Kunena, ohatu dulu ngoo okumona ouwa moinima oyo twe lihonga eshi opo twa hovele okukonakona Ombiibeli?

1. Oinima oyo twe lihonga tete eshi twa hovela okukonakona Ombiibeli oye tu etela ouwa ulipi?

OINIMA oyo twe lihonga eshi twa hovela okukonakona Ombiibeli oye tu etela ouwa. Pashihopaenenwa, eshi twe lihonga kutya edina laKalunga oJehova, otwa panga oukaume naye. (Jes. 42:8) Eshi twe lihonga kutya oonakufya ove li monghalo ya tya ngahelipi, ihatu kala vali twa tila kutya ovaholike vetu ovo va fya otava mono oixuna. (Omuud. 9:10) Eshi twe lihonga kutya Kalunga okwa udaneka Oparadisa kombada yedu, ihatu kala vali twa limbililwa shi na sha nonakwiiwa. Otwa tomhwa kutya ohatu dulu okukala nomwenyo efimbo lile, ndele haule ashike wefimbo lixupi, eedula 70, ile 80, ndele ofiyo alushe. — Eps. 37:29; 90:10.

2. Ongahelipi 2 Petrus 1:​12, 13 ta ulike kutya, nokuli nOvakriste ovo va longela Jehova oule womido otava dulu okumona ouwa moinima oyo ve lihonga tete, eshi va hovela okukonakona Ombiibeli?

² Inatu kwata okahetengi oinima oyo twe lihonga eshi twa hovela okukonakona Ombiibeli. Omuyapostoli Petrus okwa li a shangela Ovakriste, ovo va “pamenena moshili,” monhumwafo yaye onhivali. (Lesha 2 Petrus 1:​12, 13.) Ndele nande ongaho, opa li oinima yonhumba meongalo oyo ya li tai dulu okunyona po ekwatafano lavo naJehova, mwa kwatelwa ovahongi ovanaipupulu nosho yo ovalongi vowii. (2 Pet. 2:​1-3) Petrus okwa li a hala okupameka ovamwaxe, opo va dule okukondjifa omashongo oo. Onghee okwa li e va dimbulukifa omahongo amwe oo va li ve lihonga nale. Omahongo oo okwa li tae ke va kwafela va kale ovadiinini kuJehova.

3. Omolwashike Ovakriste aveshe va pumbwa okutwikila okudilonga moule kombinga yoinima oyo ve lihonga, eshi va hovela okukonakona Ombiibeli? Shi faneka.

³ Nonande otwa longela Jehova oule womido, ohatu dulu okumona ouwa moinima oyo twe lihonga tete, eshi twa hovela okukonakona Ombiibeli. Oku shi faneka: Omuteleki oo e na owino naao ehe na owino, otava dulu okulongifa oikulya noinyenyepeki ya faafana, opo va teleke eendja. Ndele mokweendela ko kwefimbo, omuteleki oo e na owino, ota dulu okulongifa oikulya noinyenyepeki oyo tuu oyo, opo a teleke eendja da yoolokafana notadi tokola elaka, e dule oo ehe na owino. Sha faafana, ovo va longela Jehova oule womido otava dulu okulihonga oilihongomwa ihapu momishangwa odo ve shii nale, ve dule ovo opo va hovele okukonakona Ombiibeli. Omolwashike mbela? Eenghalo detu, ile oinakuwanifwa oyo twa kala tu na mehangano laJehova otashi dulika ya kala nokulunduluka okudja eshi twa ninginifwa. Ngeenge otwa dilonga koinima oyo twe lihonga, eshi opo twa hovele okukonakona Ombiibeli, ohatu dulu okumona mo omafinamhango oo hatu dulu okulongifa kunena monghalamwenyo yetu. Natu ka taleni osho Ovakriste va pyokoka tava dulu okulihonga moinima yopatatu oyo ve lihonga eshi va hovela okukonakona Ombiibeli.

JEHOVA OYE OMUSHITI

4. Ongahelipi okushiiva kutya Jehova oye Omushiti sha kuma onghalamwenyo yetu?

⁴ “Kalunga oye a shita oinima aishe.” (Heb. 3:4) Otu shii kutya edu nosho yo oinima i na omwenyo oyo i li ko, oya shitwa kOmushiti omunaendunge a shiya ko nomunaenghono adishe. Oye e tu shita, onghee oku tu shii nawanawa. Kakele kaasho, ohe tu file oshisho. Oku shii yo osho sha denga mbada kufye. Onghee okushiiva kutya Jehova oye Omushiti, osha kuma onghalamwenyo yetu monghedi itunhula, noshe tu kwafela tu kale tu na onghalamwenyo i na eityo.

