuwanifwa shilipi tava ka tambula ko moilonga yaJehova.

ESHI TWA LI OVATUMWA

Otwa li twa tunhukwa eshi twa li vamwe vomovanafikola 24, mofikola yaGilead ondondo 83, oyo ya li ya ningilwa moBrooklyn, shaNew York, muAprili 1987. Omumwatate Ulysses Glass naJack Redford ovo va li vamwe vomovahongi vetu. Eemwedi nhano odo twa kala mofikola oyo, oda pita po ashike okamukwikolo, notwa li twa pewa eedjapo mo 6 Septemba 1987. Otwa li twa tuminwa koHaiti, pamwe naJohn nosho yo Marie Goode.

Okudja mo 1962, ovatumwa vaGilead kava li vali hava tumwa koHaiti, koinima eshi ovatumwa aveshe va fininikwa va dje mo moshilongo osho. Konima yoivike itatu, eshi twa pewa eedjapo, otwa ka hovela okulonga moHaiti, meongalo linini lovaudifi 35 olo li li mokati keemhunda. Otwa li ovanyasha, tuhe na owino notwa li hatu di meumbo lovatumwa ofye atuke. Ovanhu moshitukulwa osho ova li va hepa neenghono, navahapu kava li ve shii okulesha. Ofimbo twa li oko, ovanhu ova li ovakolokoshi omolwomakuyunguto opapolitika, tava kendabala okuumba ko epangelo koshipundi, tava ningi omakangha, nokwa li ku na oikungulu yomhepo.

Ovamwatate novamwameme vomoHaiti ova li va pama nova hafa, notwe lihonga shihapu kuvo. Vahapu ova pita meenghalo didjuu monghalamwenyo, ashike ova kala ve hole Jehova nosho yo oukalele. Omumwameme umwe omunamido, oo a li ehe shii okulesha, okwa li e shii momutwe omishangwa 150 lwaapo. Omaupyakadi oo a li moshitukulwa, okwe tu ningifa tu kale twa halelela okuudifa kutya Ouhamba waKalunga oo ashike ekandulepo lomaupyakadi ovanhu. Ohashi tu hafifa okumona ovanhu ovo twa konakona navo Ombiibeli lwanima va ninga ovakokolindjila vondjikilile, ovakokolindjila ve likalekelwa novakulunhuongalo.

Ofimbo twa li moHaiti, onda li nda shakena naTrevor, omutumwa omunyasha wOvamormon, notwa li twa mona omhito yokukundafana naye Ombiibeli oikando yonhumba. Konima yomido, onda li nda yakula onhumwafo yaye, oyo nda li inandi teelela. Okwa shanga a ti: “Ohandi ka ninginifwa poshoongalele twa taalela! Onda hala okushuna koHaiti ndi ka longe ndi li omukokolindjila e likalekelwa moshitukulwa omo nda li omutumwa wOvamormon.” Naasho osho a li a ninga oule womido dihapu, pamwe nomukulukadi waye.

OKUDJA KUEUROPE FIYO OKUAFRICA

Osha li vali shipu okuudifa koitukulwa imwe yaEurope, notwa li twa tuminwa tu ka longele oko. Otwa li twa fika moLjubljana, Slovenia mo 1992, popepi naapo ovadali vange va putukila, ofimbo inava tembukila koItaly. Oita oya li natango metifa moshitukulwa osho sha li nale Yugoslavia. Oilonga yokuudifa moshitukulwa oya kala tai pashukilwa kovamwatate vokoVienna, Austria; Zagreb, Croatia, naBelgrade, Serbia. Paife moshilongo keshe sha manguluka omu na omatungo aBetel e lifikamena po.

