Kala u na elineekelo kutya Jehova oku ku hole

1. Omolwashike we liyapulila Jehova? (Tala yo efano.)

MBELA oto dimbuluka eshi we liyapulila Jehova? Owa ninga etokolo olo, molwaashi owe mu shiiva nou mu hole. Owe mu udanekela kutya oto ka pitifa komesho oku mu longela monghalamwenyo yoye, noto ka twikila okukala u mu hole nomutima woye aushe, nomwenyo woye aushe, nomadiladilo oye aeshe neenghono doye adishe. (Mark. 12:30) Okudja efiku olo, owa kala u mu hole neenghono shi dulife nale. Mbela oto ka nyamukula ngahelipi, ngeenge umwe okwe ku pula ta ti: “Mbela ou hole ngoo shili Jehova?” Nopehe na okwoongaonga, oto ka tya, “Kape na oshinima, ile omunhu ndi hole unene e dulife Jehova!”

2-3. Jehova okwa hala tu kale twa tomhwa kushike, noshike hatu ka kundafana moshitukulwa eshi? (Jeremia 31:3)

² Mbela oto ka nyamukula ngahelipi ngeenge umwe okwe ku pula ta ti: “Mbela owa tomhwa ngoo kutya Jehova oku ku hole shili?” Mbela oto ka ongaonga okunyamukula, tashi dulika to diladila kutya ino wana okukala u holike kuJehova? Omumwameme umwe, oo a tekulwa nonyanya, okwa ti: “Ondi shii kutya ondi hole Jehova, nokandi na omalimbililo kombinga yaasho. Ashike luhapu ohandi kala nda limbililwa, handi lipula ngeenge Jehova oku hole nge ngoo shili.” Ndele mbela Jehova oku ku uditile ngahelipi?

³ Jehova okwa hala u kale wa tomhwa kutya oku ku hole. (Lesha Jeremia 31:3.) Oushili oyoo kutya Jehova okwe ku nanena kuye. Okwe ku ulikila ohole i na oudiinini, eshi we mu liyapulila nokuninginifwa. Ohole ya tya ngaho oyomoule notai kalelele. Oye mu linyengifa a kale a tala ko ovalongeli vaye ovadiinini, naave wa kwatelwa mo, ve li ‘emona laye li na ondilo.’ (Mal. 3:17) Jehova okwa hala u kale wa tomhwa kutya oku ku hole, ngaashi omuyapostoli Paulus oo a li a tomhwa kutya oku mu hole. Paulus okwa shanga a tomhwa, ta ti: “Onda tomhwa filufilu kutya, kutya nee efyo, omwenyo, ovaengeli, omapangelo, oinima ei yopaife ile oyoyo tai uya ile eenghono, oule wopombada ile oule wopedu, ile oshishitwa shonhumba, itai dulu oku tu tukula mohole yaKalunga.” (Rom. 8:​38, 39) Moshitukulwa eshi, ohatu ka kundafana kutya omolwashike twa pumbwa okukala twa tomhwa kutya Jehova oku tu hole, nohatu ka tala osho tashi dulu oku tu kwafela tu ninge ngaho.

OMOLWASHIKE TWA PUMBWA OKUKALA TWA TOMHWA KUTYA JEHOVA OKU TU HOLE?