5. Oushili ulipi tau dulu oku tu kwafela tu kale ovalininipiki? (Jesaja 45:​9-12)

⁵ Okukala tu shii kutya Jehova oye Omushiti otashi tu hongo yo okukala ovalininipiki. Eshi Job a kala ta yandje unene elitulemo kuye mwene nosho yo kovanhu vakwao, Jehova okwa li e mu dimbulukifa kutya oku li Omushiti omunaenghono adishe. (Job 38:​1-4) Osho osha li sha kwafela Job a dimbuluke kutya Jehova oha longo alushe osho sha yuka. Omuprofeti Jesaja okwa ka popya lwanima metwokumwe naasho, a ti: “Mbela elova otali ka tya kOmumi: ‘Oto ningi shike?’” — Lesha Jesaja 45:​9-12.

6. Omonghalo ilipi twa pumbwa unene okudilonga kombinga younongo nounene waJehova uhe fi okuyelekwa? (Tala yo omafano.)

⁶ Ngeenge Omukriste okwa kala ta longele Jehova oule womido, otashi dulika a hovele okukala e lineekela unene muye mwene, ponhele yokulineekela muJehova nosho yo mewiliko lEendjovo daye. (Job 37:​23, 24) Ndele ngeenge okwa dilonga moule kombinga younongo nounene waJehova uhe fi okuyelekwa, otashi ke mu kwafela a kale omulininipiki. — Jes. 40:22; 55:​8, 9.

7. Rahela okwa li a ninga po shike, opo a dule okutambula ko omalunduluko?

⁷ Rahela, oo ha di koSlovenia, okwa li a mona kutya okudiladila kombinga yOmushiti oshe mu kwafela a tambule ko omalunduluko oo taa ningwa mehangano. Okwa ti: “Omafimbo amwe, ihashi kala shipu kwaame okutambula ko omalunduluko oo taa ningwa kwaavo tava kwatele komesho. Pashihopaenenwa, nokuli nokonima eshi nda tala Olaporta yOlutuwiliki yomo 2023 #8, onda li nda kumwa eshi nda mona oshikando shange shotete omumwatate e na eendjedi ta yandje oshipopiwa. Onghee onda ilikana Jehova a kwafele nge ndi tambule ko elunduluko olo.” Rahela okwa li a didilika kutya molwaashi Jehova oye Omushiti weulu nedu, oha wilike alushe ehangano laye monghedi ya denga mbada. Ngeenge oho mono shidjuu okuuda ko eudeko, ile ewiliko lipe, dilonga moule kounongo uhe fi okuyelekwa nosho yo keenghono dinenenene dOmushiti wetu. — Rom. 11:​33-36.

OMOLWASHIKE KALUNGA A EFA OKUMONA OIXUNA KU KALE PO?

8. Ouwa ulipi twa mona, eshi twe lihonga kutya omolwashike Kalunga a efa okumona oixuna ku kale po?

⁸ Omolwashike Kalunga a efa okumona oixuna ku kale po? Ovanhu vamwe ovo vehe shii enyamukulo lepulo olo, otashi dulika va handukile Kalunga, ile va fike pexulifodiladilo kutya ke ko. (Omayel. 19:3) Ashike ove owe lihonga kutya ovanhu ohava mono oixuna omolwoufyuululwalunde nokuhawanenena, ndele Jehova haye ha etifa okumona oixuna. Owe lihonga yo kutya molwaashi Jehova oku na onheni noina xulifa po okumona oixuna natango, osha kwafela ovanhu omamiliyona va dule oku mu shiiva nove lihonge nghee ta ka xulifa po okumona oixuna. (2 Pet. 3:​9, 15) Okushiiva kutya omolwashike Kalunga a efa okumona oixuna ku kale po, oshe ku hekeleka, noshe ku kwafela u ehene popepi naye.

9. Omeenghalo dilipi tashi dulika hatu kala twa pumbwa okulidimbulukifa kutya omolwashike Jehova a efa okumona oixuna ku kale po?

⁹ Otwa pumbwa elididimiko, ofimbo twa teelela Jehova a xulife po okumona oixuna. Ndele nande ongaho, ngeenge fye, ile ovaholike vetu tava mono oixuna, tava ningilwa okuhenouyuki, ile twa filwa, otashi dulika tu handuke molwaashi otu wete Jehova ita xulifa po diva okumona oixuna. (Hab. 1:​2, 3) Peemhito da tya ngaho, otwa pumbwa okulidimbulukifa kutya omolwashike Jehova a efa ovayuki va mone oixuna.a (Eps. 34:19) Ohatu dulu yo okukonakona kutya omolwashike a tokola oku ka xulifa po okumona oixuna.