Otwa li tu na okulihonga natango elaka neputuko lipe. Ovanhu moshitukulwa ova li hava ti: “Jezik je težek,”osho tashi ti: “Elaka olidjuu.” Elaka ola li lidjuu tuu shili! Otwa li twa pandula ouladi wovamwatate novamwameme ovo va li va halelela okutambula ko omalunduluko oo taa ningwa kehangano, notwa li twa didilika nghee Jehova te va nangeke noupuna. Natango, otwa mona nghee Jehova a kala ta yukifa alushe oinima pahole nopefimbo la wapala. Otwe lihonga oilihongomwa ihapu eshi twa li moSlovenia, noilihongomwa ihapu oyo twa hangika twe lihonga nale oye tu kwafela tu lididimikile omashongo oo twa li twa taalela eshi twa li oko.

Ndele onghalamwenyo yetu oya twikila nokulunduluka. Mo 2000 otwa li twa tuminwa koCôte d’Ivoire, kOuninginino waAfrica. Opo nee muNovemba 2002, omolwoita yopashiwana, otwa li twa dja mo moshilongo twa ya koSierra Leone. Otwa hanga oita yopashiwana, oyo ya kwata omido 11, opo ya xulu. Osha li shidjuu okufiya po Côte d’Ivoire diva. Ashike oilihongomwa oyo twe lihonga oye tu kwafela tu twikile okukala twa hafa.

Otwa li twa yandja elitulemo kovanhu vahapu ovo va li va hala okulihonga oshili nosho yo kovamwatate novamwameme ovaholike ovo ve lididimikila oita omido dihapu. Ova li va hepa, ashike ova li va hala okutukulilafana navamwe osho ve na. Omumwameme umwe okwa li a pa Debbie oikutu. Potete, Debbie ka li a hala oku i tambula, ashike omumwameme okwa ti: “Pefimbo loita, ovamwatate koilongo iwe ova li ve tu kwafela. Paife ofye tu na okukwafela.” Otwe litulila po elalakano tu shikule oshihopaenenwa shavo.

Otwa li twa shuna koCôte d’Ivoire, ashike opa li vali pa holoka omakuyunguto. MuNovemba 2004, otwa li twa fiya po oshilongo twa ya nedakadaka, omo keshe umwe a li a pitikilwa a ye mo nondjato imwe yeekilograma 10. Otwa li twa nangala pedu mokamba yovakwaita moFrance oufiku, notwa li twa ya koSwitzerland mefiku la shikula ko. Eshi twa fika moshitaimbelewa mokati koufiku, oilyo yOkomitiye yOshitaimbelewa nosho yo ovahongi vOfikola yOkudeula mOukalele pamwe novakulukadi vavo ova li ve tu hambelela tave tu papatele, ve tu pa oikulya nosho yo eetyokolate dihapu. Osha li she tu kuma neenghono.

Otwa li twa tuminwa pakafimbo koGhana, opo nee hatu shuna koCôte d’Ivoire, eshi omakuyunguto a li a xwepopala. Molwaashi ovamwatate novamwameme ovananghenda, osho oshe tu kwafela opo tu lididimike, eshi hatu tembuka nosho yo eshi twa pewa oinakuwanifwa yopakafimbo. Ame naDebbie otwa li twa dimina kutya, nonande oshi li omukalondjikilile kovamwatate novamwameme mehangano laJehova okukala ve holafane, inatu hala okukwata okahetengi ohole ya tya ngaho. Lwanima, otwa ka didilika kutya eenghalo didjuu odo twa pita mudo oda li tadi tu deula.

ESHI TWA LI KOUSHILO WOPOKATI

Mo 2006 otwa li twa yakula onhumwafo okudja keembelewa detu da kula, hatu shiivifilwa kutya otwa pewa oshinakuwanifwa shipe koushilo wopokati. Otwa li vali twa shakeneka omashongo, twa li tu na okulihonga omalaka nosho yo omaputuko mape. Otwa li tu na okulihonga shihapu, molwaashi moshitukulwa osho omwa li mu na omaupyakadi mahapu omolwopolitika nosho yo omalongelokalunga. Otwa li tu hole omalaka a yoolokafana oo haa popiwa momaongalo, notwa li twa mona kutya ohatu dulu okukala tu li moukumwe, ngeenge otwa shikula ewiliko olo hatu pewa kehangano laJehova. Otwa lenga ovamwatate novamwameme, molwaashi ove lididimikila nouladi omapataneko okudja kovapambele vavo, kovanafikola vakwao, kovanailonga pamwe navo nosho yo kovashiinda shavo.