4. Ongahelipi hatu dulu okulwifa limwe lomomakoto aSatana?

⁴ Ngeenge otwa kala twa tomhwa kutya Jehova oku tu hole, ohatu dulu okufinda limwe ‘lomomakoto aSatana.’ (Ef. 6:11) Satana ota ka ninga keshe osho ta dulu, opo e tu imbe tu longele Jehova. Limwe lomomakoto aSatana olo okutandavelekifa oipupulu kutya Jehova ke tu hole. Inatu dimbwa kutya Satana oha kendabala okulongifa omhito keshe ta mono. Luhapu ohe tu ponokele ngeenge twa wililwa po pamaliudo omolwoiningwanima yomonakudiwa, omashongo oo twa taalela paife, ile molwaashi tuhe shii osho tashi ka ningwa monakwiiwa. (Omayel. 24:10) Satana okwa fa onghoshi oyo hai kala ya hala okuponokela oinamwenyo oyo ya nghundipala. Onghee oha kendabala oku tu yula, unene tuu pomhito opo twa wililwa po pamadiladilo, opo e tu ningife tu sholole notu efe po okulongela Jehova. Ashike ngeenge otwa kala twa tomhwa kutya Jehova oku tu hole, ohatu ka kala twe lilongekida ‘okulwifa’ Satana nomakoto aye. — 1 Pet. 5:​8, 9; Jak. 4:7.

5. Omolwashike twa pumbwa okukala tu udite tu holike notwa lengwa kuJehova?

⁵ Ohatu ka ehena popepi naJehova, ngeenge otwa kala twa tomhwa kutya oku tu hole. Natu ka tale kutya omolwashike hatu tile ngaho. Jehova okwe tu shita tu kale tu na ohole noku i ulikilwa. Oshi li paushitwe okuulika ohole, ngeenge we i ulikilwa. Onghee ngeenge tu wete Jehova te tu ulikile ohole nokwe tu lenga, ohashi tu linyengifa nafye tu mu ulikile ohole. (1 Joh. 4:19) Ngeenge otwa kala tu mu hole neenghono, naye ota ka kala e tu hole. Ombiibeli oye tu lombwela ya ti: “Eheneni popepi naKalunga, opo nee ota ka ehena popepi nanye.” (Jak. 4:8) Ndele mbela ongahelipi hatu dulu okukala twa tomhwa kutya Jehova oku tu hole?

OSHIKE TASHI DULU OKU TU KWAFELA, OPO TU KALE TWA TOMHWA KUTYA JEHOVA OKU TU HOLE?

6. Opo tu kale twa tomhwa kutya Jehova oku tu hole, ohatu dulu okwiilikana kombinga yashike?

⁶ Kala ho ilikana kondadalunde to shi ningi lwoikando. (Luk. 18:1; Rom. 12:12) Ngeenge otashi shiiva, pula Jehova lwoikando efiku keshe e ku kwafele u kale we litala ko ngaashi e ku tala ko. Oshoshili kutya haalushe hashi kala shipu okukala twa tomhwa kutya Jehova oku tu hole. Ashike dimbuluka kutya Jehova oku dule omutima woye. (1 Joh. 3:​19, 20) Oku ku shii nawa shi dulife eshi ove mwene u lishii, noku wete osho tashi dulika i to dulu okumona. (1 Sam. 16:7; 2 Omaf. 6:30) Onghee ino ongaonga oku mu ‘mbubulila’ omaliudo oye, to mu pula e ku kwafele u kale wa tomhwa kutya oku ku hole. (Eps. 62:8) Opo nee katuka metwokumwe nomailikano oye mokutula moilonga omaetepo taa shikula.

7-8. Omapsalme otae tu shilipaleke ngahelipi kutya Jehova oku tu hole?

⁷ Kala we lineekela meendjovo daJehova. Jehova okwa nwefa mo ovashangi vOmbiibeli va popye oshili kombinga yaye. Natu ka tale kunghee omupsalme David a popya kombinga yaJehova. Okwa ti: “Jehova oku li popepi naavo ve na omitima da teyauka; oha xupifa ovo va teka omukumo.” (Eps. 34:18) Ngeenge wa teka omukumo, otashi dulika u kale u udite u li oove auke. Ashike Jehova okwa udaneka kutya, ngeenge to piti monghalo ya tya ngaho, ota ka kala popepi naave, molwaashi oku shii kutya owe mu pumbwa unene shi dulife nale. Mepsalme likwao, David okwa shanga a ti: “Ongela omahodi ange mombao yoye.” (Eps. 56:8) Jehova oku wete onghalo oyo to ungaunga nayo. Oku na ko nasha filufilu naave nosho yo onghalo oyo to piti muyo. Oku shi popya noitya imwe, Jehova oha ongele omahodi oye noha kala e a lenga, ngaashi ashike omweendanandjila ha kala a lenga omeva oo e li mombao yaye. Epsalme 139:3 otali ti: “[Jehova] ou shii eendjila dange adishe.” Jehova oku wete ashishe osho hatu ningi, ashike oha yandje unene elitulemo kouwa oo hatu longo. (Heb. 6:10) Omolwashike? Omolwaashi okwa lenga neenghono onghendabala keshe to ningi, opo u mu hafife.a