10. Oshike sha hekeleka Anne, eshi a filwa ina?

¹⁰ Okushiiva kutya omolwashike Kalunga a efa okumona oixuna ku kale po, otashi tu kwafele tu lididimike. Anne, oo ha di kokanhunhu kaMayotte, ke li mefuta laIndia, okwa ti: “Eshi meme a fya omido da pita, onda li nda nyika oluhodi neenghono. Ashike, ohandi lidimbulukifa pandjikilile kutya Jehova haye ha etifa okumona oixuna. Okwa halelela okuxulifa po okumona oixuna kwoludi keshe, nokunyumuna ovaholike vetu. Okudilonga koushili oo, ohashi kwafele nge ndi kale ndi na ombili yopamadiladilo, nonande onda nyika oluhodi.”

11. Ongahelipi okushiiva kutya omolwashike Jehova a efa okumona oixuna ku kale po tashi tu kwafele tu twikile okuudifa?

¹¹ Okushiiva kutya omolwashike Kalunga a efa okumona oixuna ku kale po, otashi dulu oku tu twa omukumo tu twikile okuudifa. Konima eshi Petrus a yelifa kutya Jehova ote lididimike, molwaashi a hala ovanhu ve lidilulule opo va ka xupifwe, okwa shanga a ti: “Diladileni kutya omu na okuhangika mwa tya ngahelipi. Kaleni mu na elihumbato la koshoka nokulonga oilonga yometilokalunga.” (2 Pet. 3:11) “Oilonga yometilokalunga” oya kwatela mo oukalele. Ngaashi Tate yetu, nafye otu hole ovanhu. Otwa hala va ka kale nomwenyo mounyuni mupe waKalunga. Molwaashi Jehova omulididimiki, okwa pa ovanhu moshitukulwa sheni omhito, opo va dule oku mu longela. Ou na oufembanghenda wokulonga pamwe naKalunga, nokukwafela ovanhu vahapu ngaashi tashi dulika ve lihonge kombinga yaye, ofimbo exulilo inali uya. — 1 Kor. 3:9.

OTU LI “MOMAFIKU AXUUNINWA”

12. Ouwa ulipi twa mona eshi twe lihonga kutya otu li “momafiku axuuninwa”?

¹² Ombiibeli oya popya kutya ovanhu otava ka kala va tya ngahelipi “momafiku axuuninwa.” (2 Tim. 3:​1-5) Otu wete nghee exunganeko olo tali wanifwa, okutala kelihumbato lovanhu ovo ve tu dingilila. Okutala nghee omaukwatya nelihumbato lovanhu tali ende tali naipala, otwa tomhwa kutya Eendjovo daKalunga odi shii okulineekelwa. — 2 Tim. 3:​13-15.

13. Omapulo elipi hatu dulu okulipula metwokumwe nefaneko laJesus oli li muLukas 12:​15-21?

¹³ Okushiiva kutya otu li momafiku axuuninwa, otashi tu kwafele tu yandje elitulemo koinima oyo ya fimanenena. Ohatu tu dulu okulihonga nghee sha fimana okuninga ngaho mefaneko laJesus olo li li muLukas 12:​15-21. (Lesha.) Omolwashike omulumenhu oshipuna a ifanwa “elai”? Hamolwaashi a li oshipuna, ndele omolwaashi a li a pitifa komesho oinima inai fimana. Okwa li e ‘lituvikilila emona, ashike ke na emona kuKalunga.’ Omolwashike hatu dulu okutya ina longifa efimbo laye nawa? Kalunga okwe mu lombwela a ti: “Omwenyo woye oto u kufwa oufiku wonena.” Kunena, eshi exulilo lounyuni ou tali ende tali ehene popepi, ohatu dulu okulipula kutya: ‘Onde litulila po ngoo omalalakano oo taa ulike kutya ohandi longifa nawa efimbo lange? Ongahelipi handi dulu okukwafela ounona vange ve litulile po omalalakano mawa? Mbela ohandi longifa eenghono, efimbo nosho yo oiniwe yange ndi lituvikilile omamona opambelela, ile ondi lituvikilile omamona meulu?’

14. Ongahelipi oshimoniwa shaMiki tashi tu kwafele tu mone nghee sha fimana okukala tu shii kutya otu li momafiku axuuninwa?