Mo 2012 otwa li poshoongalele she likalekelwa moTel Aviv, muIsrael. Oshoongalele osho osho sha li shotete moshitukulwa osho, omo oshiwana shaJehova sha li sha ongala momuvalu munene okudja pOpentekoste 33 O.P. Mbela oshiningwanima osho kasha li tuu shitunhula!

Momukokomoko womido odo, otwa li twa tumwa tu ka talele po oshilongo oko oilonga yetu ya shilikwa. Otwa li twa ya noishangomwa, twa ya moukalele, notwa kala poyoongalele inini. Ovakwaita va homata nosho yo omainda omeendjila okwa li keshe pamwe, ashike otwa li tu udite twa amenwa, eshi hatu ende nelungi pamwe novaudifi vonhumba.

ESHI TWA SHUNA KUAFRICA

Mo 2013 otwa li twa pewa oshinakuwanifwa sha yoolokafana tu ka longe koshitaimbelewa moKinshasa, Congo, oshilongo osho sha li shi na omutalelo muwa, ashike osha li shi na oluhepo nosho yo oita ihapu. Potete otwa ti: “Otu shii mo muAfrica; otwe lilongekida.” Ashike natango otwa li tu na okulihonga shihapu, unene tuu eshi twa li tu na okweenda moitukulwa oyo ya li ihe na eepate nosho yo eenhopa. Otwa li twa mona oinima ihapu iwa oyo twa li twa yandja elitulemo kuyo, ngaashi okumona ovamwatate novamwameme ovadiinini nova hafa, nokuli nonande otava piti meenghalo didjuu, eshi ve hole oukalele nosho yo eenghendabala odo tava ningi, opo va kale pokwoongala nosho yo poyoongalele. Otwa li twa mona kutya oilonga yOuhamba otai pondola ashike kekwafo laJehova nosho yo kenangeko noupuna laye. Momukokomoko womido odo twa kala moilonga yefimbo liyadi moCongo, otwe lihonga oilihongomwa ya fimana notwa mona ookaume ovo ve li onga oukwaneumbo wetu.

Pexulilo lo 2017, otwa li twa tuminwa koSouth Africa. Inatu longa nande onale moshitaimbelewa sha kula sha fa osho, notwa li twa pewa oinakuwanifwa ipe oyo inatu longa nande onale. Natango otwa li tu na okulihonga oinima ihapu, ashike oilihongomwa oyo twe lihonga monakudiwa oye tu kwafela. Otu hole ovamwatate novamwameme ovo ve lididimika omido dihapu. Oshihafifa okumona oukwaneumbo waBetel tau longo moukumwe nonande owa dja momaputuko nosho yo momihoko da yoolokafana. Osho otashi yandje oumbangi kutya, Jehova ota nangeke noupuna oshiwana shaye nombili, molwaashi osha djala omunhu mupe, notashi tula moilonga omafinamhango Ombiibeli.

Momukokomoko womido, ame naDebbie otwa li twa pewa oinakuwanifwa itunhula, twa li tu na okutambula ko omaputuko a yoolokafana nosho yo okulihonga omalaka mape. Haalushe sha li shipu, ashike otwa li tu udite kutya Jehova ota longifa ehangano laye nosho yo ovamwatate novamwameme ve tu ulikile ohole yaye i na oudiinini. (Eps. 144:2) Oilonga yefimbo liyadi oye tu deula tu kale ovapiya vaJehova ve li xwepo.

Onda pandula neenghono osho ovadali vange va honga nge, ekwafo lomuholike wange Debbie nosho yo oihopaenenwa iwa yovamwatate novamwameme mounyuni aushe. Eshi ame nomukulukadi wange hatu diladila kombinga yonakwiiwa, otwa tokola toko okutwikila okulihonga oilihongomwa kOmuhongi wetu Munenenene.