⁸ Eshi Jehova e tu pa omishangwa tadi hekeleke, odo di li mEendjovo daye da nwefwa mo, okwa fa te tu lombwele ta ti: “Onda hala u kale u shii kutya ondi ku hole shi fike peni nondi na ko nasha naave.” Ashike ngaashi twe li honga pehovelo, Satana oha tandaveleke oipupulu oyo kutya Jehova ke tu hole. Onghee ngeenge omafimbo amwe owa kala wa limbililwa kutya Jehova oku ku hole ngoo, kanghama, ndele to lipula kutya, ‘Mbela olyelye nde lineekela, “oxe yoipupulu,” ile “oKalunga koshili”?’ — Joh. 8:44; Eps. 31:5.

9. Eshilipaleko lilipi Jehova a pa ovo ve mu hole? (Exodus 20:​5, 6)

⁹ Diladila kunghee Jehova ha kala e uditile ovo ve mu hole. Natu ka tale kwaasho Jehova a lombwela Moses nosho yo Ovaisrael. (Lesha Exodus 20:​5, 6.) Jehova okwa li a udaneka kutya ota ka twikila okuulikila ovo ve mu hole ohole i na oudiinini. Eendjovo odo otadi tu shilipaleke kutya Kalunga ketu omudiinini ke na efiku a kale a ulikilwa ohole kovalongeli vaye, ndele ta kala ine va ulikila yo ohole. (Neh. 1:5) Onghee ngeenge omafimbo amwe owa limbililwa kutya Jehova oku ku hole ngoo, kanghama, ndele to lipula kutya, ‘Mbela ondi hole ngoo Jehova?’ Ngeenge ou hole Jehova, noho kendabala ngaashi to dulu, opo u mu hafife, kala wa shilipalekwa kutya Jehova oku ku hole neenghono. (Dan. 9:4; 1 Kor. 8:3) Noitya imwe, ngeenge ku na omalimbililo kutya ou hole Jehova, omolwashike to ka kala wa limbililwa ngeenge Jehova oku ku hole ngoo? Kape na omalimbililo kutya Jehova oku ku hole noite ku fiye po.

10-11. Jehova okwa hala u kale wa tala ko ngahelipi ekuliloyambo? (Ovagalati 2:20)

¹⁰ Dilonga kekuliloyambo. Ekuliloyambo laJesus Kristus oli li oshali ya denga mbada oyo Jehova a pa ovanhu. (Joh. 3:16) Mbela oshali oyo okwe i ku pa pauhandimwe? Heeno! Diladila koshimoniwa shomuyapostoli Paulus. Paulus okwa li a nyona omanyono a kwata moiti ofimbo ina ninga Omukriste, nokwa li e na okutwikila okukondjifa okuhawanenena kwaye. (Rom. 7:​24, 25; 1 Tim. 1:​12-14) Ndele nande ongaho, okwa li a tala ko ekuliloyambo li li oshali oyo Jehova e mu pa pauhandimwe. (Lesha Ovagalati 2:20.) Dimbuluka kutya Jehova oye a li a nwefa mo Paulus a shange eendjovo odo. Noinima aishe oyo i li mOmbiibeli oi lile po oku tu honga. (Rom. 15:4) Onghee eendjovo daPaulus otadi ulike kutya Jehova okwa hala u tale ko ekuliloyambo li li oshali oyo e ku pa pauhandimwe. Ngeenge owa kala wa tala ko ekuliloyambo monghedi ya tya ngaho, oto ka kala wa tomhwa kutya Jehova oku ku hole pauhandimwe.