¹⁴ Ngeenge otwa diladila moule kutya otu li momafiku axuuninwa, otashi dulu oku tu kwafela tu shiive kutya omatokolo elipi tu na okuninga monghalamwenyo yetu. Osho osha li sha ningilwa omumwameme wedina Miki. Okwa ti: “Eshi nda mana osekondele, onda li nda halelela oilonga yokukonakona oinamwenyo. Onda li yo nde litulila po elalakano lokuninga omukokolindjila wondjikilile noku ka longa oko ku na omhumbwe inene. Ovamwatate novamwameme vamwe va pyokoka meongalo ova li va lombwela nge ndi diladile nawa, ngeenge oilonga oyo nda hala otai ka pitika nge ngoo ndi kokole ondjila, ile ndi ka longe oko ku na omhumbwe inene. Ova dimbulukifa nge kutya ounyuni ou li pokuxula po mafiku. Kakele kaasho, mounyuni mupe, ohandi ka kala ndi na omhito yokukonakona oinamwenyo ihapu fiyo alushe. Onghee onda li nda hoolola okulihongela sha osho tashi pula efimbo lixupi nondi mone ounghulungu oo tau dulu okukwafela nge. Osho osha kwafela nge ndi mone oilonga ndi liyambidide ndi li omukokolindjila wondjikilile, nolwanima onda li nda tembukila koEcuador, oko ku na omhumbwe inene.” Miki nomushamane waye paife ove li moilonga youpashukilishikandjo moshilongo osho.

15. Ovanhu otashi dulika ve linyenge ngahelipi konghundana iwa? Yandja oshihopaenenwa. (Tala yo omafano.)

¹⁵ Inatu pumbwa okuteka omukumo, ngeenge ovanhu itava tambula ko onghundana iwa. Ovanhu ohava lunduluka. Diladila koshihopaenenwa shaJakob, omumwaina waJesus. Okwa li a mona eshi Jesus ta kulu, ta ningi Messias nokuhonga ovanhu. Ashike ka li a ninga omushikuli waJesus oule womido. Okwa ka ninga ashike omuhongwa omuladi konima eshi Jesus a nyumuka.b (Joh. 7:5; Gal. 2:9) Onghee hano, ino sholola okuudifila ovapambele, ovo vehe na natango ohokwe, ile ovanhu ovo va li nale ihava pwilikine ketumwalaka lOuhamba. Dimbuluka kutya otu li momafiku axuuninwa, onghee oilonga yokuudifa oya endelela. Osho to va lombwele kunena, otashi dulika ve ke shi dimbuluke, nokuli nokonima eshi oudjuu munene wa hovela.c

KALA U NA OLUPANDU LI NA SHA NOMADIMBULUKIFO AJEHOVA

16. Ongahelipi wa mona ouwa momadimbulukifo aJehova? (Tala yo oshimhungu “Longifa oshili yOmbiibeli u kwafele vamwe.”)

¹⁶ Ouyelele umwe wa kanghamena kOmbiibeli, oo hatu pewa kehangano, ohau kala wa nuninwa ovanhu ovo ve na eshiivo linini lOmbiibeli. Pashihopaenenwa, oipopiwa yetu yomoipafi, oitukulwa imwe nouvidio vamwe ko jw.org nosho yo oifo yomoukalele, oya longekidilwa unene ovanhu ovo vehe fi Eendombwedi. Ndele nande ongaho, ohatu mono ouwa momadimbulukifo oo. Ohae tu kwafele tu kale tu hole Jehova nomutima aushe, tu pameke eitavelo letu mEendjovo daye, notu pondole eshi hatu hongo vamwe oshili yOmbiibeli. — Eps. 19:7.

17. Omeenghalo dilipi tashi dulika wa pumbwa okudilonga koinima oyo we lihonga, eshi wa hovela okukonakona Ombiibeli?

¹⁷ Tu li Eendombwedi daJehova, ohatu kala twa tunhukwa, ngeenge eudeko letu loshili yOmbiibeli la pepalekwa. Ashike otwa pandula yo neenghono omolwoinima oyo twe lihonga eshi opo twa hovele okukonakona Ombiibeli, oyo ye tu kwafela tu pange oukaume naJehova. Ngeenge hatu pewa ewiliko okudja kehangano, ndele ohatu diladila kutya etaleko letu, ile onghedi yetu yokuninga oinima oyo i li mondjila, oshiwa okudimbuluka nelininipiko kutya Jehova, Omushiti wetu omunaendunge nomunaenghono adishe, oye ta wilike ehangano laye. Ngeenge fye, ile ovaholike vetu tave lididimikile eyeleko, natu kale ovalididimiki nokudilonga kutya omolwashike Jehova a efa okumona oixuna ku kale po. Ngeenge hatu tokola kutya ohatu ka longifa ngahelipi efimbo noiniwe yetu, natu dimbuluke kutya otu li momafiku axuuninwa, nonokutya exulilo oli li popepi. Onghee omadimbulukifo aJehova naa twikile oku tu pameka, oku tu twa omukumo, noku tu kwafela tu kale ovanaendunge.