¹¹ Ohatu pandula Jehova eshi a tuma Jesus e uye kombada yedu, opo e tu file. Ashike Jesus okwa li yo e uya kombada yedu, opo a lombwele vamwe oshili kombinga yaKalunga. (Joh. 18:37) Oshili oyo oya kwatela mo nghee Jehova e uditile ovana vaye.

NGHEE JESUS HE TU KWAFELE TU KALE TWA TOMHWA KUTYA JEHOVA OKU TU HOLE

12. Omolwashike hatu dulu okulineekela osho Jesus a popya kombinga Jehova?

¹² Eshi Jesus a li kombada yedu, okwa li a ulika kutya Jehova omunhu naanaa a tya ngahelipi. (Luk. 10:22) Ohatu dulu okulineekela filufilu mwaasho Jesus a popya kombinga yaJehova. Jesus okwa kala naJehova meulu oule wefimbo lile, ofimbo ine uya kombada yedu. (Kol. 1:15) Onghee Jesus okwa li a mona kutya Jehova oku hole ovana vaye shi fike peni. Mbela ongahelipi Jesus ha kwafele vamwe va kale va tomhwa kutya Kalunga oku va hole?

13. Jesus okwa hala tu kale twa tala ko ngahelipi Jehova?

¹³ Jesus okwa hala tu kale twa tala ko Jehova ngaashi ye e mu tala ko. Jesus okwa popya kombinga yaJehova e li “Xe” lwoikando 160 mOmavaengeli. Ngeenge a li ta popi novashikuli vaye, okwa li ha longifa omautumbulilo ngaashi “Xo yeni,” ile “Xo yeni womeulu.” (Mat. 5:16; 6:26) Ofimbo Jesus ine uya kombada yedu, ovapiya vaJehova ovadiinini ova li hava ifana Jehova e li ‘Omunaenghono adishe, Omukombadambada, Omushiti Munenenene’ nosho yo omadinafimaneko amwe vali. Ashike luhapu Jesus okwa li ha ifana Jehova “Tate” yetu. Osha yela kutya Jesus okwa hala tu tale ko Jehova ngaashi e mu tala ko, e li Tate yetu, oo e hole ovana vaye ve na ondilo. Natu ka konakoneni oihopaenenwa yopavali omo Jesus a longifa outumbulilo “Tate.”

14. Jesus okwa ulika ngahelipi kutya keshe umwe womufye oku na ondilo momesho aTate yetu womeulu? (Mateus 10:​29-31) (Tala yo efano.)

¹⁴ Tete, natu ka konakoneni eendjovo daJesus odo di li muMateus 10:​29-31. (Lesha.) Oudila voiyandja ovanini nokave na efiku va kale ve hole Jehova, ile ve mu longele. Ashike nande ongaho, Tate yetu okwa lenga okadila keshe, nohe ka didilike ngeenge ka wila pedu. Mbela ita ka kala a lenga nokufila oshisho omupiya waye keshe, oo he mu longele te linyengifwa kohole? Jesus okwa ti yo kutya Tate yetu oku shii omuvalu ‘weexwiki detu dokomitwe.’ Molwaashi Jehova oku shii okanima keshe kanini kombinga yetu, ohatu dulu okukala tu na oushili kutya oku na ko nasha nafye neenghono. Kape na omalimbililo kutya Jesus okwa hala tu kale tu shii kutya keshe umwe womufye oku na ondilo momesho aTate yetu womeulu.

15. Eendjovo daJesus odo di li muJohannes 6:44 otadi ku lombwele shike kombinga yaTate woye womeulu?

¹⁵ Didilika oshihopaenenwa oshitivali omo Jesus a longifa outumbulilo “Tate.” (Lesha Johannes 6:44.) Tate woye womeulu okwe ku nanena moshili pauhandimwe. Omolwashike e ku nanena moshili? Omolwaashi okwa mona omaukwatya mawa e li momutima woye. (Oil. 13:48) Eshi Jesus a popya eendjovo odo di li muJohannes 6:​44, otashi dulika a li ta ulike keendjovo daJehova odo di li muJeremia 31:3. Jehova okwa lombwela oshiwana shaye a ti: ‘Onde ku shilila kwaame nohole i na oudiinini.’ (Jer. 31:3; yelekanifa Hosea 11:4.) Diladila kutya osho osha hala okutya ngahelipi. Tate yetu womeulu omunahole ota twikile okumona momutima woye omaukwatya mawa oo tashi dulika ito dulu okumona ove mwene.

16. (a) Jesus ote tu lombwele shike, nomolwashike twa pumbwa oku mu lineekela? (b) Ongahelipi hatu dulu okupameka elineekelo letu kutya Jehova oku li Tate oo twa pumbwa? (Tala Oshimhungu “Tate omunahole oo atusheni twa pumbwa.”)

¹⁶ Eshi Jesus a popya kombinga yaTate yetu, okwa fa te tu lombwele noitya imwe ta ti: “Jehova ke fi ashike Tate wange, ndele oku li yo Tate woye. Nohandi ku shilipaleke kutya oku ku hole, noku na ko nasha naave filufilu pauhandimwe.” Onghee ngeenge omafimbo amwe owa kwatwa komalimbililo kutya ngeenge Jehova oku ku hole ngoo, kanghama, ndele to lipula kutya, ‘Mbela inandi pumbwa okulineekela eendjovo dOmona oo e shii nawanawa Xe, noha popi alushe oshili?’ — 1 Pet. 2:22.

TWIKILA OKUKALA WA TOMHWA KUTYA JEHOVA OKU KU HOLE

17. Omolwashike twa pumbwa okutwikila okukala twa tomhwa kutya Jehova oku tu hole?

¹⁷ Otwa pumbwa okutwikila okukala twa tomhwa kutya Jehova oku tu hole. Ngaashi twe lihonga metetekelo, Satana, oo e li omutondi wetu omunamakoto, ota ka ninga ashishe osho ta dulu, opo e tu efife po okulongela Jehova. Satana ota ka twikila okukendabala oku tu shololifa noku tu ningifa tu itavele kutya Jehova ke tu hole. Inatu efa Satana a findane! — Job 27:5.

18. Oshike to dulu okuninga po, opo u twikile okukala wa tomhwa kutya Jehova oku ku hole?

¹⁸ Opo u kale wa tomhwa kutya Jehova oku ku hole, twikila okwiilikana, to mu pula e ku kwafele u kale we litala ko ngaashi Ye he ku tale ko. Dilonga kwaasho ovashangi vOmbiibeli, ovo va li va nwefwa mo, va popya kombinga yaye. Dilonga yo kunghee Jehova he linyenge ngeenge a ulikilwa ohole; ita ka dopa nande okuulikila ohole ovo ve mu hole. Dilonga yo kutya omolwashike to dulu okukala wa tala ko ekuliloyambo li li oshali oyo wa pewa pauhandimwe. Lineekela mwaasho Jesus a popya kutya Jehova oku li Tate woye womeulu. Opo nee, ngeenge umwe okwe ku pula ta ti: “Mbela owa tomhwa ngoo kutya Jehova oku ku hole shili?” Oto ka dula oku mu nyamukula nouladi, to ti: “Heeno, oku hole nge shili! Nohandi ningi keshe osho handi dulu efiku keshe, opo ndi mu ulikile ohole!”